അറബിക്കടലില്‍ പുതിയ ന്യൂനമര്‍ദ്ദം; കേരളത്തില്‍ അഞ്ച് ദിവസം കൂടി ശക്തമായ മഴയ്ക്ക് സാധ്യത; ഇന്ന് അഞ്ച് ജില്ലകളില്‍ യെല്ലോ അലേര്‍ട്ട്; കള്ളക്കടല്‍ പ്രതിഭാസത്തിനും സാധ്യത
തിരുവനന്തപുരം: അറബിക്കടലില്‍ പുതുതായി രൂപപ്പെട്ട ന്യൂനമര്‍ദം സംസ്ഥാനത്ത് തുടര്‍ മഴയ്ക്ക് സാധ്യത ഉയര്‍ത്തുന്നു. കേന്ദ്ര കാലാവസ്ഥ വകുപ്പിന്റെ മുന്നറിയിപ്പില്‍ അടുത്ത അഞ്ച് ദിവസത്തേക്ക് കേരളത്തില്‍ വ്യാപകമായ മഴയ്ക്ക് സാധ്യതയുണ്ടെന്നാണ് വ്യക്തമാക്കിയിരിക്കുന്നത്. ഇന്നാണ് അടുത്ത ശക്തമായ മഴയ്ക്കുള്ള സാധ്യത കണക്കാക്കിയിരിക്കുന്നത്.
പത്തനംതിട്ട, കോട്ടയം, ഇടുക്കി, മലപ്പുറം, വയനാട് ജില്ലകളില്‍ ജാഗ്രതാപൂര്‍വ്വം യെല്ലോ അലര്‍ട്ട് പ്രഖ്യാപിച്ചിരിക്കുകയാണ്. ഒറ്റപ്പെട്ട ശക്തമായ മഴയ്ക്ക് സാധ്യതയുള്ള ഈ ജില്ലകളില്‍ ഇടിമിന്നലോടൊപ്പം 64.5 മില്ലിമീറ്ററില്‍ നിന്നും 115.5 മില്ലിമീറ്റര്‍ വരെ മഴ പെയ്യാന്‍ സാധ്യതയുള്ളതായി കേന്ദ്ര കാലാവസ്ഥ വകുപ്പ് വ്യക്തമാക്കുന്നു.
ഇതിനിടെ സൗരാഷ്ട്ര-കച്ചിനും അതിനോട് ചേര്‍ന്നുള്ള വടക്കു കിഴക്കന്‍ അറബിക്കടലിലും തെക്കുപടിഞ്ഞാറന്‍ ബംഗ്ലാദേശ് - ഗംഗാതട പ്രദേശങ്ങളിലും ന്യൂനമര്‍ദവും ചക്രവാതച്ചുഴിയും സജീവമായിട്ടുണ്ട്. അടുത്ത 48 മണിക്കൂറിനുള്ളില്‍ വടക്കന്‍ ബംഗാള്‍ ഉള്‍ക്കടലിനും സമീപ തീരപ്രദേശങ്ങളിലുമുള്ള കാലാവസ്ഥ കൂടുതല്‍ അതീവ ജാഗ്രത ആവശ്യപ്പെടുന്നു.
അതേസമയം, തീരദേശ പ്രദേശങ്ങളില്‍ കള്ളക്കടല്‍ പ്രതിഭാസവും സജീവമാകാന്‍ സാധ്യതയുള്ളതായും മുന്നറിയിപ്പുണ്ട്. തിരുവനന്തപുരം ജില്ലയിലെ കാപ്പില്‍ മുതല്‍ പൊഴിയൂര്‍ വരെയുള്ള തീരദേശങ്ങളില്‍ ജൂണ്‍ 29 രാവിലെ 8.30 വരെ 1.8 മുതല്‍ 2.0 മീറ്റര്‍ വരെ കനത്ത തിരമാലയ്ക്കും കള്ളക്കടല്‍ പ്രതിഭാസത്തിനും സാധ്യതയുള്ളതായി ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കന്യാകുമാരിയിലെ നീറോടി മുതല്‍ ആരോക്യപുരം വരെ തീരത്ത് ഇന്ന് രാവിലെ 8.30 വരെ 1.7 മുതല്‍ 2.0 മീറ്റര്‍ വരെ ഉയരമെത്തുന്ന തിരമാലകള്‍ക്ക് സാധ്യതയുണ്ടെന്ന് റിപ്പോര്‍ട്ട് ചെയ്യപ്പെട്ടിട്ടുണ്ട്.
മത്സ്യത്തൊഴിലാളികളും തീരദേശവാസികളും ജാഗ്രത പുലര്‍ത്തണമെന്നും അധികൃതര്‍ മുന്നറിയിപ്പ് നല്‍കുന്നു. കടലില്‍ തിരിച്ചടിക്കുന്ന തിരമാലകള്‍ അപകട സാധ്യത വര്‍ദ്ധിപ്പിക്കുന്നതിനാല്‍ നിരീക്ഷണത്തോടെ തീരപ്രദേശങ്ങളില്‍ താമസിക്കുന്നവര്‍ അതീവ ജാഗ്രത പാലിക്കണം.