ഒടുവില്‍ ആശ്വാസ വാര്‍ത്ത! ഫ്രാന്‍സിസ് മാര്‍പാപ്പ നാളെ ആശുപത്രി വിടും; ജെമെല്ലി ആശുപത്രിയില്‍ നിന്ന് ഡിസ്ചാര്‍ജ് ചെയ്യുമെന്ന് ചികിത്സിക്കുന്ന ഡോക്ടര്‍മാര്‍; ജീവന്‍ അപകടത്തിലായ രണ്ട് ഘട്ടങ്ങള്‍ കടന്നെന്ന് വിശദീകരണം; വത്തിക്കാനില്‍ രണ്ട് മാസത്തെ വിശ്രമം ആവശ്യമായി വരുമെന്നും ഡോക്ടര്‍മാര്‍; ഞായറാഴ്ച വിശ്വാസികളെ അഭിവാദ്യം ചെയ്യും
ഫ്രാന്‍സിസ് മാര്‍പാപ്പ നാളെ ആശുപത്രി വിടും
റോം: ഒരുമാസത്തിലേറെയായി നീണ്ടുനിന്ന ആശങ്കകള്‍ക്ക് അറുതി വരുത്തി ഫ്രാന്‍സിസ് മാര്‍പാപ്പ സുഖം പ്രാപിച്ചതോടെ ആശുപത്രി വിടാനൊരുങ്ങുന്നു. ഫ്രാന്‍സിസ് മാര്‍പാപ്പയെ ഞായറാഴ്ച റോമിലെ ജെമെല്ലി ആശുപത്രിയില്‍ നിന്ന് ഡിസ്ചാര്‍ജ് ചെയ്യുമെന്ന് അദ്ദേഹത്തെ ചികിത്സിക്കുന്ന ഡോക്ടര്‍മാര്‍ അറിയിച്ചു. ഫെബ്രുവരി 14 ന് ന്യുമോണിയ ബാധിച്ചാണ് 88കാരനായ മാര്‍പ്പാപ്പയെ ആശുപത്രിയില്‍ പ്രവേശിപ്പിച്ചത്.
കഴിഞ്ഞ അഞ്ച് ആഴ്ചയ്ക്കിടെ, അദ്ദേഹത്തിന്റെ 'ജീവന്‍ അപകടത്തിലായ രണ്ട് വളരെ ഗുരുതരമായ ഘട്ടങ്ങള്‍' അതിജീവിച്ചു എന്ന് പോപ്പിനെ ചികിത്സിക്കുന്ന ഡോക്ടര്‍മാരില്‍ ഒരാളായ ഡോ. സെര്‍ജിയോ ആല്‍ഫിയേരി പറഞ്ഞു.
ഫ്രാന്‍സിസ് മാര്‍പാപ്പ ഒരിക്കലും ഇന്‍ട്യൂബേറ്റ് ചെയ്തിട്ടില്ലെന്നും എപ്പോഴും ജാഗ്രതയും ശ്രദ്ധയും പുലര്‍ത്തിയിരുന്നുവെന്നും ഡോ. ആല്‍ഫിയേരി പറഞ്ഞു. പോപ്പ് ഇപ്പോള്‍ സ്ഥിരതയുള്ള അവസ്ഥയിലാണെന്നും വത്തിക്കാനില്‍ കുറഞ്ഞത് രണ്ട് മാസത്തെ വിശ്രമം ആവശ്യമായി വരുമെന്നും ഡോക്ടര്‍മാര്‍ അറിയിച്ചു. 'നാളെ അദ്ദേഹം വത്തിക്കാനിലെ വസതിയില്‍ ഉണ്ടാകുമെന്ന് ഇന്ന് സന്തോഷത്തോടെ അറിയിക്കുന്നു,' ഡോ. ആല്‍ഫിയേരി ശനിയാഴ്ച മാധ്യമപ്രവര്‍ത്തകരോട് പറഞ്ഞു.
പോപ്പിന്റെ ശ്വസനത്തിലും ചലനശേഷിയിലും ചില പുരോഗതി കണ്ടതായി വെള്ളിയാഴ്ച വത്തിക്കാന്‍ പറഞ്ഞിരുന്നു. രാത്രിയില്‍ ശ്വസിക്കുന്നതിനായി അദ്ദേഹം മെക്കാനിക്കല്‍ വെന്റിലേഷന്‍ ഉപയോഗിക്കുന്നില്ലെന്നും പകരം മൂക്കിനടിയിലെ ഒരു ചെറിയ ട്യൂബ് വഴി ഓക്‌സിജന്‍ സ്വീകരിക്കുന്നുണ്ടെന്നും സ്ഥിരീകരിച്ചിരുന്നു. പകല്‍ സമയത്ത്, അദ്ദേഹം കുറഞ്ഞ അളവില്‍ ഓക്‌സിജന്‍ ഉപയോഗിക്കുന്നു.
മാര്‍പാപ്പ വിശ്വാസികളെ കാണാന്‍ തയ്യാറെടുക്കുന്നുവെന്ന വാര്‍ത്തകള്‍ക്ക് പിന്നാലെയാണ് ആശുപത്രി വിടുന്നുവെന്ന റിപ്പോര്‍ട്ടും പുറത്തുവന്നത്. ശ്വാസകോശ അണുബാധയെത്തുടര്‍ന്ന് ഫെബ്രുവരി 14 മുതല്‍ റോമിലെ ജെമെല്ലി ആശുപത്രിയില്‍ പ്രവേശിപ്പിച്ചതിനു ശേഷം ആദ്യമായാണ് മാര്‍പാപ്പ പൊതുജനങ്ങളെ കാണാന്‍ പോകുന്നത്. ജെമെല്ലി ആശുപത്രിക്കു പുറത്തുള്ള പൊതുജനങ്ങളെ ഫ്രാന്‍സിസ് മാര്‍പാപ്പ ഞായറാഴ്ച കാണുമെന്ന് ഹോളി സീ പ്രസ് ഓഫീസ് അറിയിച്ചു.
ആഞ്ചലസ് പ്രാര്‍ത്ഥനകള്‍ക്ക് ശേഷം റോമിലെ അഗോസ്റ്റിനോ ജെമെല്ലി ആശുപത്രിയില്‍ നിന്ന് മാര്‍പാപ്പ വിശ്വാസികളെ കാണാനും അനുഗ്രഹം നല്‍കാനും തയ്യാറെടുക്കുകയാണെന്നാണ് വത്തിക്കാന്‍ അറിയിച്ചിരിക്കുന്നത്. ആശുപത്രിയിലായിരുന്നതിനാല്‍ കഴിഞ്ഞ അഞ്ച് ഞായറാഴ്ചകളില്‍ അദ്ദേഹം വിശ്വാസികളെ അഭിസംബോധന ചെയ്തിരുന്നില്ല. 2013 മാര്‍ച്ചില്‍ തിരഞ്ഞെടുക്കപ്പെട്ടതിനുശേഷം ആദ്യമായാണ് ഇത്രയധികം അഞ്ച് ആഴ്ച തുടര്‍ച്ചയായി അദ്ദേഹം ആഞ്ചലസ് പ്രാര്‍ത്ഥനകളിലടക്കം പങ്കെടുക്കാതിരിക്കുന്നത്.
ജെമെല്ലി ആശുപത്രിയില്‍ നിന്ന് ഇതിന് മുന്‍പും മാര്‍പാപ്പ പരസ്യമായി പ്രത്യക്ഷപ്പെട്ടിട്ടുണ്ട്. 2021 ജൂലൈ 11 ന് വന്‍കുടല്‍ ശസ്ത്രക്രിയയ്ക്ക് ശേഷം ആശുപത്രിയുടെ പത്താം നിലയിലെ തന്റെ ബാല്‍ക്കണിയില്‍ നിന്നാണ് അദ്ദേഹം ആഞ്ചലസ് പ്രാര്‍ത്ഥന ചൊല്ലിയത്.
ആശുപത്രിയില്‍ പ്രവേശിപ്പിച്ചതിനുശേഷം, കഴിഞ്ഞ ആഴ്ച വത്തിക്കാന്‍ പുറത്തുവിട്ട ഒരു ഫോട്ടോയില്‍, ആശുപത്രിയിലെ ഒരു ചാപ്പലില്‍ അദ്ദേഹം പ്രാര്‍ത്ഥിക്കുന്നതായി കാണിച്ചിരുന്നു. ഈ മാസം ആദ്യം, വത്തിക്കാന്‍ സിറ്റിയിലെ സെന്റ് പീറ്റേഴ്സ് സ്‌ക്വയറില്‍ ഫ്രാന്‍സിസ് മാര്‍പാപ്പ തന്റെ മാതൃഭാഷയായ സ്പാനിഷില്‍ സംസാരിക്കുന്നതിന്റെ ഓഡിയോ റെക്കോര്‍ഡിംഗ് പ്ലേ ചെയ്തിരുന്നു.
കത്തോലിക്കാ വിശ്വാസികളുടെ പ്രാര്‍ത്ഥനകള്‍ക്ക് നന്ദി പറയുമ്പോള്‍ അദ്ദേഹത്തിന്റെ ശബ്ദം ഇടറിയിരുന്നു.
വത്തിക്കാന്റെ ഡോക്ട്രിനല്‍ ഓഫീസിന്റെ തലവനായ കര്‍ദ്ദിനാള്‍, പോണ്ടിഫ് തന്റെ മുന്‍ഗാമിയായ ബെനഡിക്ട് പതിനാറാമനെപ്പോലെ ഫ്രാന്‍സിസ് മാര്‍പ്പാപ്പ സ്ഥാനം രാജിവയ്ക്കുമെന്ന അഭ്യൂഹങ്ങള്‍ തള്ളിക്കളഞ്ഞു. റോമന്‍ കത്തോലിക്കാ സഭയുടെ നേതാവായി ഫ്രാന്‍സിസ് മാര്‍പാപ്പ ഏകദേശം 12 വര്‍ഷം ചെലവഴിച്ചിരുന്നു.
ജീവിതത്തിലുടനീളം നിരവധി ആരോഗ്യപ്രശ്‌നങ്ങള്‍ അദ്ദേഹത്തിന് അനുഭവപ്പെട്ടിട്ടുണ്ട്, അതില്‍ 21 വയസ്സുള്ളപ്പോള്‍ അദ്ദേഹത്തിന്റെ ശ്വാസകോശത്തിന്റെ ഒരു ഭാഗം നീക്കം ചെയ്യപ്പെട്ടു, ഇത് അദ്ദേഹത്തെ അണുബാധയ്ക്ക് കൂടുതല്‍ സാധ്യതയുള്ളതാക്കിയിരുന്നു.
88 വയസുള്ള മാര്‍പ്പാപ്പയെ ബ്രോങ്കൈറ്റിസിനുള്ള ചികിത്സയ്ക്കും പരിശോധനകള്‍ക്കുമായി കഴിഞ്ഞ ഫെബ്രുവരി 14നാണ് റോമിലെ ആശുപത്രിയില്‍ പ്രവേശിപ്പിച്ചത്. അദ്ദേഹത്തിന് ശ്വാസകോശത്തില്‍ കടുത്ത അണുബാധ ഉണ്ടെന്ന് വത്തിക്കാന്‍ നേരത്തെ അറിയിച്ചിരുന്നു. രണ്ട് ശ്വാസകോശങ്ങളിലും ന്യൂമോണിയ ബാധിച്ച പോപ്പിന് ആന്റിബയോട്ടിക് ചികിത്സയിലാണ് കഴിയുന്നത്.
ലോകമാകെയുള്ള വിശ്വാസികള്‍ പാപ്പയുടെ സൌഖ്യത്തിന് വേണ്ടിയുള്ള പ്രാര്‍ത്ഥനകളിലായിരുന്നു. സെന്റ് പീറ്റേഴ്സ് ചത്വരത്തില്‍ ജപമാലയര്‍പ്പണമടക്കം നടത്തിയിരുന്നു. തനിക്ക് വേണ്ടി പ്രാര്‍ത്ഥനകളില്‍ ഏര്‍പ്പെട്ടവര്‍ക്ക് ഫ്രാന്‍സിസ് മാര്‍പ്പാപ്പ നന്ദി അറിയിച്ചതായി നേരത്തെ വത്തിക്കാന്‍ വക്താവ് അറിയിച്ചിരുന്നു. എത്രയും വേഗം മാര്‍പാപ്പ സുഖമായി തിരിച്ചുവരുമെന്ന പ്രത്യാശയും വത്തിക്കാന്‍ വക്താവ് പങ്കുവച്ചിരുന്നു