ടാര്‍ഗറ്റ് അച്ചീവ് ചെയ്യാത്തവരെ കഴുത്തില്‍ ബെല്‍റ്റിട്ട് നടത്തിച്ചത് സമൂഹത്തിന് അപമാനകരം; കേരളത്തില്‍ സംഭവിക്കുമെന്ന് ഒരിക്കലും ചിന്തിച്ചില്ല; കുറ്റവാളികള്‍ മാതൃകാപരമായി ശിക്ഷിക്കപ്പെടണം; നമുക്ക് ആഗോളവല്‍ക്കരണത്തിന്റെ നല്ല മാതൃകകള്‍ മതിയെന്ന് മുരളി തുമ്മാരുകുടി
ടാര്‍ഗറ്റ് അച്ചീവ് ചെയ്യാത്തവരെ കഴുത്തില്‍ ബെല്‍റ്റിട്ട് നടത്തിച്ചത് സമൂഹത്തിന് അപമാനകരം
കോഴിക്കോട്: കൊച്ചിയില്‍ സ്വകാര്യ മാര്‍ക്കറ്റിങ് കമ്പനിയില്‍ ടാര്‍ഗറ്റ് അച്ചീവ് ചെയ്യാത്ത ജോലിക്കാരെ ക്രൂരപീഡനത്തിന് ഇരയാക്കിയ സംഭവത്ിതല്‍ തൊഴില്‍ വകുപ്പ് അധികൃതര്‍ നടപടി തുടങ്ങിയിട്ടുണ്ട്. കേരളത്തെ ഞെട്ടിച്ച സംഭവമാണ് നടന്നത്. ആധുനിക അടിമത്തം കേരളത്തിലും കൊടികുത്തി വാഴുന്നോ എന്ന ചോദ്യമാണ് ഇതോടെ ഉയര്‍ന്നിരിക്കുന്നത്. ഇതിനിടെ വിഷയത്തില്‍ പ്രതികരണവുമായി രംഗത്തുവന്നിരിക്കയാണ് മുരളീ തുമ്മാരുകുടി.
കേരളത്തില്‍ ഇരുപത്തിയൊന്നാം നൂറ്റാണ്ടില്‍ ഇത്തരം കാര്യങ്ങള്‍ സംഭവിക്കുമെന്ന് ഒരിക്കലും ചിന്തിച്ചിരുന്നില്ലെന്ന് തുമ്മാരുകുടി ഫേസ്ബുക്കില്‍ കുറിച്ചു. സ്വാതന്ത്ര്യ സമരസേനാനികള്‍ ഉണ്ടായിരുന്ന, എല്ലാ തലത്തിലും രാഷ്ട്രീയം എത്തിയിട്ടുള്ള വെങ്ങോലയില്‍ എങ്ങനെയാണ് ആധുനിക സമൂഹത്തിന് അപമാനമായ ഇത്തരം കാര്യം സംഭവിച്ചത്. കുറ്റവാളികള്‍ മാതൃകാപരമായി ശിക്ഷിക്കപ്പെടണമെന്നും നമുക്ക് ആഗോളവല്‍ക്കരണത്തിന്റെ നല്ല മാതൃകകള്‍ മതിയെന്നും എഫ്.ബി പോസ്റ്റില്‍ മുരളി തുമ്മാരുകുടി വ്യക്തമാക്കി.
മുരളി തുമ്മാരുകുടി ഫേസ് ബുക്ക് പോസ്റ്റ്:
ആഗോളവല്‍ക്കരണം വെങ്ങോലയില്‍ എത്തുമ്പോള്‍ ഓരോ തവണയും നാട്ടില്‍ എത്തുമ്പോള്‍ കാണുന്ന ഒരു കാഴ്ചയുണ്ട്. ഒരു ബാഗ് നിറയെ വില്‍പ്പന സാധനങ്ങളുമായി ഒരു ചെറുപ്പക്കാരനോ ചെറുപ്പക്കാരിയോ വീട്ടില്‍ വരുന്നു. 'എന്തെങ്കിലും എടുക്കണം സാര്‍' എന്നു പറഞ്ഞു നിര്‍ബന്ധിക്കലായി. പരിശീലനമാണ്, കഷ്ടപ്പാടാണ്, ടാര്‍ഗറ്റ് മീറ്റ് ചെയ്യേണ്ട ദിവസമാണ് എന്നിങ്ങനെ പലതുമാകും കഥ.
പലപ്പോഴും ആവശ്യമില്ലെങ്കിലും വാങ്ങിപ്പോകും. ഇത്തവണ വന്ന പെണ്‍കുട്ടി കരച്ചില്‍ തുടങ്ങി. എത്ര പറഞ്ഞിട്ടും പോകുന്നില്ല. എന്തായിരിക്കണം അതിന് കാരണം എന്നു ചിന്തിച്ചിരുന്നു. വ്യക്തിപരമായ സാമ്പത്തിക പ്രശ്‌നമായിരിക്കും എന്നാണ് ചിന്തിച്ചത്. ഇന്നിപ്പോള്‍ ഈ വാര്‍ത്ത വരുന്നത് എന്റെ ഗ്രാമത്തില്‍ നിന്നാണ്. സെയില്‍സ് ടാര്‍ഗറ്റ് മീറ്റ് ചെയ്യാത്തവരെ മനുഷ്യത്യ രഹിതമായി കൈകാര്യം ചെയ്യുന്നു.
ആ പെണ്‍കുട്ടിയും ടാര്‍ഗറ്റ് മീറ്റ് ചെയ്തില്ലെങ്കില്‍ അക്രമിക്കുന്ന സംവിധാത്തിന്റെ ഇരയായിരിക്കുമോ? അഞ്ചു വര്‍ഷം മുന്‍പ് ഇത്തരം വാര്‍ത്ത ചൈനയില്‍ നിന്നും വന്നിരുന്നു. ഇത് കേരളത്തില്‍ ഇരുപത്തി ഒന്നാം നൂറ്റാണ്ടില്‍ സംഭവിക്കുമെന്ന് ഒരിക്കലും ചിന്തിച്ചിരുന്നില്ല. അതും എന്റെ ഗ്രാമത്തില്‍ വിശ്വസിക്കാന്‍ പറ്റുന്നില്ല.
സ്വാതന്ത്ര്യ സമരസേനാനികള്‍ ഒക്കെ ഉണ്ടായിരുന്ന പ്രദേശമാണ്. രാഷ്ട്രീയം ഒക്കെ എല്ലാ തലത്തിലും എത്തിയിട്ടുള്ള സ്ഥലമാണ്. റോഡില്‍ വണ്ടിയോടിക്കുമ്പോള്‍ പോലും കച്ചറ കാണിച്ചാല്‍ നാട്ടുകാര്‍ ഉട'നടി' ഇടപെടുന്ന സ്ഥലമാണ്. ഇവിടെ എങ്ങനെയാണ് ആധുനിക സമൂഹത്തിന് അപമാനമായ ഇത്തരം കാര്യം സംഭവിച്ചത്?
കൂടുതല്‍ വിവരങ്ങള്‍ അന്വേഷിക്കുന്നുണ്ട്. പക്ഷെ ഈ കാര്യം അന്വേഷിക്കണം. കുറ്റവാളികള്‍ മാതൃകാപരമായി ശിക്ഷിക്കപ്പെടണം നമുക്ക് ആഗോളവല്‍ക്കരണത്തിന്റെ നല്ല മാതൃകകള്‍ മതി!
കൊച്ചിയില്‍ സ്വകാര്യ മാര്‍ക്കറ്റിങ് കമ്പനിയില്‍ ടാര്‍ഗറ്റ് അച്ചീവ് ചെയ്യാത്ത ജോലിക്കാരെ ക്രൂരപീഡനത്തിന് ഇരയാക്കിയെന്നാണ് ആരോപണം. കമ്പനി ചെറുപ്പക്കാരുടെ കഴുത്തില്‍ ബെല്‍റ്റിട്ട് പട്ടിയെപ്പോലെ നടത്തിക്കുന്ന ദൃശ്യങ്ങളാണ് പുറത്ത് വന്നത്.
കഴിഞ്ഞ സെപ്റ്റംബറില്‍ നടന്ന സംഭവത്തിന്റെ ദൃശ്യങ്ങളാണ് ഇപ്പോള്‍ പ്രചരിക്കുന്നതെന്ന് സ്ഥാപനത്തില്‍ മുമ്പ് ജോലി ചെയ്തിരുന്നതായി അവകാശപ്പെടുന്ന യുവാവ് വെളിപ്പെടുത്തി. സംഭവം എങ്ങനെ എവിടെ നടന്നുവെന്ന് ആര്‍ക്കും അറിയില്ല. ആരും പൊലീസില്‍ പരാതിയും നല്‍കിയിട്ടില്ല. പീഢനനമേറ്റവരെയും കണ്ടെത്തനായില്ല.
വിഡിയോ ചര്‍ച്ചയായതോടെ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ എറണാകുളം ലേബര്‍ ഓഫീസര്‍ക്ക് തൊഴില്‍ മന്ത്രി വി. ശിവന്‍കുട്ടി നിര്‍ദേശം നല്‍കി. ഇത്തരം നടപടികള്‍ ഒരു കാരണവശാലും അനുവദിക്കാന്‍ സാധിക്കില്ല.
വിഷയം വളരെ ഗൗരവകരമായിട്ടാണ് സര്‍ക്കാര്‍ കാണുന്നത്. സ്ഥാപനത്തിന്റെ പ്രവര്‍ത്തികള്‍ സംബന്ധിച്ച് സമഗ്രമായ റിപ്പോര്‍ട്ട് തേടുമെന്നും മന്ത്രി വ്യക്തമാക്കി. സംഭവത്തില്‍ യുവജന കമീഷനും കേസെടുത്തു.