ഹൈക്കോടതി വിധിയില്‍ പറയാത്ത കാര്യങ്ങള്‍ കളവായി അച്ചടിച്ചു: മുന്‍ കോളജ് പ്രിന്‍സിപ്പാളിന് അപകീര്‍ത്തിയുണ്ടാക്കി: ജീവിതദൗത്യം മാസിക ചീഫ് എഡിറ്റര്‍ക്ക് ആറു മാസം തടവും അരലക്ഷം രൂപ പിഴയും
പത്തനംതിട്ട: കോളജ് പ്രിന്‍സിപ്പാളിനെ അപകീര്‍ത്തിപ്പെടുത്തുന്ന തരത്തില്‍ ലേഖനം പ്രസിദ്ധീകരിച്ച മാസികയുടെ ചീഫ് എഡിറ്ററെ കോടതി ശിക്ഷിച്ചു. കോട്ടയം മാങ്ങാനത്തു നിന്നുള്ള നവീകരണ വേദിയുടെ പ്രസിദ്ധീകരണമായ ജീവിത ദൗത്യത്തിന്റെ ചീഫ് എഡിറ്റര്‍ പ്രഫ. സി. മാമ്മച്ചനെയാണ് പത്തനംതിട്ട ചീഫ് ജുഡീഷ്യല്‍ മജിസ്ട്രേറ്റ് ഡി.എസ്. നോബെല്‍ ആറു മാസം തടവിനും അരലക്ഷം രൂപ പിഴയൊടുക്കാനും ശിക്ഷിച്ചത്. കോഴഞ്ചേരി സെന്റ് തോമസ് കോളജ് മുന്‍ പ്രിന്‍സിപ്പാള്‍ ഡോ. റോയ്സ് മല്ലശേരി നല്‍കിയ ഹര്‍ജിയിലാണ് ഉത്തരവ്. ജീവിത ദൗത്യം മാസികയുടെ 2017 ഏപ്രില്‍-ജൂണ്‍ ലക്കത്തില്‍ പ്രസിദ്ധീകരിച്ച ലേഖനമാണ് അപകീര്‍ത്തിയുണ്ടാക്കിയത്. പിഴ അടക്കുന്നില്ലെങ്കില്‍ മൂന്നു മാസം അധിക തടവ് അനുഭവിക്കണം.
കേരളാ ഹൈക്കോടതിയുടെ 2017 മാര്‍ച്ച് ഒന്നിന് ഉണ്ടായ വിധിയില്‍ രേഖപ്പെടുത്തിയിട്ടില്ലാത്ത വിവരങ്ങള്‍ കളവായി പ്രതി അച്ചടിച്ചു പരസ്യപ്പെടുത്തുകയും മാര്‍ത്തോമ്മാ സഭാ പ്രതിനിധി മണ്ഡല അംഗങ്ങള്‍ക്കു തപാല്‍ വഴി എത്തിക്കുകയും ചെയ്തു. മാസികയില്‍ പ്രസിദ്ധപ്പെടുത്തിയ വിവരങ്ങള്‍ സത്യ വിരുദ്ധമാണെന്നും ഡോ. റോയ്സ് മല്ലശ്ശേരിയെ അപമാനിക്കാന്‍ വേണ്ടി മാത്രമാണെന്നും കോടതി നിരീക്ഷിച്ചു. 2017 ലെ മാര്‍ത്തോമ്മാ സഭാ ഇലക്ഷന്‍ വേളയിലാണ് അപകീര്‍ത്തി പ്രചാരണം നടത്തിയത്. റോയ്സ് മല്ലശ്ശേരിക്ക് വേണ്ടി അഡ്വ. ജോര്‍ജ് എം. ജേക്കബ് കുമ്പനാട് ഹാജരായി.