തലയില്‍ ഷാള്‍ ധരിച്ച് ആര്‍ക്കും മുഖം കൊടുക്കാതെ രാത്രിയില്‍ ബൈക്കില്‍ ചീറിപായുന്ന തുമ്പിപ്പെണ്ണ്; കൊച്ചിയിലെ ലഹരി വില്‍പനയുടെ 'തല'; കവറുകളില്‍ കെട്ടി രാസലഹരി മാലിന്യ കൂമ്പാരത്തില്‍ തള്ളും; അന്ന് രാത്രി പെയ്ത മഴ ആ പതിവു തെറ്റിച്ചു; 'തുമ്പിപ്പെണ്ണും' 'പൂത്തിരി'യും ഇനി അഴിക്കുള്ളില്‍; 10 വര്‍ഷം തടവ് ശിക്ഷ
'തുമ്പിപ്പെണ്ണും' 'പൂത്തിരി'യും ഇനി അഴിക്കുള്ളില്‍; 10 വര്‍ഷം തടവ് ശിക്ഷ
കൊച്ചി: ലഹരിമരുന്ന് കേസില്‍ 'തുമ്പിപ്പെണ്ണ്' എന്ന് വിളിക്കുന്ന കോട്ടയം ചിങ്ങവനം സ്വദേശിനി സൂസമോള്‍ സണ്ണി ഉള്‍പ്പെടെ രണ്ടുപേര്‍ക്ക് പത്ത് വര്‍ഷം കഠിനതടവും ഒരു ലക്ഷം രൂപ വീതം പിഴയും. ആലുവ സ്വദേശി അമീര്‍ ഹുസൈലാണ് ശിക്ഷിക്കപ്പെട്ട രണ്ടാമത്തെയാള്‍. എറണാകുളം അഡിഷണല്‍ ജില്ലാ സെഷന്‍സ് കോടതിയാണ് ശിക്ഷ വിധിച്ചത്.
നഗരത്തില്‍ എംഡിഎംഎ എത്തിച്ച് മൊത്തവിതരണം നടത്തി വന്ന സംഘത്തിലെ പ്രധാന കണ്ണികളായ കോട്ടയം ചിങ്ങവനം മുട്ടത്താട്ട്ചിറ വീട്ടില്‍ 'തുമ്പിപ്പെണ്ണ്' എന്നറിയപ്പെടുന്ന സൂസിമോള്‍ എം.സണ്ണി (26), ആലുവ ചെങ്ങമനാട് കല്ലൂക്കാടന്‍ പറമ്പില്‍ വീട്ടില്‍ 'പൂത്തിരി' എന്നുവിളിക്കുന്ന അമീര്‍ സൊഹൈല്‍ (25) എന്നിവര്‍ക്കാണ് എറണാകുളം അഡിഷനല്‍ ജില്ലാ സെഷന്‍സ് കോടതി ശിഷ വിധിച്ചത്. കേസിലെ മൂന്നും നാലും പ്രതികളായ വൈപ്പിന്‍ സ്വദേശി കുറുമ്പനാട്ട് പറമ്പില്‍ അജ്മല്‍ കെ.എ. (24), അങ്കമാലി പുളിയിനം സ്വദേശി എല്‍റോയ് വര്‍ഗീസ് (22) എന്നിവരെ തെളിവുകളുടെ അഭാവത്തില്‍ കോടതി വെറുതെ വിട്ടു.
2023 ഒക്ടോബറിലായിരുന്നു കേസിനാസ്പദമായ സംഭവം. രാത്രി ആഡംബര ബൈക്കുകളില്‍ കറങ്ങി നടന്ന് ആവശ്യക്കാര്‍ക്കായി ലഹരിമരുന്ന് കറുത്ത കവറുകളില്‍ കെട്ടി മാലിന്യ കൂമ്പാരങ്ങളില്‍ ഇട്ടശേഷം ശരവേഗത്തില്‍ പാഞ്ഞു പോകുന്നതായിരുന്നു തുമ്പിപ്പെണ്ണിന്റെ സംഘത്തിന്റെ രീതി. നഗരത്തിലെ ലഹരിമരുന്ന് വിതരണത്തിനു ചുക്കാന്‍ പിടിച്ചിരുന്ന തുമ്പിപ്പെണ്ണായിരുന്നു ലഹരിമരുന്ന് വിതരണത്തിന് സംഘാംഗങ്ങളെ ചുമതലപ്പെടുത്തിയിരുന്നതും. തലയില്‍ ഷാള്‍ ധരിച്ച് ആര്‍ക്കും മുഖം കൊടുക്കാതെ രാത്രി സമയം ഇരുചക്ര വാഹനങ്ങളില്‍ പുറത്തിറങ്ങുന്ന തുമ്പിപ്പെണ്ണ് ആവശ്യക്കാരുടെ പക്കല്‍ നിന്ന് നേരിട്ട് പണം വാങ്ങും. ശേഷം ഇവരുടെ സംഘത്തിലെ ലഹരി വിതരണക്കാര്‍ മുഖേന ആവശ്യക്കാര്‍ക്ക് സാധനം എത്തിച്ച് നല്‍കും. തുമ്പിപ്പെണ്ണ് ലഹരി മരുന്ന് നേരിട്ട് നല്‍കാത്തതിനാല്‍ പിടിക്കപ്പെടുന്നത് എപ്പോഴും വിതരണക്കാരായിരിക്കും.
2023 ഒക്ടോബറിലാണ് കലൂര്‍ സ്റ്റേഡിയം പരിസരത്തുനിന്ന് കാറില്‍ കടത്തുകയായിരുന്ന 350 ഗ്രാം എം.ഡി.എം.എ. സഹിതം സൂസിമോള്‍ ഉള്‍പ്പടെയുള്ളവരെ പിടികൂടിയത്. ഹിമാചല്‍ കേന്ദ്രീകരിച്ചുള്ള സംഘമാണ് ഇവര്‍ക്ക് ലഹരി എത്തിച്ചുനല്‍കിയിരുന്നത്. വിമാനത്തില്‍ കൊച്ചിയിലെത്തിക്കുന്ന ലഹരിമരുന്ന് അവിടെവെച്ച് കവറുകളിലാക്കി മാലിന്യമെന്നോണം ഉപേക്ഷിക്കുകയാണ് പതിവ്. ഹിമാചല്‍ സംഘം വാട്സാപ്പില്‍ നല്‍കുന്ന അടയാളം പിന്തുടര്‍ന്ന് കൊച്ചിയിലുള്ളവര്‍ ലഹരിമരുന്ന് വിമാനത്താവള പരിസരത്തുനിന്ന് ശേഖരിക്കും. സൂസിയും സംഘവും നഗരത്തിലെ ഏജന്റുമാര്‍ക്കാണ് ലഹരിമരുന്ന് കൈമാറിയിരുന്നത്. സംഘത്തിന്റെ ഇടപാടുകളെ കുറിച്ച് രഹസ്യവിവരം ലഭിച്ചതിന് പിന്നാലെയായിരുന്നു ഇവര്‍ പിടിയിലായത്.
സംഭവദിവസം രാത്രി മഴ പെയ്തതിനാല്‍ ഇരുചക്ര വാഹനത്തിന് പകരം ഇവരുടെ തന്നെ സംഘത്തിലെ ആഡംബര കാറാണ് ലഹരി വിതരണത്തിന് തിരഞ്ഞെടുത്തത്. ലഹരി മരുന്ന് കൈമാറാന്‍ കാറില്‍ കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിനു സമീപം എത്തിയതോടെ തുമ്പിപ്പെണ്ണ് സംഘാംഗങ്ങള്‍ക്കൊപ്പം എക്‌സൈസിന്റെ പിടിയിലാവുകയായിരുന്നു. പിടിയിലാകുമ്പോള്‍ കാറില്‍ പല ബാഗുകളിലായാണ് എംഡിഎംഎ സൂക്ഷിച്ചിരുന്നത്.
അമീറിന്റെ വസ്ത്രത്തിന്റെ പോക്കറ്റുകളില്‍ നിന്നും ലഹരിമരുന്ന് കണ്ടെടുത്തു. ഇവരുടെ പക്കല്‍ 25 ലക്ഷത്തോളം രൂപ വിലമതിക്കുന്ന 350 ഗ്രാം രാസലഹരി ഉണ്ടായിരുന്നു. പിടികൂടുന്ന സമയത്ത് ലഹരിമരുന്ന് സംഘത്തിലുള്ളവര്‍ സ്പ്രിങ് ബാറ്റണ്‍ ഉപയോഗിച്ച് ഉദ്യോഗസ്ഥരെ ആക്രമിക്കാന്‍ ശ്രമിച്ചത് അന്ന് വലിയ വാര്‍ത്തയായിരുന്നു. മാലിന്യ കൂമ്പാരത്തിനുള്ളില്‍ ലഹരിമരുന്ന് നിക്ഷേപിക്കുന്ന ബുദ്ധി തുമ്പിപ്പെണ്ണിന്റേതായിരുന്നു. പ്രതികള്‍ ഇപ്പോള്‍ എറണാകുളം സബ് ജയിലിലാണുള്ളത്.