ആശാ പ്രവര്‍ത്തകര്‍ നടത്തിക്കൊണ്ടിരിക്കുന്ന സമരത്തിന് ഐക്യദാര്‍ഢ്യം പ്രഖ്യാപിച്ച് ബിജെപി പ്രവര്‍ത്തകരും; തല മുണ്ഡനം ചെയ്ത് ബിജെപി പ്രവര്‍ത്തകര്‍; സമരത്തിന് പിന്തുണയുമായി നിരവധി പ്രമുഖ നേതാക്കള്‍ രംഗത്ത്
കൊച്ചി: കേരളത്തില്‍ ആശാ പ്രവര്‍ത്തകര്‍ നടത്തിക്കൊണ്ടിരിക്കുന്ന സമരത്തിന് ഐക്യദാര്‍ഢ്യം പ്രഖ്യാപിച്ച് ബിജെപി പ്രവര്‍ത്തകരും തങ്ങളുടെ പ്രതിഷേധം രേഖപ്പെടുത്തി. സെക്രട്ടറിയേറ്റിന് മുന്നില്‍ ആശമാറ തല മുണ്ഡനം ചെയ്തപ്പോള്‍ കൊച്ചിയില്‍ നടത്തിയ സമരത്തില്‍, പ്രതിഷേധത്തിന്റെ ഭാഗമായി ബിജെപി പ്രവര്‍ത്തകര്‍ തല മുണ്ഡനം ചെയ്തു. ഇതിനകം, സമരത്തിന് പിന്തുണയുമായി നിരവധി പ്രമുഖ നേതാക്കള്‍ രംഗത്ത് എത്തിയിരുന്നു. ബിജെപി എംപി സുരേഷ് ഗോപി അടക്കം വിവിധ നേതാക്കള്‍ നേരിട്ടെത്തി സമരത്തില്‍ പങ്കെടുത്ത ആശാ പ്രവര്‍ത്തകരുടെ ദുരിതം കേട്ടിരുന്നു.
ആശാ പ്രവര്‍ത്തകരുടെ സമരം അമ്പതാം ദിനത്തിലേക്ക് കടന്നതോടെയാണ് മുടിമുറിച്ച് പ്രതിഷേധിക്കാനുള്ള തീരുമാനം. 'ഇന്ന് ഞങ്ങള്‍ മുടി മുറിക്കുന്നു, ഇനി സര്‍ക്കാര്‍ ഞങ്ങളുടെ തല വെട്ടിമാറ്റട്ടെ' എന്ന മുദ്രാവാക്യങ്ങളുമായി സമരം ശക്തമാകുകയാണ്. ഫെബ്രുവരി 10 മുതല്‍ തുടരുന്ന സമരത്തിനിടെ, ഇരുവട്ടം മാത്രമാണ് സര്‍ക്കാര്‍ ചര്‍ച്ചയ്ക്ക് തയ്യാറായത്.
കേരളത്തില്‍ 26,448 ആശാ പ്രവര്‍ത്തകരുണ്ട്. ഇവര്‍ക്ക് മാസവേതനം 13,200 രൂപയായിട്ടാണ് ലഭിക്കുന്നത്. ഇതില്‍ 7,000 രൂപ സംസ്ഥാന സര്‍ക്കാര്‍ ഓണറേറിയമായി നല്‍കുന്നു. കേന്ദ്രസര്‍ക്കാര്‍ നല്‍കുന്ന 3,000 രൂപയുടെ ഇന്‍സെന്റീവ് കൂടാതെ, ടെലിഫോണ്‍ അലവന്‍സ്, മറ്റ് ആനുകൂല്യങ്ങള്‍ എന്നിവ കൂടി ചേര്‍ത്ത് പ്രതിമാസ വരുമാനം ഉറപ്പാക്കിയിട്ടുണ്ട്.
പ്രവര്‍ത്തനത്തിന്റെ പ്രാധാന്യം കണക്കിലെടുത്ത്, പ്രതിദിന വേതനം 700 രൂപയാക്കണം, വിരമിക്കുമ്പോള്‍ അഞ്ചു ലക്ഷം രൂപ നല്‍കണം, പെന്‍ഷന്‍ പദ്ധതി നടപ്പിലാക്കണം എന്നിവ ഉള്‍പ്പെടെയുള്ള ആവശ്യങ്ങളാണ് ആശാ പ്രവര്‍ത്തകര്‍ മുന്നോട്ട് വച്ചിരിക്കുന്നത്. ഇവരെ ഔദ്യോഗിക തൊഴിലാളികളായി അംഗീകരിക്കുകയും തൊഴിലാളികള്‍ക്ക് ലഭിക്കുന്ന ആനുകൂല്യങ്ങള്‍ ഉറപ്പാക്കുകയും ചെയ്യണമെന്നാണ് ആശാ പ്രവര്‍ത്തകര്‍ ആവശ്യപ്പെടുന്നത്.