രാഹുല്‍ മാങ്കൂട്ടത്തിലിനെ അനുകൂലിച്ചുള്ള 'പാപം ചെയ്യാത്തവര്‍ കല്ലെറിയട്ടെ' മുഖപ്രസംഗം; കടുത്ത വിമര്‍ശനവുമായി കോണ്‍ഗ്രസ് നേതാക്കള്‍ എത്തിയതോടെ ജാഗ്രതക്കുറവുണ്ടായി എന്ന് സമ്മതിച്ച് വീക്ഷണം എംഡി; എഡിറ്റോറിയല്‍ ബോര്‍ഡിനോട് വിശദീകരണം തേടിയെന്ന് ജെയ്സണ് ജോസഫ്
ജാഗ്രതക്കുറവുണ്ടായി എന്ന് സമ്മതിച്ച് വീക്ഷണം എംഡി
തിരുവനന്തപുരം: കോണ്‍ഗ്രസിന്റെ മുഖപത്രമായ 'വീക്ഷണ'ത്തില്‍ രാഹുല്‍ മാങ്കൂട്ടത്തിലിനെ അനുകൂലിച്ചും, അദ്ദേഹത്തിനെതിരായ ആരോപണങ്ങളെ രാഷ്ട്രീയ വൈരാഗ്യമായി ചിത്രീകരിച്ചുകൊണ്ടും വന്ന ലേഖനം പാര്‍ട്ടിക്കുള്ളില്‍ വന്‍ പൊട്ടിത്തെറിക്ക് വഴിവെച്ചു. 'പാപം ചെയ്യാത്തവര്‍ കല്ലെറിയട്ടെ' എന്ന തലക്കെട്ടോടെ വന്ന എഡിറ്റോറിയലിനെതിരെ മുന്‍നിര നേതാക്കള്‍ രംഗത്തുവന്നതോടെ, വീക്ഷണം മാനേജിംഗ് ഡയറക്ടര്‍ ജെയ്സണ് ജോസഫ് വിശദീകരണവുമായി എത്തി.
വിഷയം കൈകാര്യം ചെയ്യുന്നതില്‍ ജാഗ്രതക്കുറവ് ഉണ്ടായി എന്ന് എംഡി ജെയ്സണ് ജോസഫ് സമ്മതിച്ചു.'എഡിറ്റോറിയല്‍ ബോര്‍ഡിനോട് വിശദീകരണം തേടിയിട്ടുണ്ട്. ആരാണ് ബോര്‍ഡിന് നിര്‍ദേശം നല്‍കിയതെന്നും, ആരാണ് ലേഖനം എഴുതിയതെന്നും കണ്ടെത്തി അവര്‍ക്കെതിരെ നടപടി എടുക്കും' എന്നും അദ്ദേഹം വ്യക്തമാക്കി.
'വീക്ഷണം' നിലപാടല്ല പാര്‍ട്ടി നിലപാട്
്‌ലേഖനം പുറത്തുവന്നതിന് പിന്നാലെ മുതിര്‍ന്ന കോണ്‍ഗ്രസ് നേതാക്കള്‍ 'വീക്ഷണ'ത്തിന്റെ നിലപാടിനെ തള്ളിക്കളഞ്ഞു. മുഖപ്രസംഗം എഴുതിയ ആളോട് പോയി ചോദിക്കണം. രാഹുല്‍ വിഷയത്തില്‍ നിലപാട് മാറ്റാന്‍ ആര്‍ക്കും അവകാശമില്ല എന്നായിരുന്നു വി ഡി സതീശന്റെ കടുത്ത പ്രതികരണം.
ലേഖനത്തെക്കുറിച്ച് എഴുതിയ ആളോട് ചോദിക്കണം. ഇത് ശബരിമല വിഷയത്തില്‍ നിന്ന് വഴി തിരിച്ച് വിടാനുള്ള ശ്രമമാണെന്ന് രമേശ് ചെന്നിത്തല പറഞ്ഞു. 'വീക്ഷണത്തില്‍ വന്ന എഡിറ്റോറിയല്‍ കോണ്‍ഗ്രസിന്റെ നിലപാട് അല്ല. പാര്‍ട്ടി നിലപാടില്‍ നിന്നും വ്യത്യസ്തമായി പറയാന്‍ പാടില്ലെന്നും കെ. മുരളീധരന്‍ പ്രതികരിച്ചു.
ലേഖനത്തെ തള്ളിപ്പറഞ്ഞതിനൊപ്പം മറ്റ് വിഷയങ്ങളിലേക്ക് കടന്ന് ശക്തമായ വിമര്‍ശനവും ഉന്നയിച്ചു, പാപം ചെയ്യാത്തവര്‍ കല്ലെറിയട്ടെ: എന്ന പ്രയോഗം സിപിഎമ്മിനെയും ബിജെപിയെയും ഉദ്ദേശിച്ചാണ്. സ്വര്‍ണ്ണക്കൊള്ള മറച്ചുവെക്കാന്‍ രാഹുല്‍ വിഷയം ഉയര്‍ത്തിയാല്‍ പ്രതിരോധിക്കും. 'രാഹുലിനെതിരെ പരാതി കൊടുത്ത സ്ത്രീക്ക് മാത്രമല്ല, മുകേഷിനെതിരെ പരാതി കൊടുത്ത സ്ത്രീക്കും മാനം ഉണ്ട്.' സ്ത്രീകളുടെ മാനത്തിന് മേല്‍ ആര് കളിച്ചാലും അത് അംഗീകരിക്കാന്‍ ആകില്ല. തന്റെ നിലപാട് പാര്‍ട്ടി നിലപാടാണ്, അതില്‍ ഉറച്ചുനില്‍ക്കുന്നു, മുരളീധരന്‍ പറഞ്ഞു.
പാപം ചെയ്യാത്തവര്‍ കല്ലെറിയട്ടെ എന്ന തലക്കെട്ടോടെയാണ് വീക്ഷണം മുഖപ്രസംഗം. രാഹുല്‍ മാങ്കൂട്ടത്തില്‍ രാഷ്ട്രീയ ഗൂഢാലോചനയുടെ ഇരയാണ് എന്നാണ് കോണ്‍ഗ്രസ് മുഖപത്രത്തില്‍ പറയുന്നത്. കഴുത്തോളം മാലിന്യത്തില്‍ മുങ്ങിനില്‍ക്കുന്ന സിപിഎം കോണ്‍ഗ്രസിന്റെ കുപ്പായത്തില്‍ തെറിച്ച ചാണകത്തുളളി കണ്ട് മൂക്കുപൊത്തുന്നത് പോലെ രാഹുലിനെ ചൂണ്ടിക്കാട്ടി കോണ്‍ഗ്രസിനെതിരെ സദാചാര പ്രസംഗം നടത്തുകയാണെന്ന് വീക്ഷണം വിമര്‍ശിക്കുന്നു. തെരഞ്ഞെടുപ്പ് അടുക്കുമ്പോള്‍ സിപിഐഎം എതിരാളികള്‍ക്കെതിരെ കൊണ്ടുവരുന്നതാണ് വ്യാജ ലൈംഗിക ആരോപണങ്ങള്‍ എന്നാണ് മുഖപ്രസംഗത്തില്‍ ആരോപിക്കുന്നത്. 1996-ലെ സൂര്യനെല്ലി പീഡനക്കേസ് കോണ്‍ഗ്രസ് നേതാവിനെ ലക്ഷ്യംവെച്ചുളള സിപിഐഎം ഗൂഢാലോചനയായിരുന്നുവെന്നും 2006-ലെയും 2011-ലെയും ഐസ്‌ക്രീം പാര്‍ലര്‍ കേസില്‍ മുസ്ലിം ലീഗിന്റെ ഉന്നത നേതാവിനെ അപവാദത്തിന്റെ ചുഴിയിലേക്ക് തളളിവിട്ട് പൊതുസമൂഹത്തില്‍ തിരസ്‌കൃതനാക്കാന്‍ സിപിഐഎം ശ്രമിച്ചെന്നും വീക്ഷണം ആരോപിക്കുന്നു.
2016-ലെ നിയമസഭാ തെരഞ്ഞെടുപ്പില്‍ അന്നത്തെ ജനകീയനായ മുഖ്യമന്ത്രിയെ കുറ്റാരോപിതനാക്കാന്‍ സിപിഎമ്മും ഒരു വിഭാഗം മാധ്യമങ്ങളും നുണക്കഥകള്‍ മെനഞ്ഞ് അദ്ദേഹത്തെയും കുടുംബത്തെയും വേട്ടയാടിയെന്നും ആ വിഷയത്തിലെ ഇര കൊലക്കേസില്‍ ശിക്ഷിക്കപ്പെട്ട് ജയിലില്‍ തടവ് അനുഭവിക്കുമ്പോള്‍ കുഞ്ഞിന് ജന്മം നല്‍കിയ വിശ്വാസ്യതയില്ലാത്ത സ്ത്രീയായിരുന്നു എന്നുമാണ് മുഖപ്രസംഗത്തിലെ വാദം. 'ആ ഗൂഢാലോചനാ പരമ്പരയിലെ ഇങ്ങേയറ്റത്തെ കണ്ണിയാണ് രാഹുല്‍ മാങ്കൂട്ടത്തില്‍. പാലക്കാട് ഉപതെരഞ്ഞെടുപ്പില്‍ എല്‍ഡിഎഫിനെയും ബിജെപിയെയും ചരിത്ര ഭൂരിപക്ഷത്തില്‍ തോല്‍പ്പിച്ചതായിരുന്നു അദ്ദേഹം ചെയ്ത കുറ്റം. ചെറുപ്പക്കാര്‍ കോണ്‍ഗ്രസില്‍ വളര്‍ന്നുവരുന്നത് സിപിഐഎം ഭീതിയോടെ കാണുന്നു. രാഷ്ട്രീയ സര്‍ഗാത്മകതയും പ്രജ്ഞാശേഷിയുമുളള ചെറുപ്പക്കാര്‍ വളര്‍ന്നുവന്നാല്‍ അത് സിപിഐഎമ്മിനെ ഗോത്രഹത്യയിലേക്ക് എടുത്തെറിയുമെന്ന് അവര്‍ തിരിച്ചറിഞ്ഞിട്ടുണ്ട്' എന്നും വീക്ഷണം മുഖപ്രസംഗത്തില്‍ പറയുന്നുണ്ട്.
നവംബര്‍ 27-നാണ് രാഹുല്‍ മാങ്കൂട്ടത്തിലിനെതിരെ യുവതി മുഖ്യമന്ത്രിക്ക് പരാതി നല്‍കിയത്. സെക്രട്ടറിയേറ്റിലെത്തി മുഖ്യമന്ത്രിയെ നേരില്‍കണ്ടായിരുന്നു പരാതി കൈമാറിയത്. തുടര്‍ന്ന് പൊലീസ് കേസെടുത്ത് അന്വേഷണം ആരംഭിച്ചു. അതിന് പിന്നാലെ കുറ്റം ചെയ്തിട്ടില്ലെന്നുള്ള ബോധ്യമുള്ളിടത്തോളം കാലം നിയമപരമായി തന്നെ പോരാടുമെന്നും നീതിന്യായ കോടതിയിലും ജനങ്ങളുടെ കോടതിയിലും എല്ലാം ബോധ്യപ്പെടുത്തുമെന്നും ഫേസ്ബുക്കില്‍ പോസ്റ്റിട്ട് രാഹുല്‍ ഒളിവില്‍ പോവുകയും ചെയ്തിരുന്നു. തുടര്‍ന്ന് കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചു. യുവതിയുടെ ബലാത്സംഗക്കേസിന് പിന്നാലെ രാഹുല്‍ മാങ്കൂട്ടത്തില്‍ പാലക്കാട്ടെ രഹസ്യ കേന്ദ്രത്തിലേക്ക് മാറിയെന്ന് സൂചന. വെള്ളിയാഴ്ച രാവിലെ കുറച്ചുസമയം മൊബൈല്‍ ഫോണ്‍ ഓണ്‍ ആയിരുന്നു. മുന്‍കൂര്‍ ജാമ്യഹര്‍ജി നല്‍കാന്‍ ഫോണിലൂടെ അഭിഭാഷകനുമായി സംസാരിച്ചു. തുടര്‍ന്ന് മൊബൈല്‍ ഫോണ്‍ ഓഫ് ചെയ്യുകയായിരുന്നു. പാലക്കാട് ജില്ല വിട്ടാല്‍ അത് മുന്‍കൂര്‍ ജാമ്യത്തെ ബാധിക്കുമെന്ന് രാഹുലിന് നിയമോപദേശം ലഭിച്ചെന്നാണ് സൂചന.
രാഹുല്‍ സംസ്ഥാനം വിട്ടെന്നായിരുന്നു വാര്‍ത്തകള്‍ പുറത്തുവന്നിരുന്നത്. എന്നാല്‍ പാലക്കാട് ജില്ലയില്‍ തന്നെ എംഎല്‍എ തുടരുന്നുണ്ട് എന്നതാണ് റിപ്പോര്‍ട്ട്. അതേസമയം, എംഎല്‍എയുടെ ഔദ്യോഗിക വാഹനം താമസിക്കുന്ന ഫ്ലാറ്റിലുണ്ടെന്നാണ് വിവരം. താമസസ്ഥലത്തു നിന്നുമാണ് സുഹൃത്തിന്റെ വാഹനത്തിലേക്ക് മാറിയത്