അതിജീവിതയെ അപമാനിച്ചെന്ന കേസില്‍ രാഹുല്‍ ഈശ്വറിനെ കൂടാതെ അഞ്ച് പ്രതികള്‍; മഹിളാ കോണ്‍ഗ്രസ് നേതാവ് രഞ്ജിത പുളിക്കല്‍ ഒന്നാം പ്രതി; കോണ്‍ഗ്രസ് നേതാവ് സന്ദീപ് വാര്യരും പ്രതിപ്പട്ടികയില്‍; കേസ് നിയമപരമായി നേരിടും; പേര് വെളിപ്പെടുത്തിയത് താനല്ല, ഡിവൈഎഫ്‌ഐ നേതാവാണ്; നീക്കം രാഷ്ട്രീയ പ്രേരിതമെന്നും സന്ദീപ് വാര്യര്‍
അതിജീവിതയെ അപമാനിച്ചെന്ന കേസില്‍ രാഹുല്‍ ഈശ്വറിനെ കൂടാതെ അഞ്ച് പ്രതികള്‍
തിരുവനന്തപുരം: രാഹുല്‍ മാങ്കൂട്ടത്തിലിനെതിരെ ലൈംഗിക പീഡന പരാതി നല്‍കിയ യുവതിയെ സൈബറിടത്തില്‍ അപമാനിച്ചെന്ന കേസില്‍ കോണ്‍ഗ്രസ് നേതാവ് സന്ദീപ് വാര്യരെയും പ്രതിചേര്‍ത്തും. കേസില്‍ നാലാം പ്രതിയാണ് സന്ദീപ് വാര്യര്‍. കേസില്‍ മഹിളാ കോണ്‍ഗ്രസ് പത്തനംതിട്ട ജില്ലാ സെക്രട്ടറി രഞ്ജിത പുളിക്കലാണ് ഒന്നാം പ്രതി. അഡ്വ. ദീപാ ജോസഫ് രണ്ടാംപ്രതിയും ദീപ ജോസഫ് മൂന്നാം പ്രതിയുമാണ്. അതേസമയം കസ്റ്റഡിയിലെടുത്ത അഞ്ചാം പ്രതിയായ രാഹുല്‍ ഈശ്വറിനെ സൈബര്‍ പൊലീസ് ചോദ്യം ചെയ്ത് വരികയാണ്.
പരാതിക്കാരിയുടെ വ്യക്തിഗത വിവരങ്ങള്‍ വെളിപ്പെടുത്തുക, സ്ത്രീത്വത്തെ അപമാനിക്കല്‍, ഭീഷണിപ്പെടുത്തല്‍ അടക്കമുള്ള കുറ്റങ്ങളാണ് ഇവര്‍ക്കെതിരെ ചുമത്തിയിട്ടുള്ളത്. അതിജീവിതയ്‌ക്കെതിരായ സൈബര്‍ അതിക്രമത്തിലെ പൊലീസ് നടപടിക്ക് പിന്നാലെയാണ് രാഹുല്‍ ഈശ്വറിനെ കസ്റ്റഡിയില്‍ എടുത്തത്. എ ആര്‍ ക്യാമ്പിലെത്തിച്ചാണ് രാഹുല്‍ ഈശ്വറിനെ ചോദ്യം ചെയ്യുന്നത്. രാഹുല്‍ ഈശ്വറിന്റെ ഫോണ്‍ കസ്റ്റഡിയിലെടുത്തു.
രാഹുല്‍ മാങ്കൂട്ടത്തില്‍ ലൈംഗികമായി അതിക്രമിച്ചുവെന്ന് മുഖ്യമന്ത്രിക്ക് പരാതി നല്‍കിയതിന് പിന്നാലെയാണ് അതിജീവിതക്കെതിരെ സൈബര്‍ ആക്രമണം രൂക്ഷമായത്. പിന്നാലെയാണ് സൈബര്‍ ആക്രമണത്തില്‍ യുവതി പരാതി നല്‍കിയത്. പരാതിയില്‍ കേസെടുക്കാന്‍ എഡിജിപി എച്ച് വെങ്കിടേഷ് നിര്‍ദേശം നല്‍കിയിരുന്നു. അതേസമയം തനിക്കെതിരാ കേസ് രാഷ്ട്രീയ പ്രേരിതമാണെന്നാണ് സന്ദീപ് വാര്യര്‍ പറയുന്നത്. കേസ് നിയമപരമായി നേരിടും. പേര് വെളിപ്പെടുത്തിയത് താനല്ല, ഡിവൈഎഫ്‌ഐ നേതാവാണെന്നും സന്ദീപ് വ്യക്തമാക്കി.
സൈബറിടങ്ങളിലൂടെയും തന്റെ യുട്യൂബ് ചാനലിലൂടെയും അതിജീവിതയെ അധിക്ഷേപിക്കുന്ന തരത്തില്‍ രാഹുല്‍ ഈശ്വര്‍ നിരന്തരം പോസ്റ്റുകളും വിഡിയോകളും ഇട്ടിരുന്നു എന്നാണ് പരാതിക്കാരി സൂചിപ്പിക്കുന്നത്. പരാതി നല്‍കുന്നതിന് മുമ്പ് തന്നെ അതിജീവിതയ്ക്കെതിരെ വളരെ മോശമായ പരാമര്‍ശങ്ങള്‍ രാഹുല്‍ നടത്തിയെന്നാണ് ആക്ഷേപം.
രാഹുലിനെതിരായ ലൈംഗികാതിക്രമ പരാതികള്‍ ഉയര്‍ന്നു വരാന്‍ തുടങ്ങിയ ആദ്യ ഘട്ടത്തില്‍ തന്നെ, അതിക്രമം നേരിട്ട യുവതികള്‍ക്കെതിരെ വലിയ രീതിയിലുള്ള അധിക്ഷേപങ്ങളായിരുന്നു നടന്നത്. പരാതി നല്‍കിയതിന് പിന്നാലെ അതിജീവിതയ്ക്ക് നേരെയും നിരന്തരം അധിക്ഷേപങ്ങളുയര്‍ന്നു. രാഹുല്‍ മാങ്കൂട്ടത്തിലിനെതിരെ ലൈംഗിക ചൂഷണത്തിന് പരാതി നല്‍കിയ യുവതിയുടെ വിവരങ്ങള്‍ വെളിപ്പെടുത്തുന്നതിന് പിന്നില്‍ കോണ്‍ഗ്രസ് നേതാക്കളടങ്ങുന്ന വാട്ട്‌സാപ്പ് ഗ്രൂപ്പില്‍ നടന്ന ഗൂഢാലോചനയാണെന്ന് ഡോ. പി സരിന്‍ വെളിപ്പെടുത്തിയിരുന്നു.
കോണ്‍ഗ്രസിന്റെ സോഷ്യല്‍ മീഡിയയിലെ പോസ്റ്റും കമന്റും നിയന്ത്രിക്കുന്ന ഇന്‍സ്റ്റന്‍ന്റ് റെസ്‌പോണ്‍സ് ടീമിന്റെ വാട്‌സാപ്പ് ഗ്രൂപ്പിലാണ് ഇത് സംബന്ധിച്ച് ഗൂഢാലോചന നടന്നതെന്ന് ആക്ഷേപം ശക്തമാണ്. അതേസമയം ഇരയുടെ ഐഡന്റിറ്റി വെളിപ്പെടുത്താന്‍ പാടില്ല. സൈബര്‍ ഗ്രൂപ്പുകള്‍ക്ക് എതിരെയും കുറ്റക്കാര്‍ക്കെതിരെയും കൃത്യമായ പ്രോസിക്യൂഷന്‍ നടപടി ഉണ്ടാമെന്ന് എഡിജിപി എസ് ശ്രീജിത്ത് പറഞ്ഞു.
ഇരയ്ക്ക് സംരക്ഷണം കൊടുക്കാന്‍ പൊലീസ് ബാധ്യസ്ഥരാണ്. ഇരയുടെ ഐഡന്റിറ്റി വെളിപ്പെടുത്താന്‍ പാടില്ല. സൈബര്‍ ഗ്രൂപ്പുകള്‍ക്ക് എതിരെയും കുറ്റക്കാര്‍ക്കെതിരെയും കൃത്യമായ പ്രോസിക്യൂഷന്‍ നടപടി ഉണ്ടാകും. പരാതിയില്‍ പറഞ്ഞിരിക്കുന്ന കൂടുതല്‍ പേര്‍ക്കെതിരെയും നടപടിയെടുക്കുമെന്നും എഡിജിപി എസ് ശ്രീജിത്ത് പറഞ്ഞു.
അതേസമയം, ലൈംഗിക പീഡന കേസില്‍ ഒളിവിലുള്ള രാഹുല്‍ മാങ്കൂട്ടത്തില്‍ എംഎല്‍എയുടെ ഫ്‌ലാറ്റിലെ പരിശോധന പൂര്‍ത്തിയാക്കി അന്വേഷണ സംഘം മടങ്ങി. ഫ്‌ലാറ്റില്‍ ഉള്ളത് ഒരു മാസത്തെ സിസിടിവി ബാക്ക് അപ്പാണെന്ന് പൊലീസ് കണ്ടെത്തി. നാളെ അന്വേഷണ സംഘം വീണ്ടും ഫ്‌ലാറ്റില്‍ എത്തും. കെയര്‍ടേക്കറില്‍ നിന്ന് വിവരങ്ങള്‍ തേടും. ഫ്‌ലാറ്റില്‍ നിന്ന് അന്വേഷണ സംഘം വിവരങ്ങള്‍ ശേഖരിച്ചു. രാഹുല്‍ അവസാനം ഫ്‌ലാറ്റില്‍ എത്തിയത് ഉള്‍പ്പെടെയുള്ള ദൃശ്യങ്ങള്‍ അന്വേഷണ സംഘത്തിന് ലഭിച്ചു. രാഹുലിന്റെ പേഴ്‌സണല്‍ സ്റ്റാഫ് അംഗം ഫസലിനെ ഇന്ന് ചോദ്യം ചെയ്തു. ഇവരില്‍ നിന്ന് ലഭിച്ച വിവരത്തിന്റെ അടിസ്ഥാനത്തിലും പരിശോധന നടത്തും.