ചൂണ്ടയിടുന്നതിനിടെ അബദ്ധത്തില്‍ വെള്ളത്തിലേക്ക്; ഉടന്‍ തന്നെ അഗ്നിരക്ഷാസേന സ്ഥലത്തെത്തി രക്ഷാപ്രവര്‍ത്തനം നടത്തി; കുട്ടിയെ കണ്ടെത്തി ഉടന്‍ ആശുപത്രിയിലേക്ക് കൊണ്ടുപോകുന്നതിനിടെ ഗേറ്റ് അടച്ചു; കുട്ടിയെ മാറോടണച്ച് മാധ്യമപ്രവര്‍ത്തകന്‍ റെയില്‍പാളം മുറിച്ചുകടന്ന് ഓടി; ഓട്ടോയില്‍ ആശുപത്രിയില്‍ എത്തിച്ചെങ്കിലും കുട്ടിയുടെ ജീവന്‍ രക്ഷിക്കാനായില്ല; കണ്ണീരോടെ തൃക്കരിപ്പൂര്‍ വാസികള്‍
തൃക്കരിപ്പൂര്‍: വലിയപറമ്പ് ബീരാന്‍കടവ് ബോട്ടുജെട്ടിക്ക് സമീപം വെള്ളത്തില്‍ വീണ 13കാരനെ രക്ഷിക്കാന്‍ നാട്ടുകാരും അഗ്നിരക്ഷാസേനയും നടത്തിയ പരിശ്രമം പരാജയമായി. ജീവന്‍ രക്ഷിക്കാനായില്ല. ശനിയാഴ്ച ഉച്ചയ്ക്ക് 12 മണിയോടെയായിരുന്നു ഹൃദയഭേദകമായ സംഭവം. വലിയപറമ്പ് സ്വദേശിയായ ഇ.എം.ബി. മുഹമ്മദ് (13) ആണ് മരിച്ചത്. ചൂണ്ടയിടുന്നതിനിടെ അബദ്ധത്തില്‍ വെള്ളത്തിലേക്ക് വീണതാണ് ദുരന്തത്തിന് കാരണമായത്. വിവരം ലഭിച്ച ഉടന്‍ തന്നെ തൃക്കരിപ്പൂര്‍ അഗ്നിരക്ഷാസേന സ്ഥലത്തെത്തി കുട്ടിയെ വെള്ളത്തില്‍ നിന്ന് പുറത്തെടുത്തു. എന്നാല്‍ ജീവന്‍ നിലനിര്‍ത്താന്‍ വേണ്ടി ആശുപത്രിയിലേക്ക് കൊണ്ടുപോകുന്നതിനിടെ വെള്ളാപ്പ് റെയില്‍വേ ഗേറ്റ് അടഞ്ഞു. കാസര്‍കോട് ഭാഗത്തേക്ക് വന്ദേഭാരത് കടന്നുപോകുന്നതിനാലാണ് ഗേറ്റ് അടച്ചത്.
ഗേറ്റ് തുറക്കാന്‍ സമയം എടുക്കുമെന്ന് മനസ്സിലായതോടെ കുട്ടിയുടെ ജീവന്‍ രക്ഷിക്കാന്‍ വേണ്ടി തൃക്കരിപ്പൂരിലെ പ്രാദേശിക ടിവി ചാനല്‍ ടിസിഎന്‍ ക്യാമറാമാന്‍ എ.ജി. ഷാക്കിര്‍ കുട്ടിയെ മാറോടണച്ച് ഓടി. ഗേറ്റിന്റെ മറുവശത്ത് നാട്ടുകാര്‍ കുട്ടിയെ ഏറ്റുവാങ്ങി. ഷാക്കിര്‍ മുന്‍കൂട്ടി ഒരുക്കിയിരുന്ന ഓട്ടോറിക്ഷയില്‍ കയറ്റി ആശുപത്രിയിലേക്കും മാറ്റി. നാട്ടുകാരും അഗ്നിരക്ഷാസേനാ ജീവനക്കാരും പിന്തുണച്ചു. എന്നാല്‍ അഞ്ചു മിനിറ്റോളം താമസിച്ചതിനാല്‍ കുട്ടിയുടെ ജീവന്‍ നിലനിര്‍ത്താനായില്ല.
''ഗേറ്റ് അടഞ്ഞിരുന്നില്ലെങ്കില്‍ ഒരുപക്ഷേ കുട്ടിയെ രക്ഷിക്കാനായേനേ'' എന്നായിരുന്നു നാട്ടുകാരുടെ വേദനാഭരിതമായ പ്രതികരണം. ''സ്വന്തം ജീവന്‍ അവഗണിച്ചും ഓടിയിട്ടും ഒന്നും ചെയ്യാനായില്ല'' എന്ന നിരാശയിലാണ് ഷാക്കിര്‍. കുട്ടി അപകടത്തില്‍പ്പെട്ട വിവരം ശേഖരിക്കാന്‍ ബീരാന്‍കടവിലേക്ക് പോയ ഷാക്കിര്‍ തിരിച്ചുവരുമ്പോള്‍ തന്നെ ഗേറ്റ് അടക്കുന്നത് കണ്ടിരുന്നു. അപകടത്തില്‍പ്പെട്ട കുട്ടിയെ ആശുപത്രിയിലേക്ക് കൊണ്ടുപോകുകയാണെന്നും അടക്കരുതെന്നും ഗേറ്റ്മാനോട് അഭ്യര്‍ത്ഥിച്ചിരുന്നു. പക്ഷേ വന്ദേഭാരത് കടന്നുപോകാന്‍ സമയമായതിനാല്‍ തുറക്കാനാവില്ലെന്ന് ഗേറ്റ്മാന്‍ വളരെ ദുഃഖത്തോടെ മറുപടി നല്‍കി.
മറുവശത്ത് എത്തിയിരുന്ന ഒരു കുടുംബത്തെ ഓട്ടോറിക്ഷയില്‍ നിന്ന് ഇറക്കി വാഹനം തയ്യാറാക്കിക്കൊണ്ടിരിക്കെയാണ് അഗ്നിരക്ഷാസേന ഗേറ്റിന്റെ അടുത്ത് എത്തിയത്. ഉടന്‍ തന്നെ കുട്ടിയെ ഏറ്റെടുത്ത് ഷാക്കിര്‍ ഓടുകയായിരുന്നു. ആഴംകൂട്ടിയ ബോട്ട് ചാലിലെ ചെളിയില്‍ പൂണ്ടുപോയ നിലയിലാണ് അഗ്നിരക്ഷാസേന മുഹമ്മദിനെ കണ്ടെത്തിയത്. ചന്തേര പൊലീസ് ഇന്‍ക്വസ്റ്റ് നടത്തി. മൃതദേഹം പോസ്റ്റ്‌മോര്‍ട്ടത്തിനായി പരിയാരത്തെ കണ്ണൂര്‍ ഗവ. മെഡിക്കല്‍ കോളേജിലേക്ക് മാറ്റി. ഇളമ്പച്ചി ഗുരു ചന്തുപ്പണിക്കര്‍ സ്മാരക ഗവ. ഹയര്‍ സെക്കന്‍ഡറി സ്‌കൂളിലെ എട്ടാം ക്ലാസ് വിദ്യാര്‍ത്ഥിയായിരുന്നു മുഹമ്മദ്. പിതാവ്: ഇ.എം.ബി. നിസാര്‍ (പെയിന്റിങ് തൊഴിലാളി), മാതാവ്: കെ.പി. സമീറ, സഹോദരി: ജുമാന.
അഞ്ച് മിനിറ്റ് സമയം നഷ്ടമായതില്‍ നാട്ടുകാര്‍ വലിയ പ്രതിഷേധമാണ് പ്രകടിപ്പിക്കുന്നത്. ''ട്രെയിന്‍ കടന്നുപോകുന്നതിന് മുന്‍പ് പോലും ഗേറ്റ് തുറക്കാന്‍ സാധിച്ചിരുന്നില്ലേ. കുട്ടിയെ രക്ഷിക്കാന്‍ അവസരം നഷ്ടമായി'' എന്ന് നാട്ടുകാര്‍ കുറ്റപ്പെടുത്തി. പ്രദേശവാസികളുടെ കണ്ണീര്‍ നിറഞ്ഞ യാത്രയയപ്പോടെ കുട്ടിയെ അന്തിമ വിശ്രമത്തിനായി കൊണ്ടുപോയി. തൃക്കരിപ്പൂര്‍ മുഴുവന്‍ തന്നെ ദുഃഖത്തില്‍ മുങ്ങിയിരിക്കുകയാണ്.