ഞങ്ങള്‍ക്ക് ആ അമേരിക്കക്കാരിയെ കാണേണ്ട! വീടുതോറും നടന്ന് വാതിലില്‍ മുട്ടിയിട്ടും ഒരാള്‍ പോലും ഉഷ വാന്‍സിനെ കാണാന്‍ കൂട്ടാക്കിയില്ല; ഗ്രീന്‍ലാന്‍ഡ് സന്ദര്‍ശനത്തിനിടെ നാണംകെട്ട് അമേരിക്കയുടെ സെക്കന്‍ഡ് ലേഡി; സന്ദര്‍ശനം വെട്ടിച്ചുരുക്കി; ട്രംപിന്റെ എടുത്തുചാടിയുള്ള സംസാരം വരുത്തിയ വിന ഇങ്ങനെ
ഗ്രീന്‍ലാന്‍ഡ് സന്ദര്‍ശനത്തിനിടെ നാണംകെട്ട് അമേരിക്കയുടെ സെക്കന്‍ഡ് ലേഡി
നൂക്ക്: ലോകത്തിലെ ഏറ്റവും വലിയ ദ്വീപായ ഗ്രീന്‍ലാന്‍ഡില്‍ സന്ദര്‍ശനത്തിന് എത്തിയ യുഎസ് സെക്കന്‍ഡ് ലേഡി ഉഷ വാന്‍സ് നാണം കെട്ടു. യുഎസ് അധികൃതര്‍, നാട്ടുകാരുടെ വീടുതോറും നടന്ന് വാതിലില്‍ മുട്ടിയെങ്കിലും ആരും ഉഷ വാന്‍സിനെ കാണാന്‍ കൂട്ടാക്കിയില്ല.
ചരിത്ര-സാംസ്‌കാരിക കേന്ദ്രങ്ങള്‍ സന്ദര്‍ശിക്കാന്‍ ലക്ഷ്യിമിട്ടാണ് ഉഷ വാന്‍സും, ആണ്‍മക്കളില്‍ ഒരാളും ഗ്രീന്‍ലാന്‍ഡില്‍ എത്തിയത്. എന്നാല്‍, ഗ്രീന്‍ലാന്‍ഡ് തങ്ങള്‍ പിടിച്ചെടുക്കുമെന്ന് യുഎസ് പ്രസിഡന്റ് ഡൊണള്‍ഡ് ട്രംപ് ആവര്‍ത്തിച്ച് പ്രഖ്യാപിച്ചതോടെ, ഗ്രീന്‍ലാന്‍ഡുകാര്‍ ഒന്നാകെ ഇടഞ്ഞു.
ഗ്രീന്‍ലാന്‍ഡിലെ പ്രസിദ്ധമായ ഡോഗ് സ്ലെഡ് മത്സരം കാണാന്‍ ഉഷ പദ്ധതിയിട്ടെങ്കിലും അതുറദ്ദാക്കി. അതോടെ, ഉഷയെ കാണാന്‍ നാട്ടുകാരില്‍ ആരെങ്കിലും തയ്യാറാകുമോ എന്നായി അന്വേഷണം. എന്നാല്‍, യുഎസ് അധികൃതര്‍ വാതിലില്‍ മുട്ടിയപ്പോള്‍, ഇല്ല താല്‍പര്യമില്ലെന്ന മറുപടിയാണ് വരവേറ്റത്.
വ്യാഴാഴ്ച മുതല്‍ ശനിയാഴ്ച വരെയാണ് സന്ദര്‍ശനം നിശ്ചയിച്ചിരുന്നത്. എന്നാല്‍, ഇപ്പോള്‍ അത് വെള്ളിയാഴ്ചത്തേക്ക് മാത്രമായി വെട്ടിച്ചുരുക്കി. ഗ്രീന്‍ലാന്‍ഡിലെ ഒരു അമേരിക്കന്‍ സൈനിക താവളം സന്ദര്‍ശിക്കാന്‍ വൈസ് പ്രസിഡന്റ് ജെ ഡി വാന്‍സ്, ഉഷ വാന്‍സിനൊപ്പം ചേരും. ദേശീയ സുരക്ഷാ ഉപദേഷ്ടാവ് മൈക്ക് വാള്ട്സും ഊര്‍ജ്ജ സെക്രട്ടറി ക്രൈസ്റ്റ് റൈറ്റും അവര്‍ക്കൊപ്പം ചേരുന്നുണ്ട്.
സിസിമ്യൂട്ടിലെ ഡോഗ്സ്ലെഡ് മത്സരം കാണാന്‍ ഉഷ വാന്‍സിന് ക്ഷണം ഉണ്ടായിരുന്നു എന്നാണ് ട്രംപ് ഭരണകൂടം അവകാശപ്പെടുന്നത്. എന്നാല്‍, യുഎസ് ഉദ്യോഗസ്ഥരുടെ സന്ദര്‍ശനത്തിന് ഔദ്യോഗികമോ, അനൗദ്യോഗികമോ ആയ ക്ഷണം ഇല്ലായിരുന്നുവെന്നാണ് ഗ്രീന്‍ലാന്‍ഡ് സര്‍ക്കാരിന്റെ വാദം.
യുഎസ്-ഗ്രീന്‍ലാന്‍ഡ് ബന്ധം മെച്ചപ്പെടണമെന്ന് താല്‍പര്യമുള്ള അമേരിക്കന്‍ ഡേബ്രേക്ക് എന്ന കമ്പനി നടത്തുന്ന ടോം ഡാന്‍സ് എന്ന അമേരിക്കക്കാരനാണ് യുഎസ് സെക്കന്‍ഡ് ലേഡിക്ക് ഡോഗ്സ്ലെഡ് കാണാന്‍ ക്ഷണക്കത്ത് അയച്ചതെന്ന് പിന്നീട് വ്യക്തമായി. വാര്‍ഷിക ഡോഗ്സ്ലെഡ് മത്സരത്തിന്റെ സ്‌പോണ്‍സര്‍മാരാണ് ഈ കമ്പനി. ആ നിലയ്ക്കായിരുന്നു ക്ഷണം. മത്സരത്തിലെ ഉഷ വാന്‍സിന്റെ സാന്നിധ്യം ഒഴിവാക്കിയത് പ്രതിഷേധം ഭയന്നെന്നാണ് സൂചന. ഇനിയിപ്പോള്‍ ഗ്രീന്‍ലാന്‍ഡില്‍ ഉഷയ്ക്ക് ചെയ്യാനുള്ളത് ഗ്രീന്‍ലാന്‍ഡിന്റെ വടക്ക്-പടിഞ്ഞാറന്‍ തീരത്തെ അമേരിക്കന്‍ സൈനിക താവള സന്ദര്‍ശനം മാത്രമാണ്.
ഗ്രീന്‍ലാന്‍ഡുകാര്‍ ഉടക്കാന്‍ കാരണം
ഗ്രീന്‍ലാന്‍ഡില്‍ യുഎസ് പ്രസിഡന്റ് ഡൊംള്‍ഡ് ട്രംപ് കണ്ണുവച്ചതിന് ശേഷം അവിടുത്തെ ഭരണകൂടത്തിനും നാട്ടുകാര്‍ക്കും ഉറക്കം നഷ്ടപ്പെട്ടിരിക്കുകയാണ്. ഗ്രീന്‍ലാന്‍ഡ് യുഎസ് പിടിച്ചെടുക്കുമെന്ന് ട്രംപ് പലവട്ടം പറഞ്ഞുകഴിഞ്ഞു. ഗ്രീന്‍ലാന്‍ഡ് ഡെന്മാര്‍ക്കിന്റെ ഭാഗമാണ്. ഐസുമൂടി കിടക്കുന്ന ഈ പ്രദേശം ധാതുലവണങ്ങളുടെയും എണ്ണയുടെയും വന്‍ ശേഖരമാണ്. എന്തായാലും ഇപ്പോള്‍ ഗ്രീന്‍ലാന്‍ഡ് പ്രധാനമന്ത്രി മ്യുട്ട് ബി എഗെഡെ ആകെ രോഷാകുലനാണ്. കാരണം വേറൊന്നുമല്ല, യുഎസ് ദേശീയ സുരക്ഷാ ഉപദേഷ്ടാവ് മൈക്ക് വാള്‍ട്സിന്റെ നേതൃത്വത്തിലുള്ള ഉന്നതതല സംഘം ഗ്രീന്‍ലാന്‍ഡ് സന്ദര്‍ശിക്കാന്‍ എത്തുന്നു എന്ന അറിയിപ്പായിരുന്നു അത്.
യുഎസ് സെക്കന്‍ഡ് ലേഡി ഉഷ വാന്‍സ് സൗഹൃദ സന്ദര്‍ശനത്തിന് എത്തുന്നു എന്നായിരുന്നു ആദ്യത്തെ അറിയിപ്പ്. വ്യാഴാഴ്ച മുതല്‍ ശനിയാഴ്ച വരെ മൂന്നുദിവസം തന്റെ മകനുമൊത്ത് ഉഷ വാന്‍സ് ഗ്രീന്‍ലാന്‍ഡില്‍ ഉണ്ടാകുമെന്നും വിവിധ ചരിത്ര-സാംസ്‌കാരിക സ്ഥലങ്ങള്‍ സന്ദര്‍ശിക്കുമെന്നും വാര്‍ഷിക ഡോഗ്സ്ലെഡ് മത്സരം വീക്ഷിക്കുമെന്നുമായിരുന്നു നേരത്തെയുള്ള അറിയിപ്പ്. എന്നാല്‍. അതിനുമുന്നോടിയായി മൈക്ക് വാള്ട്സും സംഘവും എത്തുമെന്ന് കൂടി അറിഞ്ഞതോടെയാണ് ഗ്രീന്‍ലാന്‍ഡ് പ്രധാനമന്ത്രി പ്രകോപിതനായത്. തന്റെ രോഷം അദ്ദേഹം മാധ്യമങ്ങള്‍ക്ക് മുന്നില്‍ മറച്ചുവച്ചതുമില്ല.
'ഒരു രാഷ്ട്രീയക്കാരന്റെ ഭാര്യയുടെ നിര്‍ദ്ദോഷമായ സന്ദര്‍ശനമെന്ന് ഇനി വിലയിരുത്താന്‍ കഴിയില്ല. എന്താണ് യുഎസ് ദേശീയ സുരക്ഷാ ഉപദേഷ്ടാവിന് ഗ്രീന്‍ലാന്‍ഡില്‍ കാര്യം? ഞങ്ങള്‍ക്ക് മേലുള്ള അവരുടെ അധികാരം പ്രകടിപ്പിക്കുകയാണ് വരവിന്റെ ലക്ഷ്യം. അദ്ദേഹം ട്രംപിന്റെ വിശ്വസ്തനും അടുത്ത ഉപദേഷ്ടാവുമാണ്. മൈക്ക് വാള്‍ട്സിന്റെ ഗ്രീന്‍ലാന്‍ഡിലെ സാന്നിധ്യം ഒന്നുകൊണ്ടുമാത്രം ട്രംപിന്റെ ദൗത്യത്തില്‍ അമേരിക്കക്കാര്‍ വിശ്വസിക്കും. സന്ദര്‍ശനത്തിന് ശേഷം ഞങ്ങളുടെ മേല്‍ സമ്മര്‍ദ്ദം വര്‍ദ്ധിക്കും', പ്രധാനമന്ത്രി മ്യുട്ട് ബി എഗെഡെ പറഞ്ഞിരുന്നു.
അമേരിക്കയോട് ചേരാന്‍ ഗ്രീന്‍ലാന്‍ഡിന് താല്‍പര്യമില്ല
ഡാനിഷ് ദിനപത്രമായ ബെര്‍ലിങ്സ്‌കെയും ഗ്രീന്‍ലാന്‍ഡിലെ ദിനപത്രമായ സെര്‍മിറ്റ്‌സിയാഖും ചേര്‍ന്ന് നടത്തിയ സര്‍വേയില്‍ 85% ഗ്രീന്‍ലാന്‍ഡുകാരും യുഎസിന്റെ ഭാഗമാകാന്‍ ആഗ്രഹിക്കുന്നില്ലെന്ന് അഭിപ്രായപ്പെട്ടിരുന്നു. 6% ഗ്രീന്‍ലാന്‍ഡുകാര്‍ മാത്രമാണ് തങ്ങളുടെ ദ്വീപ് യുഎസിന്റെ ഭാഗമാകുന്നതിനെ അനുകൂലിക്കുന്നത്.
യുഎസ് പ്രസിഡന്റ് ഡൊണാള്‍ഡ് ട്രംപിന്റെ താല്‍പ്പര്യത്തെ പകുതിയോളം ജനങ്ങളും ഒരു ഭീഷണിയായിട്ടാണ് കാണുന്നത്. സര്‍വേയില്‍ പങ്കെടുത്തവരില്‍ 8% പേര്‍ മാത്രമാണ് തങ്ങളുടെ ഡാനിഷ് പൗരത്വം അമേരിക്കയിലേക്ക് മാറ്റാന്‍ തയ്യാറാണെന്ന് പറഞ്ഞത്. 55% പേര്‍ ഡാനിഷ് പൗരന്മാരായി തുടരാനാണ് ആഗ്രഹിക്കുന്നത്. 37% പേര്‍ തീരുമാനമെടുത്തിട്ടില്ലെന്നും റിപ്പോര്‍ട്ടില്‍ പറയുന്നു.
മെക്സികോയേക്കാള്‍ വലിയ ഭൂപ്രദേശമായ ഗ്രീന്‍ലാന്‍ഡില്‍ 57,000 മാത്രമാണ് ജനസംഖ്യ. 2009ലാണ് ദ്വീപിന് സ്വയംഭരണാവകാശം ലഭിച്ചത്. ഡെന്മാര്‍ക്കില്‍ നിന്ന് ഒരു റഫറണ്ടത്തിലൂടെ സ്വാതന്ത്ര്യം പ്രഖ്യാപിക്കാനുള്ള അവകാശവും പ്രദേശത്തിനുണ്ട്. നേരത്തെ മുതലേ ട്രംപിന് ഗ്രീന്‍ലാന്‍ഡിനെ യുഎസിനോട് ചേര്‍ക്കാന്‍ അതീവതാല്‍പര്യമായിരുന്നു. എന്നാല്‍, ഗ്രീന്‍ലാന്‍ഡ് പ്രധാനമന്ത്രി മ്യൂട്ടെ എഗെഡെ, ദ്വീപ് വില്‍പ്പനയ്ക്കുള്ളതല്ലെന്നും അവരുടെ ഭാവി തീരുമാനിക്കേണ്ടത് ജനങ്ങളാണെന്നും പലവട്ടം തറപ്പിച്ച് പറഞ്ഞിട്ടുണ്ട്.