കേടായ ബൈക്ക് സ്റ്റാര്‍ട്ട് ചെയ്യുന്നതിടെ ദാരുണ അപകടം; വണ്ടിയിൽ നിന്ന് തീപ്പൊരി തെറിച്ച് നേരെ വീണത് പെട്രോള്‍ കുപ്പിയിലേക്ക്; തീപൊള്ളലേറ്റ് ചികിത്സയിലായിരുന്ന യുവാവ് മരണത്തിന് കീഴടങ്ങി
പാലക്കാട്: വർക്ക്‌ഷോപ്പിൽ കേടായ ബൈക്ക് സ്റ്റാർട്ട് ചെയ്യുന്നതിനിടെ തീപ്പൊരി തെറിച്ച് പെട്രോളിലേക്ക് തീ പടർന്നുണ്ടായ അപകടത്തിൽ ഗുരുതരമായി പൊള്ളലേറ്റ യുവാവ് മരിച്ചു. പാലക്കാട് പട്ടാമ്പിക്ക് സമീപം കൂറ്റനാട് സ്വദേശിയായ മുഹമ്മദ് ഫാരിസ് (22) ആണ് ശനിയാഴ്ച പുലർച്ചെ തൃശൂർ മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരിച്ചത്.
ചിറ്റണ്ടയിലെ ഒരു വർക്ക്‌ഷോപ്പ് ജീവനക്കാരനായിരുന്നു ഫാരിസ്. കഴിഞ്ഞ ചൊവ്വാഴ്ച ഉച്ചയ്ക്ക് മൂന്ന് മണിയോടെയായിരുന്നു അപകടം. ബൈക്കിൽ നിന്ന് തെറിച്ച തീപ്പൊരി അടുത്തുവെച്ചിരുന്ന പെട്രോൾ കുപ്പിയിലേക്ക് വീഴുകയും തീ ആളിപ്പടരുകയുമായിരുന്നു.
ഗുരുതരമായി പരിക്കേറ്റ ഫാരിസിനെ അന്നുതന്നെ തൃശൂർ മെഡിക്കൽ കോളേജിൽ പ്രവേശിപ്പിച്ച് വെന്റിലേറ്ററിൽ പ്രവേശിപ്പിച്ചിരുന്നു. പോസ്റ്റ്‌മോർട്ടം നടപടികൾക്ക് ശേഷം മൃതദേഹം മേലെ തലശ്ശേരി മഹല്ല് ഖബർസ്ഥാനിൽ ഖബറടക്കും.