എരിതീയില് എണ്ണയൊഴിച്ച് യമനിലെ ഹൂതികളും പശ്ചിമേഷ്യയിലെ യുദ്ധത്തില് പങ്കുചേര്ന്നു; ഇസ്രയേലിന് നേരേ മിസൈല് പ്രഹരം; ഇസ്രയേലിന്റെ വ്യോമാക്രമണത്തില് ഇറാനില് 12 പേര് കൊല്ലപ്പെട്ടു; പ്രത്യാക്രമണവുമായി ഇറാനും; ഇറാന്റെ സൈനികശേഷി തകര്ക്കപ്പെട്ടുവെന്നും മൊജ്തബ ഖമേനി കൊല്ലപ്പെട്ടുവെന്നും ട്രംപ്; സംഘര്ഷം തീര്ക്കാന് നാളെ മുതല് പാക് മധ്യസ്ഥതയില് ചര്ച്ചകള്
ഹൂതികളും പശ്ചിമേഷ്യയിലെ യുദ്ധത്തില് പങ്കുചേര്ന്നു
ടെഹ്റാന്/ വാഷിങ്ടണ്: എരിതീയില് എണ്ണയൊഴിച്ചുകൊണ്ട് യമനിലെ ഹൂതികള് പശ്ചിമേഷ്യയിലെ സംഘര്ഷത്തില് നേരിട്ട് പങ്കുചേര്ന്നു. സംഘര്ഷം തുടങ്ങിയ ശേഷം, ഇതാദ്യമായാണ് ഇസ്രയേലിന് നേരെ ഹൂതികള് മിസൈല് ആക്രമണം നടത്തുന്നത്. മിസൈല് വിജയകരമായി തടഞ്ഞുവെന്ന് ഇസ്രയേല് സൈന്യം അറിയിച്ചു. എന്നാല്, മേഖലയിലെ ചരക്ക് കപ്പലുകള്ക്ക് നേരെയുള്ള ആക്രമണങ്ങളില് ഹൂതികള് ഇറാനൊപ്പം ചേരുമോ എന്ന ആശങ്ക ഇതോടെ ഉയര്ന്നു.
ഇറാന്, ലെബനന്, ഇറാഖ്, ഫലസ്തീന് എന്നിവിടങ്ങളിലെ അടിസ്ഥാന സൗകര്യങ്ങള്ക്ക് നേരെ തുടര്ച്ചയായി നടക്കുന്ന ആക്രമണങ്ങള്ക്കുള്ള തിരിച്ചടിയായാണ് ഈ മിസൈല് വര്ഷമെന്ന് ഹൂതികള് വ്യക്തമാക്കി. 'അധിനിവേശം' അവസാനിക്കുന്നത് വരെ തങ്ങളുടെ സൈനിക നീക്കം തുടരുമെന്നും അവര് കൂട്ടിച്ചേര്ത്തു.
ഇറാനു നേരെയുള്ള ആക്രമണങ്ങള് അവസാനിപ്പിച്ചില്ലെങ്കില് തങ്ങള് ഇറാനു വേണ്ടി യുദ്ധത്തില് പങ്കുചേരുമെന്ന് ഹൂതി സൈനിക വക്താവ് ബ്രിഗേഡിയര് ജനറല് സാരി കഴിഞ്ഞ വെള്ളിയാഴ്ച മുന്നറിയിപ്പ് നല്കിയിരുന്നു. 'ഇസ്ലാമിക് റിപ്പബ്ലിക്കിനും പ്രതിരോധത്തിന്റെ അച്ചുതണ്ടിനും (Axis of Resistance) നേരെയുള്ള പ്രകോപനം തുടരുകയാണെങ്കില് നേരിട്ടുള്ള സൈനിക ഇടപെടലിന് ഞങ്ങള് സജ്ജമാണ്,' എന്നായിരുന്നു അദ്ദേഹത്തിന്റെ വാക്കുകള്.
തങ്ങളുടെ ലക്ഷ്യങ്ങള് പൂര്ത്തിയാകുന്നത് വരെ യുദ്ധത്തില് തുടരുമെന്ന് ഹൂതി ഗ്രൂപ്പ് ഇപ്പോള് പ്രഖ്യാപിച്ചിരിക്കുകയാണ്. ചരക്ക് കപ്പലുകള്ക്ക് നേരെ കൂടുതല് ആക്രമണങ്ങള് ഉണ്ടാകുമെന്നും, ഹോര്മുസ് കടലിടുക്കിന് പുറമെ ചെങ്കടല് കൂടി അടച്ചുപൂട്ടാന് സാധ്യതയുണ്ടെന്നും ഉള്ള ആശങ്കകള് നിലനില്ക്കുന്നു. ഗാസ യുദ്ധത്തിന്റെ സമയത്തും ചെങ്കടലിലൂടെയുള്ള കപ്പല് ഗതാഗതത്തിന് നേരെ ഹൂതികള് ശക്തമായ ആക്രമണങ്ങള് നടത്തിയിരുന്നു.
മറ്റൊരു സംഭവത്തില്, കഴിഞ്ഞ ഒരാഴ്ചയ്ക്കിടെ, സൗദിയിലെ വ്യോമതാവളത്തിന് നേരെ ഇറാന് നടത്തിയ ആക്രമണങ്ങളില് രണ്ട് ഡസനിലധികം യുഎസ് സൈനികര്ക്ക് പരിക്കേറ്റു. വെള്ളിയാഴ്ച പ്രിന്സ് സുല്ത്താന് എയര്ബേസിലുണ്ടായ ആക്രമണത്തില് മാത്രം 15 പേര്ക്ക് പരിക്കേറ്റതായാണ് റിപ്പോര്ട്ടുകള്.
ഇന്നലെ രാത്രിയിലും ഇറാന്, ലെബനന്, ഇസ്രായേല്, ബഹ്റൈന് എന്നിവിടങ്ങളില് ശക്തമായ ആക്രമണങ്ങള് തുടര്ന്നു. ഇറാനിലെ ഇസ്ലാമിക് ഭരണകൂടത്തിന് നേരെ ആക്രമണം ശക്തമാക്കുമെന്ന് ഇസ്രയേല് ഭീഷണിപ്പെടുത്തി. ഇതിനിടെ, മേഖലയിലേക്ക് സൈന്യത്തെ അയക്കുന്ന കാര്യം പരിഗണനയിലാണെന്ന് യുഎസ് പ്രസിഡന്റ് ഡൊണാള്ഡ് ട്രംപ് ഇന്നലെ സൂചന നല്കി. എന്നാല് അത്തരമൊരു നീക്കമുണ്ടായാല് വലിയ വില നല്കേണ്ടി വരുമെന്ന് ഇറാന് മുന്നറിയിപ്പ് നല്കിയിട്ടുണ്ട്.
ഇസ്രയേലിലേക്ക് ഇറാന്റെ മിസൈല് വര്ഷം
ഇറാനില് നിന്ന് ഇസ്രായേലിന് നേരെ മിസൈലുകള് വിക്ഷേപിച്ചതായി ഇസ്രായേല് സൈന്യം സ്ഥിരീകരിച്ചു.
'അല്പം മുന്പ്, ഇസ്രായേല് ഭൂപ്രദേശത്തിന് നേരെ ഇറാന് തൊടുത്തുവിട്ട മിസൈലുകള് ഐഡിഎഫ് തിരിച്ചറിഞ്ഞിട്ടുണ്ട്. ഈ ഭീഷണിയെ പ്രതിരോധിക്കാനായി ഞങ്ങളുടെ ഡിഫന്സ് സിസ്റ്റങ്ങള് (മിസൈല് വിരുദ്ധ സംവിധാനങ്ങള്) സജ്ജമാണ്.-ഐഡിഎഫ് അറിയിച്ചു. ആക്രമണ ബാധിത പ്രദേശങ്ങളിലുള്ള താമസക്കാര്ക്ക് ജാഗ്രതാ നിര്ദ്ദേശം നല്കിയിട്ടുണ്ടെന്നും സുരക്ഷിത കേന്ദ്രങ്ങളിലേക്ക് മാറാന് ജനങ്ങള്ക്ക് മുന്നറിയിപ്പ് നല്കിയതായും സൈന്യം കൂട്ടിച്ചേര്ത്തു.
ഇറാനില് വീണ്ടും ഇസ്രായേല് വ്യോമാക്രമണം
ഇറാനിലെ വിവിധ കേന്ദ്രങ്ങളില് വീണ്ടും ഇസ്രായേല് സൈന്യത്തിന്റെ ആക്രമണം. ടെലഗ്രാമിലൂടെ പുറത്തുവിട്ട ഹ്രസ്വമായ പ്രസ്താവനയില് ഐഡിഎഫ് ഇപ്രകാരം പറഞ്ഞു:
'ടെഹ്റാനിലുടനീളമുള്ള ഇറാനിയന് ഭീകര ഭരണകൂടത്തിന്റെ അടിസ്ഥാന സൗകര്യങ്ങള് ലക്ഷ്യമിട്ട് ഇസ്രായേല് സേന ആക്രമണം നടത്തി.'
ആയുധ നിര്മ്മാണ കേന്ദ്രങ്ങള്, സ്ഫോടകവസ്തു വികസന യൂണിറ്റുകള്, മിസൈല് നിര്മ്മാണ ശാലകള് എന്നിവ ലക്ഷ്യമിട്ട് 50 യുദ്ധവിമാനങ്ങള് ഉപയോഗിച്ച് രാത്രിയിലുടനീളം മൂന്ന് പ്രധാന കേന്ദ്രങ്ങളില് നടത്തിയ ആക്രമണത്തിന് പിന്നാലെയാണ് ഈ പുതിയ നീക്കം.
12 പേര് കൊല്ലപ്പെട്ടെന്ന് ഇറാന്
ശനിയാഴ്ച പുലര്ച്ചെ ജനവാസ കേന്ദ്രങ്ങള് ലക്ഷ്യമാക്കി യുഎസ്-ഇസ്രായേല് സഖ്യം നടത്തിയ വ്യോമാക്രമണത്തില് കുറഞ്ഞത് പന്ത്രണ്ട് പേരെങ്കിലും കൊല്ലപ്പെട്ടതായി ഇറാനിയന് മാധ്യമങ്ങള് റിപ്പോര്ട്ട് ചെയ്തു.
പടിഞ്ഞാറന് പ്രവിശ്യയായ ലോറെസ്ഥാനിലെ ബോറുജെര്ഡ് നഗരത്തിലുണ്ടായ ആക്രമണത്തില് ഏഴ് പേര് കൊല്ലപ്പെടുകയും 36 പേര്ക്ക് പരിക്കേല്ക്കുകയും ചെയ്തതായി പ്രവിശ്യാ ഉദ്യോഗസ്ഥന് ഖുദറത്തുള്ള വലദിയെ ഉദ്ധരിച്ച് ഫാര്സ് വാര്ത്താ ഏജന്സി റിപ്പോര്ട്ട് ചെയ്തു. വടക്കുപടിഞ്ഞാറന് നഗരമായ സഞ്ജാനില് ശനിയാഴ്ച നടന്ന സമാനമായ ആക്രമണങ്ങളില് അഞ്ച് പേര് കൊല്ലപ്പെടുകയും ഏഴ് പേര്ക്ക് പരിക്കേല്ക്കുകയും ചെയ്തതായി സിറ്റി പൊളിറ്റിക്കല് ഡെപ്യൂട്ടി ഗവര്ണര് അലി സാദേഖിയെ ഉദ്ധരിച്ച് ഐഎസ്എന്എ (ISNA) റിപ്പോര്ട്ട് ചെയ്തു.
ആക്രമണങ്ങളില് കൊല്ലപ്പെട്ടവരുടെ ആകെ എണ്ണം സംബന്ധിച്ച് ഇറാന് ഇതുവരെ ഔദ്യോഗികമായ പുതിയ കണക്കുകള് പുറത്തുവിട്ടിട്ടില്ല. മാര്ച്ച് 8-ന് ആരോഗ്യ മന്ത്രാലയം പുറത്തുവിട്ട കണക്കുകള് പ്രകാരം മരണസംഖ്യ 1,200 കടന്നിരുന്നു. എന്നാല് ഇത് സ്വതന്ത്രമായി സ്ഥിരീകരിക്കാന് സാധിച്ചിട്ടില്ല. നിലവില് മരണസംഖ്യ 1,900 കടന്നതായാണ് സൂചനകള്. എങ്കിലും ഇറാനില് സ്വതന്ത്ര മാധ്യമങ്ങള്ക്ക് പ്രവേശനമില്ലാത്തതിനാല് ഈ കണക്കുകള് സ്ഥിരീകരിക്കാനായിട്ടില്ല.
ഇറാന്റെ സൈനികശേഷി തകര്ക്കപ്പെട്ടു; മൊജ്തബ കൊല്ലപ്പെട്ടു: ട്രംപ്
അതേസമയം,ഇറാന്റെ സൈനിക ശേഷിയും നേതൃത്വവും പൂര്ണമായും തകര്ക്കപ്പെട്ടുവെന്ന് യുഎസ് മുന് പ്രസിഡന്റ് ഡോണള്ഡ് ട്രംപ് അവകാശപ്പെട്ടു. ഇറാന്റെ പുതിയ പരമോന്നത നേതാവ് മൊജ്തബ ഖമനയി കൊല്ലപ്പെട്ടതായും ട്രംപ് പറഞ്ഞു. മിയാമിയില് നടന്ന 'ഫ്യൂച്ചര് ഇന്വെസ്റ്റ്മെന്റ് ഇനിഷ്യേറ്റീവ്' പരിപാടിയില് സംസാരിക്കവെയാണ് അദ്ദേഹം ഇത് വെളിപ്പെടുത്തിയത്.
ഇറാന്റെ നാവികസേനയും വ്യോമസേനയും പൂര്ണമായും നശിച്ചു. ഡ്രോണ് ഫാക്ടറികളും പ്രതിരോധ സംവിധാനങ്ങളും തകര്ക്കപ്പെട്ടു. യുദ്ധം അവസാനിപ്പിക്കാന് ഇറാന് ഇപ്പോള് ചര്ച്ചകള്ക്കായി യാചിക്കുകയാണെന്നും അദ്ദേഹം അവകാശപ്പെട്ടു. മുന് ഇറാന് കമാന്ഡര് ഖാസിം സുലൈമാനിയെ 'ഒരു ഭ്രാന്തന് പ്രതിഭ' എന്നാണ് ട്രംപ് വിശേഷിപ്പിച്ചത്.
പരിപാടിയില് ട്രംപ് നടത്തിയ മറ്റു ചില പരാമര്ശങ്ങളും വിവാദങ്ങള്ക്ക് വഴിയൊരുക്കി. വിജയികളെക്കാള് തനിക്ക് ഇഷ്ടം പരാജയപ്പെട്ടവരെയാണെന്നും, വിജയിച്ചവരുടെ വിജയഗാഥകള് കേള്ക്കുന്നതിനെക്കാള് തന്റെ വിജയങ്ങള് കേട്ടിരിക്കുന്ന പരാജയപ്പെട്ടവരുടെ കൂടെ ഇരിക്കാനാണ് തനിക്ക് താല്പര്യമെന്നും അദ്ദേഹം പറഞ്ഞു. പരാജയപ്പെട്ടവരുടെ കൂടെ ഇരിക്കുന്നത് തനിക്ക് കൂടുതല് ആത്മവിശ്വാസം നല്കുന്നുവെന്ന് പറഞ്ഞ ട്രംപ്, പിന്നീട് ഇത് തമാശയാണെന്നും എന്നാല് അതില് അല്പം കാര്യമുണ്ടെന്നും കൂട്ടിച്ചേര്ത്തു. ലോകത്ത് ഏറ്റവും പ്രധാനപ്പെട്ട നേതൃഗുണം വിജയിക്കുക എന്നതാണെന്നും അദ്ദേഹം ഊന്നിപ്പറഞ്ഞു.
ഇറാന് സംഘര്ഷം തീര്ക്കാന് നാളെ മുതല് ചര്ച്ചകള്
ഇറാനും അമേരിക്കയും തമ്മിലുള്ള യുദ്ധം നീണ്ടുനില്ക്കുന്ന സാഹചര്യത്തില്, ഇരുപക്ഷവും തമ്മിലുള്ള സന്ദേശങ്ങള് കൈമാറുന്ന പ്രധാന മധ്യസ്ഥനായി ഷെഹബാസ് ഷെരീഫ് സര്ക്കാര് മാറിയിരിക്കുകയാണ്. മേഖലയിലെ സംഘര്ഷങ്ങള് ലഘൂകരിക്കാനുള്ള ശ്രമങ്ങള് ഉള്പ്പെടെയുള്ള വിവിധ വിഷയങ്ങളില് 'ആഴത്തിലുള്ള ചര്ച്ചകള്ക്കായി' റിയാദ്, കെയ്റോ, അങ്കാറ എന്നിവിടങ്ങളില് നിന്നുള്ള ഉന്നത നയതന്ത്രജ്ഞര് ഞായര്, തിങ്കള് ദിവസങ്ങളില് ഇസ്ലാമാബാദിലെത്തുമെന്ന് പാകിസ്ഥാന് വിദേശകാര്യ മന്ത്രാലയം അറിയിച്ചു.
ചര്ച്ചകളുടെ മുന്നോടിയായി ഇറാന് പ്രസിഡന്റ് മസൂദ് പെസെഷ്കിയനുമായി താന് ഇന്ന് ഒരു മണിക്കൂറിലധികം നീണ്ട വിശദമായ ടെലിഫോണ് സംഭാഷണം നടത്തിയതായി ഷെരീഫ് പറഞ്ഞു.
'ഇറാനിലെ സിവിലിയന് അടിസ്ഥാന സൗകര്യങ്ങള്ക്ക് നേരെ ഉള്പ്പെടെ ഇസ്രായേല് തുടര്ച്ചയായി നടത്തുന്ന ആക്രമണങ്ങളെ പാകിസ്ഥാന് ശക്തമായി അപലപിക്കുന്നു. ഇറാനിലെ ധീരരായ ജനങ്ങളോട് പാകിസ്ഥാന്റെ ഐക്യദാര്ഢ്യം അറിയിക്കുകയും ചെയ്തു,' അദ്ദേഹം എക്സില് (X) കുറിച്ചു.