250 ഓളം വരുന്ന കുടുംബങ്ങള്‍ കുഴുപ്പിള്ളിയിലേയും പള്ളിപ്പുറത്തേയും വില്ലേജുകളിലായി കരമടച്ചു കഴിഞ്ഞു; ഭൂമി പോക്ക് വരവിന് ഹെല്‍പ് ലൈന്‍ തുറക്കും; വഖഫ് ബോര്‍ഡിന്റെ ആസ്തിക്കണക്കില്‍ നിന്ന് വിവാദ ഭൂമി പൂര്‍ണമായും ഒഴിവാക്കുമെന്ന് പ്രതീക്ഷ; മുനമ്പത്തെ പ്രതിഷേധം തീരുമ്പോള്‍
കൊച്ചി: വഖഫ് വിവാദത്തെ തുടര്‍ന്ന് മുനമ്പം നിവാസികള്‍ നാനൂറ് ദിവസത്തിലേറെയായി നടത്തി വന്നിരുന്ന സമരം ഞായറാഴ്ച അവസാനിപ്പിക്കും. സമരം അവസാനിപ്പിക്കാന്‍ വെള്ളിയാഴ്ച രാത്രിയില്‍ ചേര്‍ന്ന സമരസമിതി കോര്‍ കമ്മിറ്റി യോഗത്തിലാണ് തീരുമാനമായത്. വഖഫ് ബോര്‍ഡ് അവകാശവാദം ഉന്നയിച്ച ഭൂമിയിലെ താമസക്കാര്‍ക്ക് വ്യവസ്ഥകളോടെ ഭൂനികുതി അടയ്ക്കാമെന്ന ഹൈക്കോടതി ഉത്തരവിന്റെ പശ്ചാത്തലത്തിലാണ് സമരം അവസാനിപ്പിക്കാന്‍ സമര സമിതി തീരുമാനിച്ചത്.
മുനമ്പം തീരത്ത് താമസിക്കുന്ന ഏകദേശം 250 ഓളം വരുന്ന കുടുംബങ്ങള്‍ കുഴുപ്പിള്ളി, പള്ളിപ്പുറം വില്ലേജുകളിലായി കരമടച്ചു കഴിഞ്ഞു. ഭൂമി പോക്ക് വരവിന് ഹെല്‍പ് ലൈന്‍ തുറക്കാമെന്ന് മന്ത്രി ഉറപ്പ് നല്‍കിയതായി സമരസമിതി അറിയിച്ചു.
മന്ത്രി പി.രാജീവ്, കെ. എന്‍.ഉണ്ണികൃഷ്ണന്‍ എംഎല്‍എ അടക്കമുള്ളവര്‍ ഞായറാഴ്ച ഉച്ചയ്ക്ക് 2.30 ന് സമരപ്പന്തലില്‍ എത്തി സമരം ഇരിക്കുന്നവര്‍ക്ക് നാരങ്ങാനീര് നല്‍കി സമരം അവസാനിപ്പിക്കും. 2024 ഒക്ടോബര്‍ 13 ന് തുടങ്ങിയ മുനമ്പം ഭൂസമരമാണ് 413 ാം ദിവസം പര്യവസാനിക്കുന്നത്. മുനമ്പം ജനതയുടെ റവന്യു അവകാശങ്ങള്‍ പുനഃസ്ഥാപിക്കണമെന്ന് ആവശ്യപ്പെട്ടാണ് സമരം തുടങ്ങിയത്.
ഫാ. ആന്റണി സേവ്യര്‍ തറയില്‍, ജോസഫ് റോക്കി പാലക്കല്‍, ജോസഫ് ബെന്നി കുറുപ്പശേരി, മുരുകന്‍ കാതികുളത്ത്, രഘു കടുവങ്കശേരി, ഉണ്ണി പള്ളത്താംകുളങ്ങര എന്നിവരാണ് കോര്‍ കമ്മിറ്റി യോഗത്തില്‍ പങ്കെടുത്തത്. സ്ഥലം പോക്കുവരവ് ചെയ്യുന്നതിന് തടസ്സമുണ്ടാകില്ലെന്നും ഇതിനായി കുഴുപ്പിള്ളി വില്ലേജില്‍ ഹെല്‍പ്പ് ഡെസ്‌ക് തുറക്കുമെന്നും മന്ത്രി പി. രാജീവില്‍നിന്ന് ഉറപ്പ് ലഭിച്ചിട്ടുണ്ടെന്ന് ഭൂ സംരക്ഷണസമിതി ഭാരവാഹികള്‍ പറഞ്ഞു. ഇതിന്റെകൂടി അടിസ്ഥാനത്തിലാണ് നിരാഹാര സമരം അവസാനിപ്പിക്കാന്‍ തീരുമാനിച്ചത്.
വഖഫ് ബോര്‍ഡ് അവകാശവാദം ഉന്നയിച്ച ഭൂമിയിലെ താമസക്കാര്‍ക്ക് വ്യവസ്ഥകളോടെ ഭൂനികുതി അടയ്ക്കാമെന്ന ഹൈക്കോടതി ഉത്തരവിന്റെ പശ്ചാത്തലത്തിലാണ് സമരം അവസാനിപ്പിക്കാന്‍ സമര സമിതി തീരുമാനിച്ചിരിക്കുന്നത്. വഖഫ് ബോര്‍ഡിന്റെ ആസ്തിക്കണക്കില്‍ നിന്ന് വിവാദ ഭൂമി പൂര്‍ണമായും ഒഴിവാക്കും വരെ സമരം തുടരണമെന്ന ആവശ്യവും ഒരു വിഭാഗം സമരക്കാര്‍ നേരത്തെ ഉന്നയിച്ചിരുന്നെങ്കിലും കോര്‍ കമ്മിറ്റി യോഗത്തില്‍ വിശദമായ കൂടിയാലോചനയ്ക്കുശേഷം സമരം അവസാനിപ്പിക്കാന്‍ തീരുമാനിക്കുകയായിരുന്നു.
മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്നാണ് നിയമമന്ത്രി പി.രാജീവ് അവകാശപ്പെട്ടത്. തദ്ദേശ തെരഞ്ഞെടുപ്പിന്റെ കൂടി പശ്ചാത്തലത്തില്‍ പുതിയ സാഹചര്യത്തിന്റെ രാഷ്ട്രീയ ആനുകൂല്യം കൂടി ലക്ഷ്യമിട്ടാണ് മന്ത്രി പി.രാജീവിന്റെ പ്രസ്താവന. സമര സമിതി കണ്‍വീനര്‍ ജോസഫ് ബെന്നിയെ തദ്ദേശ തെരഞ്ഞെടുപ്പില്‍ യുഡിഎഫ് സ്ഥാനാര്‍ഥിയായി മല്‍സരിപ്പിക്കാനുളള ചര്‍ച്ചകള്‍ കോണ്‍ഗ്രസ് നേതാക്കള്‍ നടത്തിയിരുന്നു. ഇതെല്ലാം വലിയ ചര്‍ച്ചയായി. ഇതിനിടെയാണ് സമരം പിന്‍വലിക്കല്‍.