തീവ്രവാദ വിരുദ്ധ നീക്കങ്ങളെ വേഗമേറിയതും കൃത്യവുമാക്കുന്ന സമന്വയ സമീപനം; നൗഗ്രാമിലെ പോസ്റ്റര്‍ ഗൗരവത്തില്‍ എടുത്ത ഓപ്പറേഷന് സ്‌പെഷ്യലിസ്റ്റ്; കര്‍ണൂലിലെ ഡോക്ടര്‍ ദമ്പതികളുടെ മകന്‍ തകര്‍ത്തത് വൈറ്റ് കോളര്‍ ടെററിസം; ഡോക്ടര്‍മാരുടെ ഭീകരതയുടെ വേരുകള്‍ കണ്ടെത്തിയതും എംബിബിഎസുകാരന്‍; ഡോ സന്ദീപ് ചക്രവര്‍ത്തി ഐപിഎസിന്റെ കഥ
ന്യൂഡല്‍ഹി: ശ്രീനഗറില്‍ ജയ്‌ഷെ മുഹമ്മദ് ഭീകരസംഘടനയുടെ വലിയൊരു ശൃംഖല തകര്‍ത്തത് പോലീസിന്റെ കരുതലാണ്. രാജ്യത്തെ വൈറ്റ് കോളര്‍ ടെററിസത്തിന്റെ അടിവേരായിരുന്നു തുറന്നു കാട്ടപ്പെട്ടത്. ഉന്നത വിദ്യാഭ്യാസം നേടിയ ഡോക്ടര്‍മാര്‍ പോലും ഭീകരതയുടെ വഴിയേ പോകുന്നുവെന്ന തിരിച്ചറിവ് ഈ അന്വേഷണം തന്നെ. ചെറിയൊരു ഇന്റലിജന്‍സ് വീഴ്ച ചെങ്കോട്ടയില്‍ സ്‌ഫോടനമായപ്പോള്‍ രാജ്യം ഞെട്ടി. അപ്പോഴും ജമ്മു പോലീസിന്റെ കണ്ടെത്തലുകള്‍ തീവ്രവാദത്തിന്റെ അടിവേര് അതിവേഗം കണ്ടെത്താന്‍ സഹായകകരമായി എന്നതാണ് വസ്തുത.
ജമ്മു കശ്മീര്‍, ഹരിയാന, ഉത്തര്‍പ്രദേശ് എന്നീ സംസ്ഥാനങ്ങളിലായി വ്യാപിച്ചുകിടക്കുന്ന ഈ അന്തര്‍സംസ്ഥാന ശൃംഖലയില്‍ ഉള്‍പ്പെട്ട നിരവധി ഭീകരരെയും ഏതാനും ഡോക്ടര്‍മാരെയും അറസ്റ്റ് ചെയ്തു. ഇവരില്‍ നിന്ന് 2,900 കിലോഗ്രാമിലധികം സ്‌ഫോടകവസ്തുക്കളും ബോംബ് നിര്‍മ്മാണ സാമഗ്രികളും എ.കെ. സീരീസ് റൈഫിളുകളും പിടിച്ചെടുത്തത് സമീപകാലത്തെ ഏറ്റവും വലിയ ഭീകരവിരുദ്ധ നീക്കങ്ങളിലൊന്നായി കണക്കാക്കപ്പെടുന്നു.
കഴിഞ്ഞ ഒക്ടോബര്‍ പകുതിയോടെ നൗഗാമില്‍ സുരക്ഷാ സേനയ്ക്ക് ഭീഷണിയുമായി ജയ്‌ഷെ മുഹമ്മദിന്റെ പോസ്റ്ററുകള്‍ പ്രത്യക്ഷപ്പെട്ടതോടെയാണ് ഈ ഓപ്പറേഷന് തുടക്കമായത്. ഇത്തരം പോസ്റ്ററുകള്‍ 2019-ന് മുന്‍പ് സാധാരണമായിരുന്നെങ്കിലും, ശ്രീനഗര്‍ എസ്.എസ്.പി. ഡോ. ജി.വി. സന്ദീപ് ചക്രവര്‍ത്തി ഈ സംഭവത്തെ ഗൗരവമായി കണ്ടു. (2014 ബാച്ച് ഐ.പി.എസ്. ഉദ്യോഗസ്ഥനായിരുന്നു ഇദ്ദേഹം. ഇത് വെറും പ്രചാരണമല്ലെന്നും വലിയൊരു ഭീഷണിയുടെ സൂചനയാണെന്നും തിരിച്ചറിഞ്ഞു. ഇതിന് മുന്‍പ് ഓപ്പറേഷന് മഹാദേവില്‍ മൂന്ന് പഹല്‍ഗാം ആക്രമികളെ ഇല്ലാതാക്കിയ പരിചയം പോലീസ് കരുത്ത് ഇവിടേയും ആഞ്ഞടിച്ചു.
പോസ്റ്ററുകളുടെ ഉറവിടം കണ്ടെത്താന്‍ ചക്രവര്‍ത്തി വിപുലമായ അന്വേഷണത്തിന് ഉത്തരവിട്ടു. നൗഗാമിലെ സി.സി.ടി.വി. ദൃശ്യങ്ങള്‍ പരിശോധിച്ചപ്പോള്‍ കല്ലേറ് കേസുകളില്‍ മുന്‍പും ഉള്‍പ്പെട്ടിരുന്ന മൂന്ന് സംശയകരമായ വ്യക്തികളെ തിരിച്ചറിഞ്ഞു. ഇവരെ ചോദ്യം ചെയ്തതിലൂടെയാണ് ജമ്മു കശ്മീര്‍, ഹരിയാന, ഉത്തര്‍പ്രദേശ് എന്നിവിടങ്ങളിലേക്ക് വ്യാപിച്ചുകിടക്കുന്ന ഒരു അന്തര്‍സംസ്ഥാന ഭീകര ശൃംഖലയെക്കുറിച്ചുള്ള ഞെട്ടിക്കുന്ന വിവരങ്ങള്‍ പുറത്തുവന്നത്. നിരവധി ഓപ്പറേറ്റര്‍മാരും കശ്മീരി ഡോക്ടര്‍മാരും ഉള്‍പ്പെട്ട സങ്കീര്‍ണ്ണമായ ഒരു ജയ്‌ഷെ മുഹമ്മദ് മൊഡ്യൂളിനെയാണ് ഈ അന്വേഷണം തുറന്നുകാട്ടിയത്. പിടിച്ചെടുത്ത വന്‍ സ്‌ഫോടകവസ്തു ശേഖരം ഈ ഭീകര ശൃംഖലയുടെ വ്യാപ്തിയും പ്രവര്‍ത്തനശേഷിയും വ്യക്തമാക്കുന്നതായിരുന്നു.
ആന്ധ്രാപ്രദേശിലെ കര്‍ണൂലില്‍ ജനിച്ച ജി.വി. സുന്ദീപ് ചക്രവര്‍ത്തി പൊതുസേവനത്തിനായി ജീവിതം സമര്‍പ്പിച്ച ഒരു കുടുംബത്തില്‍ നിന്നാണ് വരുന്നത്. അദ്ദേഹത്തിന്റെ പിതാവ്, ഡോ. ജി.വി. രാമഗോപാല്‍ റാവു, റെസിഡന്റ് മെഡിക്കല്‍ ഓഫീസറായി സേവനമനുഷ്ഠിച്ചു, അമ്മ പി.സി. രംഗമ്മ ആരോഗ്യവകുപ്പില്‍ ജോലി ചെയ്തു. കര്‍ണൂല്‍ മെഡിക്കല്‍ കോളേജിലെ പൂര്‍വ്വ വിദ്യാര്‍ത്ഥിയായ ഡോ. ചക്രവര്‍ത്തി 2010-ല്‍ വൈദ്യശാസ്ത്രത്തില്‍ ബിരുദം നേടി. കുറച്ചുകാലം പ്രാക്ടീസ് ചെയ്ത ശേഷം അദ്ദേഹം രാജ്യത്തെ സിവില്‍ സര്‍വ്വീസില്‍ എത്തി. 2014ല്‍ ഇന്ത്യന്‍ പോലീസ് സര്‍വീസില്‍ ചേര്‍ന്നു. രാഷ്ട്രപതിയുടെ ആറു മെഡലുകള്‍ കിട്ടിയിട്ടുണ്ട്.
തന്റെ ഔദ്യോഗിക ജീവിതത്തിലുടനീളം, ഡോ. ജി.വി. സുന്ദീപ് ചക്രവര്‍ത്തി ജമ്മു കാശ്മീരിലെ ഏറ്റവും വെല്ലുവിളി നിറഞ്ഞതും തന്ത്രപരമായി പ്രാധാന്യമുള്ളതുമായ സ്ഥാനങ്ങളില്‍ സേവനമനുഷ്ഠിച്ചിട്ടുണ്ട്. അദ്ദേഹം ഊറി, സോപോര്‍ എന്നിവിടങ്ങളില്‍ ഓപ്പറേഷനുകള്‍ക്ക് നേതൃത്വം നല്‍കി, എസ്.പി. ഓപ്പറേഷന്‍സ് ബാരാമുള്ള ആയിരിക്കുമ്പോള്‍ പ്രധാനപ്പെട്ട ഭീകരവിരുദ്ധ ദൗത്യങ്ങള്‍ ഏകോപിപ്പിച്ചു. കൂടാതെ, എസ്.പി. സൗത്ത് ശ്രീനഗര്‍, എസ്.പി. ഹന്ദ്വാര, എസ്.എസ്.പി. കുപ്വാര, എസ്.എസ്.പി. കുല്‍ഗാം, എസ്.എസ്.പി. അനന്തനാഗ് എന്നീ തസ്തികകളില്‍ സേവനമനുഷ്ഠിക്കുമ്പോള്‍ സങ്കീര്‍ണ്ണമായ ക്രമസമാധാന പ്രശ്നങ്ങള്‍ കൈകാര്യം ചെയ്തു.
പോലീസ് ആസ്ഥാനത്ത് എ.ഐ.ജി. (സിവില്‍) ആയിരുന്ന കാലയളവില്‍, സേനയിലെ ആഭ്യന്തര അച്ചടക്കവും വിജിലന്‍സും നിലനിര്‍ത്തുന്നതില്‍ അദ്ദേഹത്തിന് ഉത്തരവാദിത്തമുണ്ടായിരുന്നു. 2025 ഏപ്രില്‍ മുതല്‍ അദ്ദേഹം താഴ്വരയിലെ ഏറ്റവും നിര്‍ണ്ണായകമായ കമാന്‍ഡ് തസ്തികകളിലൊന്നായ എസ്.എസ്.പി. ശ്രീനഗര്‍ ആയി സേവനമനുഷ്ഠിക്കുന്നു. ഡോ. ചക്രവര്‍ത്തിയെ പലപ്പോഴും 'ഓപ്പറേഷന്‍സ് സ്‌പെഷ്യലിസ്റ്റ്' എന്ന് വിളിക്കാറുണ്ട്. സൂക്ഷ്മമായ അടിസ്ഥാനപരമായ പ്രവര്‍ത്തനങ്ങളെ വേഗമേറിയതും കൃത്യവുമായ നിര്‍വ്വഹണവുമായി സമന്വയിപ്പിക്കുന്നതാണ് സമീപനം.
നൗഗാം പോസ്റ്റര്‍ കേസില്‍, അദ്ദേഹം വ്യക്തിപരമായി തെളിവുകള്‍ അവലോകനം ചെയ്യുകയും ചോദ്യം ചെയ്യലുകള്‍ക്ക് മേല്‍നോട്ടം വഹിക്കുകയും വിവിധ സംസ്ഥാനങ്ങളിലെ ടീമുകള്‍ക്ക് നിര്‍ദ്ദേശം നല്‍കുകയും ചെയ്തു. ഈ അന്വേഷണം മൗലവി ഇര്‍ഫാന്‍ അഹമ്മദിന്റെ അറസ്റ്റിലേക്ക് നയിച്ചു, ഇദ്ദേഹത്തെ ചോദ്യം ചെയ്തതിലൂടെ ഒരു മള്‍ട്ടി-സ്റ്റേറ്റ് ജയ്ഷ്-ഇ-മുഹമ്മദ് ശൃംഖലയാണ് തകര്‍ന്നത്.