കോളേജില്‍ തടി കുറച്ച് സ്‌റ്റൈലായി പോകണം; 17കാരന് മൂന്ന് മാസമായി കഴിച്ചത് വിവിധ തരം ജ്യൂസ് മാത്രം; ശ്വാസതടസം അനുഭവപ്പെട്ടതോടെ ആശുപത്രിയിലെത്തിച്ചെങ്കിലും ദാരുണാന്ത്യം; ശ്വാസകോശത്തില്‍ അണുബാധയോ? മരണകാരണം അറിയാന്‍ പോസ്റ്റ്മോര്ട്ടം റിപ്പോര്‍ട്ട് കാത്ത് ബന്ധുക്കള്‍
ഭക്ഷണം നിയന്ത്രിച്ചു; 17കാരന് ദാരുണാന്ത്യം
ചെന്നൈ: എഞ്ചിനീയറിങ് പഠിക്കാന്‍ കോളേജില്‍ ചേരാനിരിക്കെ ശരീരത്തിന്റെ അമിത വണ്ണം കുറച്ച് സുന്ദരനാകാന്‍ യൂട്യൂബ് വീഡിയോകള്‍ നോക്കി ഭക്ഷണക്രമത്തില്‍ മാറ്റം വരുത്തിയ വിദ്യാര്‍ത്ഥിക്ക് ദാരുണാന്ത്യം. കുളച്ചല്‍ സ്വദേശി നാഗരാജന്റെ മകന്‍ ശക്തീശ്വരനാണ് (17) മരിച്ചത്. പ്ലസ്ടു കഴിഞ്ഞ് തിരുച്ചിറപ്പള്ളിയിലെ കോളേജില്‍ ചേരാനിരിക്കുകയായിരുന്നു ശക്തീശ്വരന്‍. കോളേജില്‍ ചേരുന്നതിനു മുന്‍പ് തടി കുറയ്ക്കാനാണ് കുട്ടി യുട്യൂബ് നോക്കി ഭക്ഷണക്രമത്തില്‍ മാറ്റം വരുത്തിയത്.
കഴിഞ്ഞ മൂന്ന് മാസത്തോളം കുട്ടി മറ്റ് ഭക്ഷണമൊന്നും കഴിച്ചിരുന്നില്ലെന്ന് വീട്ടുകാര്‍ പറയുന്നു. ജ്യൂസ് മാത്രമാണ് കുടിച്ചിരുന്നത്.ദിവസങ്ങള്‍ക്കു മുന്‍പാണ് ശക്തീശ്വരന്റെ ആരോഗ്യാവസ്ഥ മോശമായത്. കഴിഞ്ഞ ദിവസം കുട്ടിക്ക് ശ്വാസതടസം അനുഭവപ്പെട്ടതിനെത്തുടര്‍ന്ന് മാതാപിതാക്കള്‍ കുളച്ചലിലുള്ള സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു. തണുത്ത ജ്യൂസ് പതിവായി കഴിച്ചതിനെത്തുടര്‍ന്ന് ശ്വാസകോശത്തിലുണ്ടായ അണുബാധയാകാം ശ്വാസതടസത്തിന് കാരണമായതെന്നാണ് പുറത്തുവരുന്ന വിവരം.
ഭക്ഷണക്രമത്തില്‍ മാറ്റം വരുത്തുന്നതിന് മുന്‍പ് കുട്ടി ആരോഗ്യവിദഗ്ദരുടെ നിര്‍ദ്ദേശങ്ങള്‍ സ്വീകരിച്ചിരുന്നില്ലെന്നും റിപ്പോര്‍ട്ടുകളുണ്ട്. പോസ്റ്റ്മോര്ട്ടം റിപ്പോര്‍ട്ട് പുറത്തുവന്നാല്‍ മാത്രമേ കുട്ടിയുടെ മരണത്തെക്കുറിച്ച് കൂടുതല്‍ വിവരങ്ങള്‍ ലഭിക്കുകയുള്ളൂ.
തിരുച്ചിറപ്പള്ളിയിലെ കോളേജില്‍ അഡ്മിഷന്‍ ശരിയായിരുന്നു. കോളേജില്‍ ചേരുന്നതിന് മുന്‍പ് തടി കുറയ്ക്കാനായിരുന്നു ശ്രമം. ഇതിനായി യൂട്യൂബിലെ വീഡിയോകള്‍ നോക്കി ഭക്ഷണ ക്രമത്തില്‍ മാറ്റം വരുത്തുകയായിരുന്നു. കഴിഞ്ഞ മൂന്ന് മാസമായി ഭക്ഷണം കര്‍ശനമായി നിയന്ത്രിച്ചുവരികയായിരുന്നു ശക്തീശ്വര്‍ എന്നാണ് വിവരം. വിവിധ തരത്തിലുള്ള ജ്യൂസുകള്‍ മാത്രമാണ് ഈ കാലത്ത് കഴിച്ചത്. ആരോഗ്യം ക്ഷയിച്ചതോടെ കുട്ടി കഴിഞ്ഞ ആഴ്ചയോടെ രോഗബാധിതനായി. കഴിഞ്ഞ ദിവസം ശ്വാസ തടസം അനുഭവപ്പെട്ടു. മാതാപിതാക്കള്‍ കുളച്ചലിലുള്ള സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
കേരളത്തിലും സമാനമായ സംഭവം അരങ്ങേറിയിരുന്നു. ശരീരഭാരം കുറയ്ക്കാനായി അമിതമായി ഭക്ഷണം നിയന്ത്രിച്ച പെണ്‍കുട്ടിക്കും ജീവന്‍ നഷ്ടമായിരുന്നു. കൂത്തുപറമ്പ് സ്വദേശിനിയായ ശ്രീനന്ദയാണ് മരിച്ചത്. കഴിഞ്ഞ മാര്‍ച്ചിലായിരുന്നു സംഭവം. ശരീരഭാരം കൂടുമെന്ന ഭയം കൊണ്ട് ശ്രീനന്ദ അമിതമായി ഭക്ഷണം നിയന്ത്രിക്കുകയും കഠിന വ്യായാമങ്ങളും ചെയ്തിരുന്നു. ഓണ്‍ലൈന്‍ പ്ലാറ്റ്ഫോമുകളില്‍ കണ്ട ചില വീഡിയോകളുടെ അടിസ്ഥാനത്തിലാണ് പെണ്‍കുട്ടി ഇത്തരത്തില്‍ ചെയ്തത്. അധികം വൈകാതെ തന്നെ ശ്രീനന്ദയുടെ ആരോഗ്യനില മോശമാകുകയും പിന്നാലെ മരണം സംഭവിക്കുകയുമായിരുന്നു.