ഇന്റർവ്യൂവിന് എത്തിയവർക്ക് ചായയിൽ കലർത്തി നൽകിയത് മയക്കുമരുന്ന്; പിന്നാലെ അഭിമുഖത്തിന്റെ ഭാഗമെന്ന വ്യാജേന ഉദ്യോഗാർഥികളുമായി നടക്കാനിറങ്ങും; ഗുളികകൾ പ്രവർത്തിച്ചു തുടങ്ങുന്നതോടെ സ്ത്രീകൾക്ക് മൂത്രശങ്ക; പൊതുസ്ഥലത്ത് മൂത്രമൊഴിക്കാൻ ആവശ്യപ്പെട്ട് ഫ്രഞ്ച് ഉദ്യോഗസ്ഥൻ; അപമാനിച്ചത് 200ലധികം യുവതികളെ

പാരീസ്: ഫ്രാൻസിന്റെ സാംസ്കാരിക മന്ത്രാലയത്തിലെ ഒരു മുൻ ഉന്നത ഉദ്യോഗസ്ഥൻ ജോലി തേടി അഭിമുഖത്തിനെത്തിയ 200-ൽ അധികം യുവതികളെ ക്രൂരമായി അപമാനിച്ച കേസിൽ ഞെട്ടിക്കുന്ന വിവരങ്ങളാണ് പുറത്തുവരുന്നത്. ക്രിസ്ത്യൻ നെഗ്രെ എന്നറിയപ്പെടുന്ന ഈ മുൻ ഹ്യൂമൻ റിസോഴ്‌സ് ഡയറക്ടർ ഒമ്പത് വർഷത്തോളം നീണ്ട കാലയളവിലാണ് ഈ ഞെട്ടിപ്പിക്കുന്ന കുറ്റകൃത്യങ്ങൾ നടത്തിയത് എന്നാണ് ആരോപണം. അഭിമുഖത്തിനായി എത്തിയ സ്ത്രീകൾക്ക് മയക്കുമരുന്ന് നൽകി പൊതുസ്ഥലത്ത് മൂത്രമൊഴിപ്പിക്കാൻ നിർബന്ധിച്ചാണ് ഇയാൾക്കെതിരെയുള്ള പരാതി.

2009 മുതൽ 2018 വരെയുള്ള കാലയളവിൽ നടന്നതായി പറയപ്പെടുന്ന ഈ സംഭവങ്ങൾ ഫ്രഞ്ച് നീതിന്യായ വ്യവസ്ഥയിൽ 'കെമിക്കൽ സബ്മിഷൻ' (മയക്കുമരുന്ന് ഉപയോഗിച്ചുള്ള ദുരുപയോഗം) എന്ന വിഭാഗത്തിൽ ഉൾപ്പെടുന്ന ഗുരുതരമായ കുറ്റകൃത്യമായി കണക്കാക്കപ്പെടുന്നു. ഉദ്യോഗാർത്ഥികളെ ഇന്റർവ്യൂവിനായി വിളിച്ചുവരുത്തുന്നതാണ് ഇയാളുടെ രീതി. സംസാരത്തിനിടയിൽ, സൗഹൃദം നടിച്ച് ഇവർക്ക് ചായയോ കാപ്പിയോ വാഗ്ദാനം ചെയ്യും. എന്നാൽ, ഈ പാനീയങ്ങളിൽ ശക്തവും നിയമവിരുദ്ധവുമായ ഒരു 'ഡയൂററ്റിക്' (Diuretic - മൂത്രം ഉത്പാദിപ്പിക്കാൻ സഹായിക്കുന്ന ഗുളിക) ഇയാൾ രഹസ്യമായി കലർത്തും.

മരുന്ന് നൽകിയ ശേഷം, ഇന്റർവ്യൂവിന്റെ ഭാഗമായി ഉദ്യോഗാർത്ഥികളെ അദ്ദേഹം മന്ത്രാലയ കെട്ടിടത്തിന് സമീപമുള്ള പാരീസിലെ പ്രശസ്തമായ ട്യൂലെറീസ് ഗാർഡൻസ് (Tuileries Gardens) അല്ലെങ്കിൽ സെയ്ൻ നദിയുടെ തീരങ്ങളിലേക്കോ നീണ്ട നടത്തത്തിനായി കൊണ്ടുപോകും. ഈ സമയത്തായിരിക്കും ഡയൂററ്റിക് ഗുളികകൾ പ്രവർത്തിച്ചുതുടങ്ങുന്നത്. ഇത് സ്ത്രീകളിൽ അസഹനീയവും അനിയന്ത്രിതവുമായ മൂത്രശങ്ക ഉണ്ടാക്കുകയും പൊതുസ്ഥലത്ത് വെച്ച് മൂത്രമൊഴിക്കാൻ നിർബന്ധിതരാക്കുകയും ചെയ്യും.

ജോലി നഷ്ടപ്പെടുമോ എന്ന ഭയത്താൽ പല യുവതികളും കടുത്ത അപമാനം സഹിക്കാൻ നിർബന്ധിതരായി. സിൽവി ഡെലെസെൻ (Sylvie Delezenne) എന്ന ഇര, തനിക്ക് നേരിടേണ്ടി വന്ന ദുരവസ്ഥ വിവരിച്ചത് ഇങ്ങനെ: "എന്റെ കൈകൾ വിറച്ചു, ഹൃദയം വല്ലാതെ മിടിച്ചു, നെറ്റിയിൽ വിയർപ്പുതുള്ളികൾ വന്നു. എനിക്ക് ഒരു ബ്രേക്ക് വേണമെന്ന് ഞാൻ പറഞ്ഞു. പക്ഷേ അദ്ദേഹം നടപ്പ് തുടർന്നു." അവസാനം നിവൃത്തിയില്ലാതെ വന്നപ്പോൾ, "ഞാൻ ഇന്റർവ്യൂ കുളമാക്കി എന്ന് കരുതി" അവർ പറഞ്ഞു. വീട്ടിലേക്ക് മടങ്ങിയെത്തിയ ശേഷം അവർക്ക് അസാധാരണമായ ദാഹം അനുഭവപ്പെടുകയും കാലുകൾ വീങ്ങുകയും ചെരിപ്പിൽ നിന്ന് രക്തം വരാൻ തുടങ്ങുകയും ചെയ്തിരുന്നു.

മറ്റൊരു ഇരയായ അനയ്‌സ് ഡി വോസ് (Anaïs de Vos), മൂത്രശങ്ക വർധിച്ചപ്പോൾ തിരികെ പോകാൻ ആവശ്യപ്പെട്ടെങ്കിലും ഇയാൾ വഴങ്ങാതെ നടന്നു. "നിനക്ക് മൂത്രമൊഴിക്കാൻ പോകേണ്ടതുണ്ടോ?" എന്ന് ഒരു കുട്ടിയോട് ചോദിക്കുന്നതുപോലെ ഇയാൾ ചോദിച്ചത് തനിക്ക് വിചിത്രമായി തോന്നി എന്ന് അനയ്‌സ് കോടതിയിൽ മൊഴി നൽകി. സെയ്ൻ നദിക്കരയിൽ ഒരു സ്റ്റോറേജ് യൂണിറ്റിന് അടുത്തേക്ക് പോയി മറവുപിടിക്കാമെന്ന് ഇയാൾ ആംഗ്യം കാണിച്ചു. എന്നാൽ, എന്തോ പന്തികേട് തോന്നിയതിനാൽ അവർ അത് നിരസിക്കുകയായിരുന്നു.

ചില സ്ത്രീകൾക്ക് ഈ പീഡനത്തിന് ശേഷം ഗുരുതരമായ മൂത്രാശയ അണുബാധയേറ്റ് ദിവസങ്ങളോളം ആശുപത്രിയിൽ കിടക്കേണ്ടി വന്നതായും റിപ്പോർട്ടുകളുണ്ട്. മാത്രമല്ല, കേസിനെത്തുടർന്ന് പല ഇരകൾക്കും പോസ്റ്റ് ട്രോമാറ്റിക് സ്ട്രെസ് ഡിസോർഡർ (PTSD) പോലുള്ള മാനസികാരോഗ്യ പ്രശ്‌നങ്ങൾ പിടിപെടുകയും ചെയ്തു.

2019-ൽ പോലീസ് ക്രിസ്ത്യൻ നെഗ്രെയെ ഔദ്യോഗികമായി കസ്റ്റഡിയിലെടുക്കുകയും അന്വേഷണം ആരംഭിക്കുകയും ചെയ്തു. ഇയാളുടെ കമ്പ്യൂട്ടർ പരിശോധിച്ച പോലീസ് ഉദ്യോഗസ്ഥർ ഞെട്ടിക്കുന്ന തെളിവുകളാണ് കണ്ടെത്തിയത്. ഇയാൾ ലക്ഷ്യമിട്ട 200-ൽ അധികം സ്ത്രീകളുടെ വിശദാംശങ്ങൾ, അവരുടെ ചിത്രങ്ങൾ, പൊതുസ്ഥലത്ത് മൂത്രമൊഴിക്കുന്നതിന്റെയും അവരുടെ കാൽമുട്ടുകൾക്ക് താഴെയുള്ള ഭാഗങ്ങളുടെയും രഹസ്യമായി പകർത്തിയ ചിത്രങ്ങൾ എന്നിവ ഉൾപ്പെടുന്ന ഫയലുകൾ ഇയാളുടെ കമ്പ്യൂട്ടറിൽ നിന്ന് കണ്ടെടുത്തു. ജോലി ഇന്റർവ്യൂ സമയത്ത് മേശക്കടിയിൽ വെച്ച് മൊബൈൽ ഫോൺ ഉപയോഗിച്ച് ഇയാൾ സ്ത്രീകളുടെ കാലുകളുടെ ചിത്രങ്ങൾ പകർത്തിയിരുന്നു എന്നും ആരോപണമുണ്ട്.

ലൈംഗികാതിക്രമം, മയക്കുമരുന്ന് നൽകൽ, ഔദ്യോഗിക പദവി ദുരുപയോഗം ചെയ്യൽ, സ്വകാര്യത ലംഘിക്കൽ, ഹാനികരമായ പദാർത്ഥങ്ങൾ നൽകൽ തുടങ്ങിയ നിരവധി കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. 2018-ൽ സാംസ്കാരിക മന്ത്രാലയം ഇയാളെ സർവ്വീസിൽ നിന്ന് പുറത്താക്കുകയും ചെയ്തു.

വർഷങ്ങൾ കഴിഞ്ഞിട്ടും കേസിന്റെ വിചാരണ വൈകുന്നത് ഇരകൾക്ക് വീണ്ടും ദുരിതമുണ്ടാക്കുന്നു എന്ന് അവരുടെ അഭിഭാഷകർ പറയുന്നു. നീതിക്കായി കാത്തിരിക്കുന്ന നൂറുകണക്കിന് യുവതികൾ തങ്ങൾക്ക് നീതിന്യായ വ്യവസ്ഥയിൽ നിന്ന് ലഭിക്കുന്ന 'ദ്വിതീയ പീഡനം' (Secondary Victimisation) അവസാനിപ്പിക്കണമെന്ന് ആവശ്യപ്പെട്ടുകൊണ്ട് പോരാട്ടം തുടരുകയാണ്. ഫ്രഞ്ച് മാധ്യമങ്ങളിൽ വലിയ കോളിളക്കം സൃഷ്ടിച്ച ഈ കേസ്, രാജ്യത്തെ ലൈംഗികാതിക്രമ നിയമങ്ങളെക്കുറിച്ചും പൊതുഇടങ്ങളിലെ സുരക്ഷയെക്കുറിച്ചും ചർച്ചകൾക്ക് തുടക്കമിട്ടിരിക്കുകയാണ്.