കുവൈത്ത് വിഷമദ്യ ദുരന്തത്തില്‍ ഓര്‍മ്മയും കാഴ്ചയും നഷ്ടപ്പെട്ട ലാമയെ കുവൈത്ത് അധികൃതര്‍ കൊച്ചിയിലേക്ക് നാടുകടത്തി; അച്ഛനെ തേടി അലഞ്ഞ മകന്‍ മലയാളിയ്ക്ക് നൊമ്പരമായി; കളമശ്ശേരി എച്ച്എംടിക്ക് സമീപം കണ്ട അജ്ഞാത മൃതദേഹം സൂരജ് ലാമയുടേതെന്ന് സംശയം; കുടുംബത്തോട് കൊച്ചിയില്‍ എത്താന്‍ നിര്‍ദ്ദേശം; ഡിഎന്‍എ പരിശോധനയില്‍ സ്ഥിരീകരണം വരും
കൊച്ചി: ഓര്‍മ്മ നഷ്ടപ്പെട്ട അച്ഛനെ തേടി കൊച്ചിയിലെ തെരുവുകളില്‍ അലയുകയാണ് മകന്‍ സാന്റോണ്‍ ലാമ എന്ന സണ്ണിയെ തേടിയെത്തുന്നത് വേദനിപ്പിക്കുന്ന വാര്‍ത്ത. കളശ്ശേരിയില്‍ കണ്ടെത്തിയ അജ്ഞാത മൃതഹേഹം സൂരജ് ലാമയുടേത് എന്നാണ് സംശയം. ഡിഎന്‍എ പരിശോധന നടത്തി ഇത് സ്ഥിരീകരിക്കും. ഇതിന് വേണ്ടി കുടുംബത്തെ കൊച്ചിയില്‍ എത്താന്‍ പോലീസ് ആവശ്യപ്പെട്ടു. കളമശ്ശേരി എച്ച്എംടിക്ക് സമീപം സൂരജ് ലാമയുടെതെന്ന് കരുതുന്ന മൃതദേഹം കണ്ടെത്തിയിട്ടുണ്ട്. ദിവസങ്ങള്‍ പഴക്കമുള്ള മൃതദേഹം അഴുകിയ നിലയിലാണ്. കുവൈത്ത് വിഷമദ്യ ദുരന്തത്തില്‍ കണ്ണിന് കാഴ്ച നഷ്ടപ്പെട്ട ലാമയെ കുവൈത്ത് അധികൃതര്‍ കൊച്ചിയിലേക്ക് നാടുകടത്തുകയായിരുന്നു. കൊച്ചി വിമാനത്താവളത്തില്‍ നിന്ന് കാണാതായ ലാമക്കായി ഹൈക്കോടതി നിര്‍ദേശപ്രകാരമുള്ള അന്വേഷണം നടക്കുന്നതിനിടെയാണ് ലാമയുടേതെന്ന് സംശയിക്കുന്ന മൃതദേഹം കണ്ടെത്തിയത്.
ലാമയുടെ കുടുംബത്തോട് അടിയന്തിരമായി കളമശ്ശേരിയില്‍ എത്താന്‍ പോലീസ് ആവശ്യപ്പെട്ടിട്ടുണ്ട്. മരിച്ചത് ലാമയെന്ന് സംശയം ഉണ്ടെന്നും ഇക്കാര്യം സ്ഥിരീകരിക്കാനുള്ള ശ്രമം നടക്കുന്നു എന്നും പോലീസ് പറഞ്ഞു. കുവൈത്തില്‍ ഹോട്ടല്‍ വ്യവസായിയും ബെംഗളൂരു സ്വദേശിയുമായ സൂരജ് ലാമ (59) യെ ഈ മാസം അഞ്ചിനാണ് കൊച്ചിയില്‍ കാണാതായത്. അന്നു പുലര്‍ച്ചെ 2.30-ന് അല്‍ജസീറ എയര്‍വേയ്സ് വിമാനത്തിലാണ് സൂരജ് കൊച്ചിയില്‍ എത്തിയത്. കറുത്ത ടീഷര്‍ട്ടും കറുത്ത പാന്റ്സുമാണ് കാണാതാകുമ്പോഴുള്ള വേഷം. കൈയില്‍ പണമോ വസ്ത്രമോ ഇല്ല. ഉണ്ടായിരുന്നത് പാസ്‌പോര്‍ട്ട് മാത്രം. വിമാനത്താവളത്തില്‍നിന്ന് പുറത്തുകടന്ന സൂരജ് ബസില്‍ ആലുവ മെട്രോ സ്റ്റേഷനിലെത്തി.
കൊല്‍ക്കത്തയില്‍ വേരുകളുള്ള ലാമ വര്‍ഷങ്ങള്‍ക്കു മുന്‍പ് ബെംഗളൂരുവിലെത്തിയതാണ്. അതിനിടയിലാണ് കുവൈത്തിലേക്ക് ബിസിനസിനായി പോയത്. കുവൈത്തില്‍ നാല് റസ്റ്ററന്റുകളുടെ ഉടമയാണ് സൂരജ്. സെപ്റ്റംബര്‍ അഞ്ചിന് കുവൈത്തില്‍ വെച്ച് കുഴഞ്ഞുവീണു. പത്തുദിവസത്തെ ചികിത്സയ്ക്കുശേഷം ജീവന്‍ തിരിച്ചു കിട്ടിയെങ്കിലും ഓര്‍മ്മ പൂര്‍ണമായും മറഞ്ഞു. ഇതിനിടെ വിസ കാലാവധി കഴിഞ്ഞെന്നു ചൂണ്ടിക്കാട്ടി കുവൈത്തില്‍നിന്ന് ഒക്ടോബര്‍ നാലിന് നാടുകടത്തി. ''സ്വന്തം കാര്യങ്ങള്‍ ചെയ്യാന്‍പോലും പരസഹായം ആവശ്യമായ സൂരജിനെ ബെംഗളൂരുവിനു പകരം കൊച്ചിയിലേക്കാണ് കുവൈത്ത് പോലീസ് കയറ്റിവിട്ടത്. ഓര്‍മ്മയില്ലാത്തയാളെ അയക്കുന്നത് കുടുംബത്തെയോ സുഹൃത്തുക്കളെയോ അറിയിച്ചില്ല.
സൂരജിനായി കുവൈത്തില്‍ നടത്തിയ അന്വേഷണത്തിലാണ് കൊച്ചിയിലേക്ക് കയറ്റിവിട്ട വിവരം ഒക്ടോബര്‍ ഏഴിന് കുടുംബം അറിഞ്ഞത്. ഭാര്യ റിന ലാമ പിറ്റേന്നുതന്നെ കൊച്ചിയിലെത്തി നെടുമ്പാശ്ശേരി പോലീസില്‍ പരാതി നല്‍കി. തുടര്‍ന്ന് സ്വന്തംനിലയ്ക്ക് അന്വേഷണം തുടങ്ങി. ആലുവ മുതല്‍ ഇടപ്പള്ളി വരെയുള്ള ഫ്‌ലൈ ഓവറുകളുടെയും പാലങ്ങളുടെയും അടിയിലും മാര്‍ക്കറ്റ്, മെട്രോ സ്റ്റേഷന്‍ പരിസരങ്ങളിലുമെല്ലാം തിരഞ്ഞു. ഒക്ടോബര്‍ 12-ന് മകന്‍ സണ്ണിയും കൊച്ചിയിലെത്തി. തിരച്ചിലേറെ നടത്തിയെങ്കിലും നിരാശയായിരുന്നു ഫലം. ഗൂഗിളില്‍ ജോലിചെയ്യുന്ന സണ്ണിക്ക് അവധി എടുത്ത് അച്ഛനെ തിരയുകയായിരുന്നു.
സൂരജ് ലാമയെ കണ്ടെത്താന്‍ ലുക്ക് ഔട്ട് നോട്ടിസ് പുറപ്പെടുവിച്ചിരുന്നു. നെടുമ്പാശേരി പൊലീസാണ് വിവരങ്ങള്‍ നല്‍കാനുള്ള ഫോണ്‍ നമ്പറുകള്‍ അടക്കം ലുക്ക് ഔട്ട് നോട്ടിസ് പുറപ്പെടുവിച്ചിരിക്കുന്നത്. ലാമയെ കണ്ടെത്താന്‍ പ്രത്യേക അന്വേഷണ സംഘം രൂപീകരിക്കാന്‍ നേരത്തെ ഹൈക്കോടതി നിര്‍ദേശം നല്‍കിയിരുന്നു. ഇതിന്റെ അടിസ്ഥാനത്തില്‍ ആലുവ ഡിവൈഎസ്പി ടി.ആര്‍.രാജേഷിന്റെ നേതൃത്വത്തിലാണ് അന്വേഷണ സംഘം രൂപീകരിച്ചിട്ടുള്ളത്. ഇതിനിടെയാണ് പുതിയ വിവരം കിട്ടുന്നത്.
പിതാവിനെ കണ്ടെത്തണമെന്ന് ആവശ്യപ്പെട്ട് മകന്‍ സന്ദന്‍ ലാമ സമര്‍പ്പിച്ച ഹേബിയസ് ഹര്‍ജിയിലാണ് പ്രത്യേക അന്വേഷണ സംഘം രൂപീകരിക്കാന്‍ ജസ്റ്റിസുമാരായ ദേവന്‍ രാമചന്ദ്രന്‍, എം.ബി.സ്‌നേഹലത എന്നിവരുടെ ബെഞ്ച് നിര്‍ദേശം നല്‍കിയത്. കുവൈറ്റില്‍ നിന്ന് ഈ മാസം അഞ്ചിന് നെടുമ്പാശേരി വിമാനത്താവത്തില്‍ വന്നിറങ്ങിയ ലാമയെ പിന്നീട് കാണാതാവുകയായിരുന്നു. കുടുംബത്തെ പോലും അറിയിക്കാതെയാണ് പിതാവിനെ പരിചയക്കാര്‍ പോലുമില്ലാത്ത കൊച്ചിയിലേക്ക് കയറ്റി വിട്ടതെന്ന് മകന്‍ ആരോപിച്ചിരുന്നു.
തുടര്‍ന്ന് പിതാവിനെ കാണാനില്ലെന്ന് മനസിലാക്കി മകന്‍ ബെംഗളൂരുവില്‍ നിന്നു കൊച്ചിയിലെത്തി അന്വേഷിക്കുകയും പലയിടത്തും വച്ച് കണ്ടതായ വിവരങ്ങള്‍ ശേഖരിച്ച് പൊലീസിനെ അറിയിക്കുകയും ചെയ്തിരുന്നു. എന്നിട്ടും പൊലീസിനു ലാമയെ കണ്ടെത്താന്‍ കഴിയാത്ത സാഹചര്യത്തിലാണ് സന്ദന്‍ ലാമ ഹൈക്കോടതിയെ സമീപിച്ചത്.