നെയ്യാറ്റിന്‍കര ഗോപന് സ്വാമിയുടെ മരണ സര്‍ട്ടിഫിക്കറ്റ് ആവശ്യപ്പെട്ട് മകന്റെ അപേക്ഷ; മരണത്തിലെ ദൂരുഹതയില്‍ പോലീസ് അന്വേഷണം നടക്കുന്നതിനാല്‍ തല്‍ക്കാലം സര്‍ട്ടിഫിക്കറ്റ് നല്‍കാന്‍ കഴിയില്ലെന്ന് നഗരസഭ; സമാധിയിലേക്ക് ജനപ്രവാഹമെന്ന് കുടുംബത്തിന്റെ പ്രചരണവും വെറും തള്ള്..!
നെയ്യാറ്റിന്‍കര ഗോപന് സ്വാമിയുടെ മരണ സര്‍ട്ടിഫിക്കറ്റ് ആവശ്യപ്പെട്ട് മകന്റെ അപേക്ഷ
തിരുവനന്തപുരം: അച്ഛന്‍ മരിച്ചതല്ല, സമാധിയായതാണ് എന്നു പറഞ്ഞു വിവാദം സൃഷ്ടിച്ച മക്കള്‍ ഒടുവില്‍ മരണ സര്‍ട്ടിഫിക്കറ്റ് ആവശ്യപ്പെട്ട് രംഗത്ത്. വിവാദങ്ങളില്‍ നിറഞ്ഞ നെയ്യാറ്റിന്‍കര ഗോപന് സ്വാമിയുടെ മക്കളാണ് മരണ സര്‍ട്ടിഫിക്കറ്റ് ആവശ്യപ്പെട്ട് രംഗത്തുവന്നത്. സമാധി വിവാദങ്ങളില്‍ അന്വേഷണം പുരോഗമിക്കവെയാണ് ഇവരുടെ ആവശ്യം.
ഗോപന് മരിച്ചതല്ല സമാധിയായതാണ് എന്നായിരുന്നു കുടുംബം പറഞ്ഞിരുന്നത്. എന്നാല്‍ മരണത്തിലെ ദുരൂഹതയില്‍ പൊലീസ് അന്വേഷണം തുടരുന്നതിനാല്‍ തത്കാലം മരണ സര്‍ട്ടിഫിക്കറ്റ് നല്‍കാന്‍ കഴിയില്ലെന്ന് നെയ്യാറ്റിന്‍കര നഗരസഭ അറിയിച്ചു. ഗോപന് സമാധിയായെന്ന കുടുംബത്തിന്റെ അവകാശവാദം വലിയ വിവാദത്തിലേക്ക് നീങ്ങിയിരുന്നു. മരണത്തിലെ ദുരൂഹത ഉന്നയിച്ചുള്ള നാട്ടുകാരുടെ പരാതിയില്‍ പൊലിസ് അന്വേഷണം നടക്കുന്നതിനിടെയാണ് കുടുംബം മരണ സര്‍ട്ടിഫിക്കറ്റ് ആവശ്യപ്പെടുന്നത്. ഇളയ മകന്‍ രാജസേനന്‍ മരണ സര്‍ട്ടിഫിറ്റ് വേണമെന്ന അപേക്ഷയുമായി കഴിഞ്ഞ ദിവസം നെയ്യാറ്റിന്‍കര നഗരസഭയിലെത്തി.
കുടുംബം നല്‍കിയ കേസ് പരിഗണിക്കവെ ഹൈക്കോടതിയും മരണ സര്‍ട്ടിഫിക്കറ്റ് എവിടെയെന്ന് ചോദിച്ചിരുന്നു. പക്ഷെ ഗോപന് മരിച്ചതല്ലെന്ന നിലപാടിലായിരുന്നു അന്ന് കുടുംബം. ഇതിനിടെ മൃതദേഹം പുറത്തെടുത്ത് പോസ്റ്റുമോര്‍ട്ടം നടത്തി. മരണ കാരണം ഇനിയും വ്യക്തമായിട്ടുമില്ല. ആന്തരിക അവയവങ്ങളുടെ രാസ പരിശോധന ഫലം വന്നാല്‍ മാത്രമേ മരണ കാരണം വ്യക്തമാവുകയുള്ളൂ. പോസ്റ്റ്‌മോര്‍ട്ടം പരിശോധനകള്‍ക്ക് ശേഷം ഗോപനെ വീണ്ടും സംസ്‌കരിക്കുകയും ചെയ്തു.
എന്നാല്‍ മരണത്തിലെ ദുരൂഹതയെ കുറിച്ചുള്ള അന്വേഷണം അവസാനിക്കാത്തിതിനാല്‍ മരണ സര്‍ട്ടിഫിക്കറ്റിനുള്ള അപേക്ഷ നഗരസഭ അധികൃതര്‍ സ്വീകരിച്ചില്ല. പൊലിസ് റിപ്പോര്‍ട്ട് വന്നതിന് ശേഷം മരണ സര്‍ഫിക്കറ്റ് സംബന്ധിച്ച തീരുമാനമെടുക്കാമെന്നാണ് നഗരസഭ അധികൃതര്‍ പറയുന്നത്. ഗോപന് ഹൃദ്രോഗവും പ്രമേഹ രോഗവും ഉണ്ടായിരുന്നുവെന്ന പോസ്റ്റ്‌മോര്‍ട്ടം ചെയ്ത ഡോക്ടര്‍മാര്‍ അറിയിച്ചിരുന്നു.
അതേസമയം ഗോപന് സ്വാമിയുടെ സമാധിയിലേക്ക് ഭക്തരുടെ ഒഴുക്കാണെന്നാണ് മക്കള്‍ പ്രചരിപ്പിച്ചത്. അത് വാസ്തവമാണോ എന്നറിയാന്‍ ചില ചാനലുകള്‍ ഗോപന്‍സ്വാമിയുടെ വീട്ടിലേക്ക് പോയിരുന്നു. എന്നാല്‍, ഇത് വെറും പ്രചരണം മാത്രമാണെന്നതാണ് വസ്തുത. സമാധിയിലേക്ക് ആരുൂം തന്നെ എത്തുന്നില്ല. സമാധിയില്‍ ഗോപന്‍സ്വാമിയുടെ മകതന്‍ സനന്ദന്‍ മണിയടിച്ചും, നിലവിളക്ക് ഉഴിഞ്ഞും പ്രാര്‍ത്ഥനയും പൂജയും നടത്തുന്നുണ്ട്.
ഭക്തരുടെ തള്ളലോ, ഭക്തി നിര്‍ഭരമായ അന്തരീക്ഷമോ അവിടില്ല. സാധാരണ ഒരു വീടും പരിസരവും, മരിച്ചുപോയവരെ അടക്കിയ കല്ലറയും എന്നതിനപ്പുറം ഗോപന്‍സ്വാമിക്ക് ഒരു ദൈവീകയും ആരും നല്‍കുന്നില്ല എന്നര്‍ത്ഥം. പക്ഷെ, മകന്‍ സനന്ദനും കുടുംബവും പറയുന്നത്, അച്ഛന്‍ ദൈവമാണെന്നാണ്. ദൈവതുല്യര്‍ക്കല്ലാതെ മറ്റാര്‍ക്കും സമാധിയാകാന്‍ പറ്റില്ലെന്നാണ്. ഇനി ഗോപന്‍സ്വാമിയെ അച്ഛനെന്നോ, സ്വാമിയെന്നോ വിളിക്കാന്‍ പാടില്ലെന്നും മക്കള്‍ പറയുന്നുണ്ട്.
സ്വാമിയുടെ മരണസര്‍ട്ടിഫിക്കറ്റ് ഹാജരാക്കിയില്ലെങ്കില്‍ അതൊരു അസ്വാഭാവിക മരണമായി കണക്കാക്കേണ്ടി വരുമെന്നു കോടതി വ്യക്തമാക്കിയതോടെയാണ് സമാധിപീഠം പൊളിക്കുന്നത് തടയണമെന്ന് ആവശ്യപ്പെട്ട് ഗോപന്‍സ്വാമിയുടെ കുടുംബം നല്‍കിയ ഹര്‍ജിയിലാണ് ഹൈക്കോടതി സുപ്രധാന നിലപാട് സ്വീകരിച്ചത്. മണിയന്‍ എന്ന ഗോപന് സ്വാമിയെ(69) പത്മപീഠത്തിലിരുത്തി കോണ്‍ക്രീറ്റ് അറയില്‍ സംസ്‌കരിച്ചെന്നാണ് മക്കള്‍ പോലീസിനു നല്‍കിയ മൊഴി. ഇത് ശരിയാണെന്നാമ് കല്ലറ പൊളിച്ചു പരിശോധിച്ചപ്പോള്‍ വ്യക്തമായ കാര്യം.