വാങ്ങിച്ച പച്ചക്കറിയുടെ പണം ചോദിച്ചതിൽ വിരോധം; വ്യാപാരിയെ കത്രിക കൊണ്ട് ആക്രമിച്ചു; പ്രതി അറസ്റ്റിൽ; സംഭവം മാവേലിക്കരയിൽ

മാവേലിക്കര: പച്ചക്കറി വാങ്ങിച്ചതിന് ശേഷം പണം ചോദിച്ച വിരോധത്തിൽ വ്യാപാരിയെ അക്രമിച്ചു. കെഎസ്ആർടിസി സ്റ്റാൻഡിനു സമീപം പച്ചക്കറി കട നടത്തുന്ന ഓലകെട്ടിയമ്പലം ശ്രുതിലയത്തിൽ എൻ സതീഷി(58)നാണ് ആക്രമണത്തിൽ പരിക്കേറ്റത്.

പ്രതി വലിയകുളങ്ങര സ്വദേശി അനിലിനെ മാവേലിക്കര പോലീസ് കസ്റ്റഡിയിലെടുത്തു. ഇന്നലെ രാത്രി 8.30 ഓടെയാണ് സംഭവം നടന്നത്.

കടയിലേക്ക് എത്തി പച്ചക്കറിയും മറ്റും എടുത്ത ശേഷം പണം ചോദിച്ച കടയുടമ സതീഷിനെ കൈയ്യിലുണ്ടായിരുന്ന കത്രിക എടുത്ത് അനിൽ ആക്രമിക്കുകയായിരുന്നു. ഇയാൾ കടയിലെ സാധനങ്ങളും വലിച്ചെറിഞ്ഞു.

ശേഷം മാവേലിക്കര പോലീസ് ഇയാളെ കസ്റ്റഡിയിൽ എടുക്കുകയായിരുന്നു. പരിക്കേറ്റ സതീഷ് ജില്ലാ ആശുപത്രിയിൽ ചികിത്സ തേടുകയും ചെയ്തിട്ടുണ്ട്.