മന്ത്രി പി രാജീവ് നല്‍കിയ ഉറപ്പില്‍ സമരം അവസാനിപ്പിക്കാന്‍ മുനമ്പം ഭൂ സംരക്ഷണസമിതി; റവന്യൂ അവകാശങ്ങള്‍ പുനഃസ്ഥാപിക്കും വരെ പ്രക്ഷോഭം തുടരുമെന്ന് ഒരു വിഭാഗം; ലഭിച്ചത് കരമടക്കാനുള്ള അനുമതി മാത്രം; ക്രയവിക്രയ സ്വാതന്ത്ര്യമില്ല; സര്‍ക്കാറിന്റെ തെരഞ്ഞെടുപ്പു തന്ത്രത്തിന് വഴങ്ങരുതെന്ന് ഒരു വിഭാഗം; വഖഫ് ബോര്‍ഡിന്റെ ആസ്തി പട്ടികയില്‍ നിന്നും ഭൂമി മാറ്റപ്പെടും വരെ സമരം തുടരും
മന്ത്രി പി രാജീവ് നല്‍കിയ ഉറപ്പില്‍ സമരം അവസാനിപ്പിക്കാന്‍ മുനമ്പം ഭൂ സംരക്ഷണസമിതി
കൊച്ചി: മുനമ്പത്തെ ഭൂസമരം തല്‍ക്കാലികമായി അവസാനിപ്പിക്കുന്നതില്‍ സമര സമിതിയില്‍ ഭിന്നത. നാളെ ഭൂസംരക്ഷണ സമിതി സമരം അവസാനിക്കുമ്പോള്‍ ഒരു വിഭാഗം സമരം തുടരുമെന്ന് പ്രഖ്യാപിച്ചു. മന്ത്രി പി രാജീവിന്റെ ഉറപ്പില്‍ സമരം അവസാനിപ്പിക്കാന്‍ ഒരു വിഭാഗം തീരുമാനിച്ചതിലാണ് മറുവിഭാഗം എതിര്‍പ്പുയര്‍ത്തി രംഗത്തുവന്നത്. വഖഫ് പരിധിയില്‍ നിന്ന് ഭൂമി ഒഴിവാക്കും വരെ സമരം തുടരുമെന്നാണ് ഇവര്‍ അറിയിച്ചിരിക്കുന്നത്.
സര്‍ക്കാരിന്റെ ഉറപ്പ് വിശ്വസിച്ചാണ് സമരം നിര്‍ത്തുന്നതെന്ന് മുനമ്പം വെള്ളാങ്കണ്ണി പള്ളി സഹവികാരി മോന്‍സി വര്‍ഗീസ് വ്യക്തമാക്കി. ഭൂ സംരക്ഷണസമിതി കോര്‍ ഗ്രൂപ്പ് യോഗത്തില്‍ ഫാ. ആന്റണി സേവ്യര്‍ തറയില്‍, ജോസഫ് റോക്കി പാലക്കല്‍, ജോസഫ് ബെന്നി കുറുപ്പശേരി, മുരുകന്‍ കാതികുളത്ത്, രഘു കടുവങ്കശ്ശേരി, ഉണ്ണി പള്ളത്താംകുളങ്ങര എന്നിവര്‍ പങ്കെടുത്തിരുന്നു. ഇതിന് ശേഷമാണ് സമരം അവസാനിപ്പിക്കാന്‍ ഒരുങ്ങുന്നത്.
എന്നാല്‍, സമരം അവസാനിപ്പിക്കാനുള്ള തീരുമാനം ചിലരുടെ മാത്രം അജണ്ടയാണെന്ന് ഒരു വിഭാഗം പറയുന്നു. 610 കുടുംബങ്ങളുടെ അതിജീവനത്തിനായുള്ള പോരാട്ടം തുടരുമെന്നും, നിരവധി ആള്‍ക്കാരുടെ പിന്തുണ തങ്ങള്‍ക്കുണ്ടെന്നും പ്രഖ്യാപിച്ചു. നാളെ ഉച്ചയ്ക്ക് 2 മണിക്ക് പുതിയ നേതൃത്വത്തില്‍ നിലവിലെ സമരപന്തലിന് സമീപത്തായി പുതിയ സമരം ആരംഭിക്കുമെന്നും ഇവര്‍ വ്യക്തമാക്കി.
സമരം അവസാനിപ്പിച്ചത് ജനങ്ങളോടുള്ള വലിയ ചതിയാണ്. നിലവില്‍ കോടതി ഉത്തരവിലൂടെ കരമടക്കാനുള്ള അനുമതി മാത്രമാണ് ലഭിച്ചിട്ടുള്ളത്. പോക്കുവരവ് (ക്രയവിക്രയ സ്വാതന്ത്ര്യം) ലഭിച്ചിട്ടില്ല. 'ഭൂമി വിറ്റാലല്ലേ പോക്കുവരവിന്റെ ആവശ്യമുള്ളൂ? ഇവിടെ ക്രയവിക്രയ സ്വാതന്ത്ര്യമില്ല. ആകെ കരമടക്കാനുള്ള കാര്യം മാത്രം സര്‍ക്കാര്‍ തന്നിട്ടുള്ളൂ,' സമരക്കാരില്‍ ഒരു വിഭാഗം പ്രതികരിച്ചു. ക്രയവിക്രയ അവകാശം ലഭിക്കുംവരെ പിന്നോട്ടില്ലെന്നും ഇവര്‍ കൂട്ടിച്ചേര്‍ത്തു.
മുനമ്പത്തെ ഭൂമി വഖഫ് ബോര്‍ഡിന്റെ ആസ്തി പട്ടികയില്‍ നിന്നും മാറ്റപ്പെടും വരെ സമരം തുടരുമെന്നാണ് പുതുതായി സമരത്തിന് ഒരുങ്ങുന്നവര്‍ വ്യക്തമാക്കുന്നത്. ഭൂസംരക്ഷണ സമിതിയുടെ മുന്‍ കണ്‍വീനര്‍ക്കെതിരെ ഗുരുതരമായ ആരോപണങ്ങളാണ് ഒരു വിഭാഗം ഉയര്‍ത്തുന്നത്. കണ്‍വീനര്‍ ഒരു വധശ്രമക്കേസിലെ പ്രതിയാണെന്നും, സമരത്തെ വ്യക്തിപരമായ രാഷ്ട്രീയ ലക്ഷ്യങ്ങള്‍ക്കായി ഉപയോഗിക്കുകയാണെന്നും അവര്‍ ആരോപിച്ചു. കണ്‍വീനര്‍ സ്ഥാനാര്‍ത്ഥിയായി വന്നതോടെയാണ് സമിതിയില്‍ നിന്ന് മാറിനിന്നതെന്നും, ഇന്ന് ഭൂസംരക്ഷണ സമിതി ചെയ്തിരിക്കുന്നത് ഒരു വലിയ ചതിയാണെന്നും ഒരു വിഭാഗം നേതാക്കള്‍ തുറന്നടിച്ചു.
സമരം അവസാനിപ്പിക്കാനുള്ള ഭൂസംരക്ഷണ സമിതിയുടെ തീരുമാനത്തിനെതിരെ വൈദികരടക്കം നിരവധി പേര്‍ പിന്തുണ അറിയിച്ചതായും പുതുതായി സമരത്തിന് ഒരുങ്ങുന്നവര്‍ അറിയിച്ചു. 610 കുടുംബങ്ങളുടെ കാര്യങ്ങള്‍ ശരിയാകാതെ എങ്ങനെയാണ് സമരത്തില്‍ നിന്ന് പിന്മാറുന്നതെന്ന ചോദ്യമാണ് തങ്ങളെ മുന്നോട്ട് നയിക്കുന്നതെന്നും ഇവര്‍ വ്യക്തമാക്കി. നിലവിലെ ഭൂസംരക്ഷണ സമിതിയിലെ അഞ്ചു പേര്‍ ചേര്‍ന്നാണ് 610 കുടുംബങ്ങളുടെ കാര്യം തീരുമാനിക്കുന്നതെന്നും, ഇത് അംഗീകരിക്കാനാവില്ലെന്നും പ്രതിഷേധക്കാര്‍ പറയുന്നു.
തങ്ങളുടെ വീടിന്റെ കാര്യം തീരുമാനിക്കാന്‍ ഇവര്‍ക്ക് അവകാശമില്ലെന്നും, നാളെ ഉച്ചയ്ക്ക് 2 മണിക്ക് തങ്ങള്‍ വീണ്ടും സമരം ആരംഭിക്കുമെന്നും അവര്‍ വ്യക്തമാക്കി. ഒരു ദിവസം മുമ്പാണ് കഴിഞ്ഞ ദിവസമാണ് മുനമ്പത്ത് താമസിക്കുന്നവരുടെ ഭൂനികുതി സ്വീകരിക്കാന്‍ സംസ്ഥാന സര്‍ക്കാരിന് ഹൈക്കോടതി അനുമതി നല്‍കിയത്.
തത്കാലത്തേക്ക് കരം അടയ്ക്കാന്‍ അനുമതി ലഭിച്ച സാഹചര്യത്തിലാണ് ഭൂ സംരക്ഷണസമിതി കോര്‍ ഗ്രൂപ്പ് യോഗം ചേര്‍ന്ന് സമരം അവസാനിപ്പിക്കാന്‍ തീരുമാനിച്ചത്. സ്ഥലം പോക്കുവരവ് ചെയ്യുന്നതിന് തടസ്സമുണ്ടാകില്ലെന്നും ഇതിനായി കുഴുപ്പിള്ളി വില്ലേജില്‍ ഹെല്‍പ്പ് ഡെസ്‌ക് തുറക്കുമെന്നും മന്ത്രി പി. രാജീവില്‍നിന്ന് ഉറപ്പ് ലഭിച്ചിട്ടുണ്ടെന്ന് ഭൂ സംരക്ഷണസമിതി ഭാരവാഹികള്‍ അവകാശപ്പെടുന്നു. നിയമമന്ത്രി പി. രാജീവ്, വൈപ്പിന്‍ എംഎല്‍എ കെ.എന്‍. ഉണ്ണികൃഷ്ണന്‍ തുടങ്ങിയവര്‍ ഞായറാഴ്ച 2.30-ന് സമരപ്പന്തലില്‍ എത്തുകയും സമര സേനാനികള്‍ക്ക് നാരങ്ങാനീര് നല്‍കി സമരം അവസാനിപ്പിക്കുകയും ചെയ്യും.