മുനമ്പം ജനതയെ സംരക്ഷിക്കും; ജനങ്ങള്‍ക്ക് വീടുവിട്ട് ഇറങ്ങിപ്പോകേണ്ടി വരില്ല; കേരള സര്‍ക്കാര്‍ വിഷയത്തില്‍ രാഷ്ട്രീയം കളിക്കുന്നു; വഖഫ് നിയമ ഭേദഗതി പാസാകുന്നതോടെ പ്രതിസന്ധികള്‍ ഇല്ലാതാകും; രാജീവ് ചന്ദ്രശേഖറിനും ഷോണ്‍ ജോര്‍ജ്ജിനും ഉറപ്പുനല്‍കി കേന്ദ്രമന്ത്രി കിരണ്‍ റിജിജു
മുനമ്പത്തിന് നീതി കിട്ടിയിരിക്കുന്നും കേന്ദ്ര ന്യൂനപക്ഷ ക്ഷേമ മന്ത്രി
ന്യൂഡല്‍ഹി: വഖഫ് ഭൂമി പ്രശ്‌നത്തില്‍ മുനമ്പത്തെ ജനങ്ങള്‍ക്ക് വീടുവിട്ട് ഇറങ്ങിപ്പോകേണ്ടി വരില്ലെന്ന് ഉറപ്പുനല്‍കി കേന്ദ്രമന്ത്രി കിരണ്‍ റിജിജു. മുനമ്പത്തെ ജനങ്ങള്‍ക്ക് നീതി കിട്ടിയിരിക്കുന്നും കേന്ദ്ര ന്യൂനപക്ഷ ക്ഷേമ മന്ത്രി പറഞ്ഞു. വിഷയത്തെ കേന്ദ്രം വളരെ ഗൗരവത്തോടെ കാണുന്നുണ്ട്. കേരള സര്‍ക്കാര്‍ വിഷയത്തില്‍ രാഷ്ട്രീയം കളിക്കുകയാണ്. ഒരു വിഭാഗത്തിനെതിരെയുള്ള നീക്കമല്ല ഇതെന്നും നീതി ഉറപ്പാക്കുകയാണ് കേന്ദ്രസര്‍ക്കാര്‍ ലക്ഷ്യമിടുന്നതെന്നും അദ്ദേഹം പറഞ്ഞു. വഖഫ് നിയമ ഭേദഗതി പാസാകുന്നതോടെ ഇത്തരം പ്രതിസന്ധികള്‍ ഇല്ലാതാകുമെന്നും റിജിജു പറഞ്ഞു.
മുനമ്പം ജനതയെ നിയമം വഴി സംരക്ഷിക്കും. പതിറ്റാണ്ടുകളായി അവിടെ ജീവിക്കുന്ന കര്‍ഷകരുടെയും സാധാരണക്കാരുടെയും പാവപ്പെട്ടവരുടെയും അവകാശമാണ് ആ ഭൂമി അവിടെ നിന്നും അവര്‍ക്ക് എങ്ങോട്ടും പോകേണ്ടി വരില്ല. കേന്ദ്ര വഖഫ് ഭേദഗതി നിയമം പാസ്സാകുന്നതോടുകൂടി അവര്‍ക്ക് അവരുടെ ഭൂമി സ്വന്തമായി ലഭിക്കുന്ന സാഹചര്യം ഉണ്ടാകും.
നിയമം വഴി അല്ലാതെ മറ്റൊരു തരത്തിലും ഇത്തരം വിഷയങ്ങള്‍ക്ക് പരിഹാരമുണ്ടാക്കാന്‍ കഴിയില്ല.ഒറ്റപ്പെട്ട സംഭവങ്ങളല്ലയിത് . ഇത് രാജ്യത്തെമ്പാടുമുള്ളതാണ് അതിന് നിയമനിര്‍മ്മാണം ആവശ്യമാണ് ആ നിയമമാണ് സര്‍ക്കാര്‍ കൊണ്ടുവരുന്നത്. വരുന്ന പാര്‍ലിമെന്റ് സമ്മേളനത്തില്‍ ഈ നിയമം പാസ്സാകുമെന്നും അതുവഴി മുനമ്പം ജനത പൂര്‍ണ്ണ സംരക്ഷിതരാകുമെന്നും കേന്ദ്രമന്ത്രി കിരണ്‍ റിജു പറഞ്ഞു.
മുന്‍ കേന്ദ്ര മന്ത്രിയും ബിജെപി നേതാവുമായ രാജീവ് ചന്ദ്രശേഖരന്‍, ബിജെപി സംസ്ഥാന സമിതി അംഗവും മൈനോര്‍റ്റി കോര്‍ഡിനേറ്ററുമായ അഡ്വ ഷോണ്‍ ജോര്‍ജ് എന്നിവരുമായി നടത്തിയ ചര്‍ച്ചയ്ക്ക് ശേഷം ഡല്‍ഹിയില്‍ മാധ്യമ പ്രവര്‍ത്തകരുമായി സംസാരിക്കുകയായിരുന്നു കേന്ദ്രമന്ത്രി.
വിഡി സതീശനുണ്ടായാലും പിണറായി വിജയന്‍ ഉണ്ടായാലും കേന്ദ്രം മുനമ്പത്തിന് നീതി ഉറപ്പാക്കുമെന്ന് രാജീവ് ചന്ദ്രശേഖര്‍ വ്യക്തമാക്കി. ഇത്രയും കാലം കൈവശം വച്ചിരിക്കുന്ന ഭൂമിയില്‍ നിന്ന് ഇറങ്ങാന്‍ ആര്‍ക്ക് പറയാനാകുമെന്നും രാജീവ് ചന്ദ്രശേഖര്‍ ചോദിച്ചു. മുനമ്പം ഭൂപ്രശ്‌നത്തില്‍ കേന്ദ്ര ഇടപെടല്‍ ആവശ്യപ്പെട്ട് കേന്ദ്രമന്ത്രിയെ കണ്ട രാജീവ് ചന്ദ്രശേഖറും ഷോണ്‍ ജോര്‍ജ്ജും നിവേദനം കൈമാറി.
വഖഫ് ബോര്‍ഡിന്റെ അനധികൃത ഭൂമി കൈയ്യേറ്റത്തിന് എതിരെ നല്‍കിയ പരാതികള്‍ പരിഹരിക്കപ്പെടുമെന്ന് കിരണ്‍ റിജിജു നേരത്തെ ഉറപ്പു നല്‍കിയിരുന്നു. സീറോ മലബാര്‍ സഭ, കേരള കാത്തലിക് ബിഷപ്പ് കൗണ്‍സില്‍ തുടങ്ങിയ പ്രമുഖ ക്രിസ്ത്യന്‍ സംഘടനകളാണ് പരാതിയുമായി സംയുക്ത പാര്‍ലമെന്ററി കമ്മിറ്റിയെ സമീപിച്ചത്. സീറോ മലബാര്‍ സഭയും കെസിബിസിയും എക്സില്‍ എഴുതിയ കത്തുകള്‍ പങ്കുവച്ച കിരണ്‍ റിജിജു അവരുടെ പരാതികള്‍ പരിഹരിക്കുമെന്ന് ഉറപ്പുനല്‍കിയിരുന്നു.
എറണാകുളം ജില്ലയില്‍, ചെറായി, മുനമ്പം ഗ്രാമങ്ങളില്‍ തലമുറകളായി ക്രിസ്ത്യന്‍ കുടുംബങ്ങളുടെ ഉടമസ്ഥതയിലുള്ള നിരവധി സ്വത്തുക്കള്‍ക്ക് വഖഫ് ബോര്‍ഡ് നിയമവിരുദ്ധമായി അവകാശവാദമുന്നയിച്ചിരിക്കുകയാണ്. അറുനൂറോളം കുടുംബങ്ങള്‍ ഭീഷണിയിലാണ്. ഈ ആളുകള്‍ ദരിദ്രരായ മത്സ്യത്തൊഴിലാളി സമൂഹത്തില്‍ പെട്ടവരാണ്. ഒരു കത്തോലിക്ക ഇടവക പള്ളിയും കോണ്‍വെന്റും ഡിസ്‌പെന്‍സറിയും വഖഫ് ബോര്‍ഡിന്റെ ഒഴിപ്പിക്കല്‍ ഭീഷണിയിലാണ്.
സെപ്തംബര്‍ 10ന് സീറോ മലബാര്‍ പബ്ലിക് അഫയേഴ്സ് കമ്മീഷന്‍ ചെയര്‍മാന്‍ ആര്‍ച്ച് ബിഷപ്പ് ആന്‍ഡ്രൂസ് താഴത്ത് ജെപിസിക്ക് അയച്ച കത്തില്‍ എറണാകുളം ജില്ലയില്‍ തലമുറകളായി ക്രിസ്ത്യന്‍ കുടുംബങ്ങളുടെ ഉടമസ്ഥതയിലുള്ള നിരവധി സ്വത്തുക്കള്‍ വഖഫ് നിയമവിരുദ്ധമായി കൈവശം വച്ചിരിക്കുകയാണെന്ന് വ്യക്തമാക്കിയിരുന്നു. അറുനൂറോളം കുടുംബങ്ങള്‍ സ്വത്തുക്കള്‍ നഷ്ടപ്പെടുമെന്ന ഭീഷണിയിലാണെന്ന് ആര്‍ച്ച് ബിഷപ്പ് കത്തില്‍ പറഞ്ഞു.
മത്സ്യത്തൊഴിലാളികളുടെ കിടപ്പാടം അടക്കമുള്ള 405 ഏക്കറോളം വരുന്ന ഭൂമിയിലാണ് വഖഫ് അവകാശവാദം ഉന്നയിച്ചിരിക്കുന്നത്. 1902-ല്‍ തിരുവിതാംകൂര്‍ രാജാവ് അബ്ദുള്‍ സത്താര്‍ സേഠിന് നല്‍കുകയും പിന്നീട് ഭൂമി ലഭിച്ച കോഴിക്കോട് ഫാറൂഖ് കോളേജ് മാനേജ്മെന്റ് ഇവിടെ താമസിച്ചിരുന്ന മത്സ്യത്തൊഴിലാളികള്‍ക്ക് ഭൂമി വില്‍ക്കുകയായിരുന്നു. വിലയാധാരം ലഭിച്ച ഭൂമിക്ക് 610 കുടുംബങ്ങളും കരമടച്ച് വരുന്നതിനിടയിലാണ് 2019-ല്‍ വഖഫ് ബോര്‍ഡിന്റെ ആസ്തി വിവരത്തില്‍ ഈ ഭൂമിയും ഉള്‍പ്പെടുത്തിയത്.
പിന്നാലെ കേരള വഖഫ് സംരക്ഷണ വേദിയുടെ പേരില്‍ ഹൈക്കോടതിയെ സമീപിച്ച് പോക്കുവരവ് ഉത്തരവും തടഞ്ഞു. പോക്കുവരവ് ചെയ്യുന്നത് ഹൈക്കോടതി തടഞ്ഞതോടെ പണം കൊടുത്ത് നിയമാനുസൃതം വാങ്ങിയ ഭൂമിയില്‍ നിര്‍മ്മാണങ്ങള്‍ നടത്താനോ, ഇതു വച്ച് ബാങ്കില്‍ നിന്ന് ലോണെടുക്കാനോ കഴിയാതെ ബുദ്ധിമുട്ടുകയാണ് വൈപ്പിന്‍ വേളാങ്കണ്ണി കടപ്പുറത്തെ ജനങ്ങള്‍.
മുനമ്പത്തെ കണ്ണീര്‍
തിരുവിതാംകൂര്‍ മഹാരാജാവ് 1902 ല്‍ കൊച്ചിയിലെത്തിയ ഗുജറാത്തുകാരനായ അബ്ദുല്‍ സത്താര്‍ സേട്ടിന് മുനമ്പം വേളാങ്കണ്ണി കടപ്പുറത്തിന് ചുറ്റുവട്ടത്തെ 406 ഏക്കര്‍ ഭൂമി പാട്ടത്തിന് കൊടുത്തു. 1948 ആയപ്പോഴേക്കും സത്താര്‍ സേട്ടിന്റെ പിന്‍ഗാമിയായ സിദ്ധീഖ് സേട്ടിന്റെ പേരില്‍ ആ ഭൂമി മഹാരാജാവ് തീറാധാരം ചെയ്തു. 1948 ഓഗസ്റ്റ് 12ന് കോഴിക്കോട്ടെ ഫറൂഖ് കോളേജിന് മുനമ്പത്തെ ഭൂമി സിദ്ദീഖ് സേട്ട് വഖഫ് ചെയ്തു. 1950 നവംബര്‍ 1ന് എടപ്പള്ളി സബ് രജിസ്റ്റാര്‍ ഓഫീസില്‍ വെച്ച് നടപടിക്രമങ്ങള്‍ പൂര്‍ത്തിയാക്കി. ഫറൂഖ് കോളേജ് മാനേജ്മെന്റ് ഈ ഭൂമിയിലേക്ക് തിരിഞ്ഞ് നോക്കിയില്ലെന്നും പിന്നീട് ഇവിടെ മത്സ്യത്തൊഴിലാളികള്‍ ഭൂമി കൈയ്യേറി വീട് വച്ചുവെന്നുമാണ് ആരോപണം. വിഎസ് അച്യുതാനന്ദന്‍ സര്‍ക്കാര്‍ 2007 ല്‍ നിയോഗിച്ച ജസ്റ്റിസ് എം.എ.നിസാര്‍ കമ്മീഷന്റെ റിപ്പോര്‍ട്ടില്‍ 23 സ്ഥലങ്ങളിലായി 600 ഏക്കര്‍ വഖഫ് സ്വത്തുകള്‍ അന്യാധീനപ്പെട്ടുവെന്ന് കണ്ടെത്തി. ഏറ്റവും കൂടുതല്‍ കയ്യേറ്റം കണ്ടെത്തിയത് മുനമ്പത്താണ്. 407 ഏക്കറില്‍ 188 ഏക്കര്‍ വില്‍പ്പന നടത്തിയെന്നായിരുന്നു റിപ്പോര്‍ട്ട്. 2010ല്‍ വി.എസ് സര്‍ക്കാരിന്റെ കാലത്ത് തുടര്‍ നടപടികള്‍ക്ക് നിര്‍ദേശം നല്‍കിയിരുന്നു.