വലുപ്പം കൂടിയ ഇനമാണെങ്കിൽ ഉറപ്പായിട്ടും ഒരാൾ കൂടി വേണം; വാലിൽ പിടിച്ച് എടുക്കുന്നത് ഒരിക്കലും സേഫല്ല; പല കാച്ചർമാരും ഭാഗ്യം കൊണ്ടാണ് രക്ഷപ്പെടുന്നത്; അതിഥിയെ കാണുമ്പോഴുള്ള ആ നാടൻ രീതി ഒഴുവാക്കണം; അശാസ്ത്രീയമായ പാമ്പ് പിടിത്ത രീതിയെ കുറിച്ച് മുരളി തുമ്മാരുകുടി പറയുന്നത്!

തിരുവനന്തപുരം: വേനൽക്കാലം ആകുമ്പോൾ നാട്ടിൻപുറങ്ങളിൽ സാധാരണമായി കാണുന്നതാണ് വിഷപ്പാമ്പുകൾ ജനവാസമേഖലയിൽ ഇറങ്ങുന്നത്. ചപ്പുകൾക്ക് ഇടയിലും മതിലിനോട് ചേർന്ന് ധ്വരങ്ങളിലും ഇവയെ കാണാൻ സാധിക്കും. അതിൽ മനുഷ്യരുടെ കണ്ണിൽപ്പെടുമ്പോൾ ആണ് പാമ്പ് പിടിത്തക്കാരെ നമ്മൾ ആശ്രയിക്കുന്നത്. പക്ഷെ അടുത്ത കാലത്ത് പാമ്പ് ജനവാസ മേഖലങ്ങളിൽ ഇറങ്ങുന്നത് വര്‍ധിച്ചുവരുന്നതായാണ് റിപ്പോർട്ടുകൾ.

ഇത്തരത്തിൽ വീടുകളിലും വീടിനോട്ട ചേര്‍ന്നുള്ള പുരയിടങ്ങളിലും കാണുന്ന പാമ്പുകലെ രക്ഷപ്പെടുത്തി കാട്ടിൽ വിടുന്നത് വനംവകുപ്പ് ഉദ്യോഗസ്ഥരാണ്. എന്നാൽ പലപ്പോഴും പാമ്പ് റെസ്ക്യൂവര്‍മാര്‍ക്ക് ആവശ്യമായ സുരക്ഷാ സംവിധാനങ്ങൾ ഇല്ലാത്തത് വലിയ അപകടസാധ്യത ഉയര്‍ത്താറുമുണ്ട്. പക്ഷെ തീര്‍ത്തും അശാസ്ത്രീയമായ മറ്റൊരു ശീലത്തെ കുറിച്ച് സംസാരിക്കുകയാണ് ദുരന്ത നിവാരണ വിദഗ്ധനായ മുരളി തുമ്മാരുകൂടി. പാമ്പിനെ പിടികൂടുമ്പോൾ ചുറ്റം കാഴ്ചക്കാരായി നാട് മുഴുവൻ എത്തുന്ന രീതി തീര്‍ത്തും അപകടം വിളിച്ചുവരുത്തുന്നതിന് തുല്യമാണെന്ന് അദ്ദേഹം ഫേസ്ബുക്കിൽ പങ്കുവച്ച കുറിപ്പിൽ വ്യക്തമാക്കുന്നു.

അദ്ദേഹത്തിന്റെ കുറിപ്പ് വായിക്കാം..

ഒരു പാമ്പിനെ പിടിക്കാൻ എത്ര ആൾക്കാർ വേണം? സാധാരണ ഗതിയിൽ രണ്ടാളുകൾ. ഒരാൾ "സ്പോട്ടർ" പാമ്പിൽ നിന്നും അല്പം സുരക്ഷിതമായ ഭൂരത്തിൽ എന്നാൽ പാമ്പിരിക്കുന്ന സ്ഥലം കൃത്യമായി കാണാവുന്ന തരത്തിലായിരിക്കണം സ്പോട്ടർ. പാമ്പുകടിക്കുള്ള പ്രഥമ ശുശ്രൂഷയിൽ പരിശീലനം ലഭിച്ച ആളുമായിരിക്കണം. പ്രഥമ ശുശ്രൂഷ കിറ്റ് അടുത്ത് വേണം. പാമ്പ് പിടിക്കുന്ന ആളുടെ സുരക്ഷ ഉറപ്പാക്കുക എന്നതാണ് ഇദ്ദേഹത്തിന്റെ ജോലി. രണ്ടാമത്തേത് 'കാച്ചർ'. പാമ്പിൽ നിന്നും കടിയേൽക്കാതിരിക്കാനുള്ള വ്യക്തിസുരക്ഷാ ഉപകരണങ്ങൾ ധരിച്ചിരിക്കണം. പാമ്പിനെ പിടിക്കാനുള്ള കൃത്യമായ ഉപകരണങ്ങൾ കയ്യിൽ വേണം. പിടിക്കുന്ന പാമ്പിനെ സുരക്ഷിതമായി കൊണ്ടുപോകാനുള്ള സംവിധാനങ്ങൾ ഉണ്ടായിരിക്കണം. സ്വന്തം സുരക്ഷ ഉറപ്പാക്കി, പരമാവധി സുരക്ഷിതമായി പാമ്പിനെ പിടിക്കുക എന്നതാണ് കാച്ചറുടെ ഉത്തരവാദിത്തം.

വലുപ്പം കൂടിയ പാമ്പാണെങ്കിലും തെളിഞ്ഞ പ്രദേശമല്ലെങ്കിലും വെളിച്ചം കുറവാണെങ്കിലും ഒരു സഹായി കൂടി ആകാം. സഹായിയും കാച്ചറുടെ തുല്യമായ പരിശീലനം നേടിയ ആളാകണം. വ്യക്തിസുരക്ഷാ ഉപകരണങ്ങൾ അയാളും ധരിച്ചിരിക്കണം. ഇതിനപ്പുറം പാമ്പുപിടിക്കുന്ന സ്ഥലത്ത് നിൽക്കുന്ന ഓരോരുത്തരും അവർക്ക് അപകടമുണ്ടാക്കുകയാണ് ചെയ്യുന്നത്. കാച്ചറും സ്പോട്ടറും തമ്മിലുള്ള കമ്യൂണിക്കേഷൻ ബുദ്ധിമുട്ടിലാക്കുന്നു. പാമ്പുപിടിക്കുന്ന ആളുടെ ജോലി കൂടുതൽ പ്രയാസമാക്കുന്നു. മൊത്തത്തിൽ അപകടസാധ്യത കൂട്ടുന്നു. ഇതൊക്കെയാണ് ആഗോളമായ രീതി.

എന്നാൽ നമുക്ക് ഒരു നാടൻ രീതിയുണ്ട്. പാമ്പുപിടിക്കാൻ ആളെത്തിയാലുടൻ ആ പഞ്ചായത്തിലെ ആബാലവൃദ്ധം ജനങ്ങളും ഹാജർ, സ്ത്രീ പുരുഷ വ്യത്യാസമില്ലാതെ. സ്ഥലത്തില്ലാത്തവർക്ക് വേണ്ടി വീഡിയോ എടുക്കാൻ മൊബൈലുള്ളവരെല്ലാം റെഡി. പാമ്പിനെ പിടിക്കുന്നവർക്ക് നിർദ്ദേശം നൽകാൻ ഒന്നല്ല ഒരു ഡസൻ പരസഹായ സ്പോട്ടർമാർ. ഇന്നു കണ്ട വീഡിയോയിൽ പാമ്പിനും നിർദ്ദേശം നൽകുന്നുണ്ട്, "ഒന്നു കേറടാ ചക്കരേ."കേരളത്തിൽ പാമ്പിനെ പിടിക്കുന്ന ഒരാൾ പോലും പൂർണ്ണമായി വ്യക്തിസുരക്ഷാ ഉപകരണങ്ങൾ ഉപയോഗിച്ചുകണ്ടിട്ടില്ല. അതവർക്ക് അറിയാത്തത് കൊണ്ടാണോ ഇല്ലാത്തത് കൊണ്ടാണോ എന്നെനിക്കറിയില്ല.

എന്താണെങ്കിലും നല്ല സാമർത്ഥ്യവും അതിലേറെ ഭാഗ്യവും കൊണ്ടാണ് നമ്മുടെ കാച്ചർമാർ അപകടമില്ലാതെ പോകുന്നത്. കണ്ടുനിൽക്കാൻ വരുന്നവർ ഡാർവിൻ അവാർഡിനുള്ള മത്സരാർത്ഥികളാണ്. അവർക്ക് ഗുഡ്ലക്ക്.സർക്കാരിനോട്. പാമ്പുപിടുത്തത്തിന് ചെല്ലുമ്പോൾ 25 മീറ്റർ എങ്കിലും നോ എൻട്രി ആക്കി ആളെ ഒഴിപ്പിക്കുക. അബദ്ധത്തിൽ പാമ്പ് കടിയേറ്റുതന്നെ അനേകർ നാട്ടിൽ മരിക്കുന്നുണ്ട്, പോയി ചോദിച്ചുവാങ്ങാൻ വിടേണ്ട കാര്യമുണ്ടോ? എന്റെ വായനക്കാരോട്. നിങ്ങളുടെ വീട്ടിലോ പുറത്തോ പാമ്പുപിടുത്തം നടക്കുന്നുണ്ടെങ്കിൽ അവിടെ നിന്നും പരമാവധി ഒഴിഞ്ഞുമാറി നിൽകുക. കുട്ടികളെ മാറ്റി നിർത്തുക. സുരക്ഷിതരായിരിക്കുക. എന്നും അദ്ദേഹം വ്യക്തമാക്കി.