പലരും പലതും പറയും ആരും പേടിക്കണ്ട! ഇന്ത്യ ലക്ഷ്യമാക്കി ഹോര്മുസ് കടലിടുക്കിലൂടെ രണ്ട് കൂറ്റന് കപ്പലുകളുടെ വരവ്; ഈ ആഴ്ച അവസാനത്തോടെ തന്നെ തീരത്തെത്തുമെന്ന് അധികൃതർ; കൂടെ ജനങ്ങളുടെ വലിയൊരു ആശങ്കയ്ക്ക് മറുപടിയുമായി കേന്ദ്രം
ഡൽഹി: പശ്ചിമേഷ്യയിലെ യുദ്ധസമാനമായ സാഹചര്യങ്ങൾക്കിടയിലും രാജ്യത്തെ പാചകവാതക വിതരണം സുഗമമായിരിക്കുമെന്ന് കേന്ദ്ര സർക്കാർ ഉറപ്പുനൽകുന്നു. ഹോർമൂസ് കടലിടുക്കിലെ തടസ്സങ്ങൾ കാരണം എൽപിജി സിലിണ്ടറുകൾക്ക് ക്ഷാമമുണ്ടാകുമെന്ന് ഭയന്ന് ആരും പരിഭ്രാന്തരായി ബുക്കിംഗ് നടത്തേണ്ടതില്ലെന്ന് പെട്രോളിയം മന്ത്രാലയം അറിയിച്ചു. ഗൾഫ് മേഖലയിൽ കുടുങ്ങിക്കിടന്ന ഇന്ത്യൻ കപ്പലുകളും അതിലെ ജീവനക്കാരും പൂർണ്ണ സുരക്ഷിതരാണെന്നും സർക്കാർ വ്യക്തമാക്കി.
നിലവിലെ ഊർജ പ്രതിസന്ധിക്ക് ആശ്വാസമായി രണ്ട് കൂറ്റൻ ഇന്ത്യൻ എൽപിജി ടാങ്കറുകൾ ഹോർമൂസ് കടലിടുക്ക് കടന്ന് ഇന്ത്യൻ തീരത്തേക്ക് അടുക്കുകയാണ്. 'ജഗ് വസന്ത്', 'പൈൻ ഗ്യാസ്' എന്നീ കപ്പലുകൾ തിങ്കളാഴ്ചയോടെ സുരക്ഷിത പാതയിൽ പ്രവേശിച്ചു. ഇറാനിൽ നിന്നുള്ള പ്രത്യേക അനുമതിയോടെയാണ് ഈ കപ്പലുകൾ ഇന്ത്യയിലേക്ക് വരുന്നത്. 47,600 മെട്രിക് ടൺ എൽപിജി വഹിക്കുന്ന 'ജഗ് വസന്ത്' മാർച്ച് 26-നും, 45,000 മെട്രിക് ടൺ എൽപിജിയുമായി 'പൈൻ ഗ്യാസ്' മാർച്ച് 27-നും ഇന്ത്യൻ തീരത്തെത്തും.
ഫെബ്രുവരി അവസാന വാരം മുതൽ അമേരിക്ക-ഇസ്രായേൽ സഖ്യവും ഇറാനും തമ്മിലുള്ള സംഘർഷം കടുപ്പമേറിയതോടെയാണ് ഹോർമൂസ് കടലിടുക്ക് വഴിയുള്ള ഗതാഗതം ഏതാണ്ട് പൂർണ്ണമായും നിലച്ചത്. ലോകത്തെ എൽപിജി നീക്കത്തിന്റെ പ്രധാന സിരയായ ഈ കടലിടുക്ക് ഇറാൻ ഭാഗികമായി അടച്ചിരുന്നു. എന്നാൽ ഇന്ത്യയും ചൈനയും ഉൾപ്പെടെയുള്ള രാജ്യങ്ങളുമായി ഇറാൻ ഉണ്ടാക്കിയ പ്രത്യേക ധാരണപ്രകാരം ഈ രാജ്യങ്ങളിലെ കപ്പലുകൾക്ക് കടന്നുപോകാൻ അനുമതി നൽകിയിട്ടുണ്ട്. ഇത് ഇന്ത്യയുടെ ഊർജ സുരക്ഷയിൽ നിർണ്ണായകമായി.
അതേസമയം, ഹോർമൂസ് കടലിടുക്കിലെ അനിശ്ചിതത്വം കണക്കിലെടുത്ത് ബദൽ വ്യാപാര പാതകൾ ശക്തിപ്പെടുത്താൻ സൗദി അറേബ്യയും യുഎഇയും തീരുമാനിച്ചു. ദമാം മുതൽ ഷാർജ വരെ നേരിട്ടുള്ള കണക്റ്റിവിറ്റി ഉറപ്പാക്കുന്ന പുതിയ റൂട്ട് വികസിപ്പിക്കാനാണ് നീക്കം. കടൽ-കര ഗതാഗതം സമന്വയിപ്പിച്ചുകൊണ്ടുള്ള ഈ പാത വഴി ഹോർമൂസ് കടലിടുക്ക് പൂർണ്ണമായും ഒഴിവാക്കി ചരക്കുനീക്കം നടത്താൻ സാധിക്കും. നിലവിലെ ഭൗമരാഷ്ട്രീയ സാഹചര്യം കണക്കിലെടുത്ത് എത്രയും വേഗം ഈ പദ്ധതി നടപ്പിലാക്കാനാണ് ഗൾഫ് രാജ്യങ്ങളുടെ ശ്രമം.
ഇതിനിടെ, ഇറാനിലെ ഊർജ കേന്ദ്രങ്ങൾക്ക് നേരെ ഇന്നും ആക്രമണങ്ങൾ തുടർന്നതായാണ് റിപ്പോർട്ട്. ഖുറംശഹർ പവർ പ്ലാന്റിന് നേരെ ആക്രമണമുണ്ടായെങ്കിലും പ്ലാന്റിന്റെ പ്രവർത്തനം നിലച്ചിട്ടില്ലെന്ന് ഇറാൻ വൃത്തങ്ങൾ അറിയിച്ചു. പശ്ചിമേഷ്യയിൽ സംഘർഷം തുടരുമ്പോഴും നയതന്ത്ര ഇടപെടലുകളിലൂടെ ഇന്ത്യയിലേക്കുള്ള ഇന്ധന ഇറക്കുമതി തടസ്സമില്ലാതെ മുന്നോട്ട് കൊണ്ടുപോകാനാണ് കേന്ദ്ര സർക്കാർ ലക്ഷ്യമിടുന്നത്.