ഓൺലൈനിൽ വാങ്ങിയ സ്കിൻ ക്രീം ഉപയോഗിച്ച യുവതിക്ക് ഗുരുതര ആരോഗ്യപ്രശ്നങ്ങൾ; ശരീരത്തിൽ പ്രത്യക്ഷപ്പെട്ടത് പാമ്പുകളുടെ ചർമ്മത്തിന് സമാനമായ വരകൾ; 'ചൈനീസ് പരമ്പരാഗത മരുന്ന്' എന്ന പേരിൽ വിറ്റിരുന്ന ക്രീമിനായി ചെലവാക്കിയത് 12 ലക്ഷത്തിലേറെ; കാരണം കണ്ടെത്തി ഡോക്ടർമാർ

ബീജിംഗ്: 'ചൈനീസ് പരമ്പരാഗത മരുന്ന്' എന്ന അവകാശവാദത്തോടെ ഓൺലൈനിൽ വിൽപ്പന നടത്തിയ ഒരു സ്കിൻ ക്രീം ഉപയോഗിച്ച യുവതിക്ക് ഗുരുതരമായ ആരോഗ്യപ്രശ്നങ്ങൾ. 40 വയസ്സുള്ള യുവതിക്ക് വർഷങ്ങളായി ഉപയോഗിച്ചു വന്ന ക്രീം കാരണം ശരീരത്തിൽ പാമ്പുകളുടെ ചർമ്മത്തിന് സമാനമായ വരകൾ പ്രത്യക്ഷപ്പെട്ടതിനെത്തുടർന്ന് നാൻജിംഗിലെ ആശുപത്രിയിൽ പ്രവേശിപ്പിച്ചു.

പത്തുവർഷം മുൻപ് വലത് കാലിൽ ചുവന്ന പാടുകളും ചൊറിച്ചിലും അനുഭവപ്പെട്ടതിനെത്തുടർന്നാണ് യുവതി ഈ ക്രീം വാങ്ങാൻ തുടങ്ങിയത്. പത്തുവർഷത്തിനിടെ ക്രീമിനായി ഏകദേശം 12 ലക്ഷം രൂപയോളം ചെലവഴിച്ചതായി റിപ്പോർട്ട്. ആദ്യ ഉപയോഗത്തിൽ തന്നെ ചൊറിച്ചിലും പാടുകളും കുറഞ്ഞതോടെ ക്രീം തുടർന്നും ഉപയോഗിക്കുകയായിരുന്നു. എന്നാൽ, പിന്നീട് ശരീരമാസകലം ചുവന്ന പാടുകൾ പ്രത്യക്ഷപ്പെടുകയും അവയവങ്ങളിൽ വീക്കം, ഛർദ്ദിൽ, കൈകാലുകളിൽ മരവിപ്പ് തുടങ്ങിയ ബുദ്ധിമുട്ടുകൾ അനുഭവപ്പെടുകയും ചെയ്തു.

ആശുപത്രിയിൽ നടത്തിയ പരിശോധനയിൽ യുവതിയുടെ ശരീരത്തിൽ കോർട്ടിസോളിന്റെ അളവ് ഗണ്യമായി കുറഞ്ഞതായി കണ്ടെത്തി. സെക്കൻഡറി അഡ്രിനോകോർട്ടിക്കൽ ഇൻസഫിഷ്യൻസി എന്ന അവസ്ഥയാണ് യുവതിക്കുള്ളതെന്ന് ചീഫ് ഡെർമറ്റോളജിസ്റ്റ് ഡോ. വാംഗ് ഫെയി സ്ഥിരീകരിച്ചു. പിറ്റ്യൂട്ടറി ഗ്രന്ഥി ആവശ്യത്തിന് ഹോർമോണുകൾ പുറത്തുവിടാത്തതിനാലാണ് ഈ അവസ്ഥ ഉണ്ടാകുന്നത്. യുവതി നിലവിൽ ചികിത്സയിലാണ്. അവരുടെ ആരോഗ്യനിലയിൽ പുരോഗതിയുണ്ടെന്ന് ഡോക്ടർമാർ അറിയിച്ചു.