നീല ജീന്സും വെളള ഷര്ട്ടും വെളളി മാലയും വെള്ള ക്രോക്സും; പള്സര് സുനിയെ കണ്ടപ്പോഴെല്ലാം ഒരേ വേഷത്തില്; ഒരാളെ തട്ടിക്കൊണ്ടുപോകുന്നത് വലിയ കാര്യമല്ല; കോഴിയെ പിടിക്കുന്നതു പോലെ എളുപ്പമാണത്, വലിയ റിസ്കൊന്നുമില്ല': ചിരിച്ചുകൊണ്ട് പറയുമ്പോള് കൂള്; ന്യൂസ് മിനിറ്റിന് മുമ്പ് സുനി നല്കിയ അഭിമുഖത്തില് ആദ്യം മുഴക്കുന്നതും ഭീഷണി
പള്സര് സുനിയെ കണ്ടപ്പോഴെല്ലാം ഒരേ വേഷത്തില്
തിരുവനന്തപുരം: നടിയെ ആക്രമിച്ച കേസില്, ഒന്നാം പ്രതി പള്സര് സുനി കുറ്റക്കാരനെന്ന് സെഷന്സ് കോടതി കണ്ടെത്തിയതിന് പിന്നാലെ സുനി ' ദി ന്യൂസ് മിനിറ്റിന് ' മുമ്പ് നല്കിയ അഭിമുഖത്തിലെ വിവരങ്ങള് ചര്ച്ചയാകുന്നു. കര്ശനമായ ഉപാധി വ്യവസ്ഥകളോടെയാണ് 2024 സെപ്റ്റംബറില് സുപ്രീംകോടതി സുനിക്ക് ജാമ്യം അനുവദിച്ചത്. മാധ്യമങ്ങളുമായി സംസാരിക്കുന്നതിന് വിലക്കുണ്ടായിട്ടും, ഒരുമാസത്തിന് ശേഷം ന്യൂസ് മിനിറ്റിന്റെ 'നിധി സുരേഷു'മായി സംസാരിക്കാന് സുനി തയ്യാറായി.
ഭീഷണി മുഴക്കി കൊണ്ടാണ് ആദ്യം സുനി നിധിയോട് സംഭാഷണം തുടങ്ങുന്നത്. 'ഞങ്ങളുടെ ആദ്യത്തെ ഹ്രസ്വമായ ഫോണ് സംഭാഷണത്തിന്റെ അവസാനത്തില്, അദ്ദേഹം ശാന്തനായി പറഞ്ഞു: ''ഞാന് നിങ്ങളോട് സംസാരിച്ച വിവരം പുറത്തറിഞ്ഞാല് എനിക്ക് മാത്രമല്ല, നിങ്ങള്ക്കും പ്രശ്നമാകും. എന്നെ തെറ്റിദ്ധരിക്കരുത്, ഇതൊരു ഭീഷണിയാണ്.''
അടുത്ത പതിമൂന്ന് മാസങ്ങളില്, സുനി ഒന്നിലധികം തവണ ഫോണിലൂടെയും നാല് തവണ നേരിട്ടും നിധി സുരേഷിനോട് സംസാരിച്ചു. അതിക്രമത്തില് തനിക്കുള്ള പങ്ക് രേഖാമൂലം ഒരു മാധ്യമത്തോട് വിശദീകരിക്കാന് സുനി സമ്മതിച്ചത് അന്നാദ്യമായിരുന്നു.
2025 ഏപ്രിലില്, റിപ്പോര്ട്ടര് ടിവി ഒരു ഒളിക്യാമറ ഓപ്പറേഷന് നടത്തിയപ്പോഴാണ് സുനി മാധ്യമത്തോട് സംസാരിച്ച മറ്റൊരു സംഭവം. ഒരു ടിവി ജേണലിസ്റ്റിനോട് സംസാരിച്ചത് എന്തുകൊണ്ടാണെന്ന് ചോദിച്ചപ്പോള്, സംഭാഷണം റെക്കോഡ് ചെയ്യുന്നുണ്ടെന്ന് തനിക്ക് അറിയാമായിരുന്നെന്നും എന്നാല് അത് ഉടന് സംപ്രേഷണം ചെയ്യുമെന്ന് കരുതിയില്ലെന്നും സുനി പറഞ്ഞു. സുനി സത്യസന്ധമായി പറയുകയാണോ അതോ ക്യാമറയില് കുടുങ്ങിയതിന്റെ ചമ്മലാണോ എന്ന് പറയാന് പ്രയാസമായിരുന്നു.
സംഭാഷണങ്ങളില്, അദ്ദേഹം തന്റെ കുറ്റം നിസ്സംശയം സമ്മതിച്ചു. താന് യുവതിയെ തട്ടിക്കൊണ്ടുപോയി. ഫോണ് ഉപയോഗിച്ച്, ലൈംഗികമായി പീഡിപ്പിക്കുന്നതിന്റെ എട്ട് ക്ലിപ്പുകള് റെക്കോഡ് ചെയ്തു. ഇത് ചെയ്തത്, തന്നെ വാടകക്കെടുത്ത ആളുടെ നിര്ദ്ദേശപ്രകാരമാണെന്നും അദ്ദേഹം അവകാശപ്പെട്ടു.
എന്നാല് ഇവിടെയാണ് സുനിയുടെ വൈരുദ്ധ്യങ്ങള് നിലനില്ക്കുന്നത്. കോടതിയില് ചെന്നപ്പോള് സുനി മലക്കം മറിഞ്ഞു. ഗൂഢാലോചനയില് തനിക്ക് യാതൊരു പങ്കുമില്ലെന്ന് പറയുകയും, അതിക്രമത്തിന്റെ വിശദാംശങ്ങളോ പണത്തിന്റെ വഴിയോ വെളിപ്പെടുത്താന് വിസമ്മതിക്കുകയും ചെയ്തു, ഇത് ആത്യന്തികമായി കേസിനെ ദുര്ബലപ്പെടുത്തി. ന്യൂസ് മിനിറ്റിന് വേണ്ടി ഒരു ടെക്സ്റ്റ് സ്റ്റോറി അഭിമുഖം നല്കാന് സുനി സമ്മതിച്ചു. എന്നാല് ക്യാമറയുടെ മുമ്പില് ഇതേ കാര്യങ്ങള് പറയാന് വിസമ്മതിച്ചു.
2024 ഒക്ടോബറില് നിധിയെ ആദ്യമായി കണ്ടുമുട്ടിയപ്പോള്, കുറ്റകൃത്യത്തിന്റെ വിശദാംശങ്ങളിലേക്ക് കടക്കാന് സുനി തയ്യാറായില്ല. കോടതിയില് മൊഴി നല്കാനായിരുന്നു അദ്ദേഹത്തിന്റെ പ്ലാന്, ന്യായാധിപനോട് സത്യസന്ധത പുലര്ത്തണം എന്നാണ് സുനി പറഞ്ഞത്. ജയിലിലെ യോഗാധ്യാപകന് തന്റെ ജീവിതം മാറ്റിമറിച്ചെന്ന് അദ്ദേഹം അവകാശപ്പെട്ടു. 'സത്യം പറഞ്ഞു തുടങ്ങാന്' യോഗാ പരിശീലനം പഠിപ്പിച്ചുവെന്നും, എന്നാല് തന്റെ അഭിഭാഷകന് അതില് സന്തോഷമുണ്ടായിരുന്നില്ലെന്നും സുനി പറഞ്ഞു. ദിവസങ്ങള്ക്ക് ശേഷം, അദ്ദേഹം ജഡ്ജിയുടെ മുന്നില് ഹാജരായി, സത്യം ചെയ്ത് കള്ളം പറഞ്ഞു.
'ഫോണ്' രഹസ്യം: പുറത്തുപറയില്ലെന്ന് വാക്ക്!
കേസിലെ സുപ്രധാനമായതും എന്നാല് കണ്ടെത്താനാകാത്തതുമായ തെളിവാണ് നടി ആക്രമിക്കപ്പെടുമ്പോള് ദൃശ്യങ്ങള് പകര്ത്തിയ മൊബൈല് ഫോണ്. ഈ ഫോണിനെക്കുറിച്ച് സംസാരിക്കാന് സുനി വിസമ്മതിച്ചു.
'ആ ഫോണ് എവിടെയാണെന്ന് ഞാന് ഒരിക്കലും നിങ്ങളോടോ മറ്റാരോടെങ്കിലുമോ പറയില്ല,' സുനി ഉറപ്പിച്ചു പറഞ്ഞു. അത് ഇപ്പോഴും ഉണ്ടോ അതോ നശിപ്പിച്ചോ എന്ന ചോദ്യത്തിന്, 'ഞാന് നിങ്ങളോട് ഒരുപാട് കാര്യങ്ങള് പറഞ്ഞു കഴിഞ്ഞു. ഇത് ഞാന് ഒരാളോട് ചെയ്ത വാഗ്ദാനമാണ് ഫോണിനെക്കുറിച്ച് സംസാരിക്കില്ലെന്ന്. ഞാന് എപ്പോഴും വാക്കു പാലിക്കും' എന്നായിരുന്നു സുനിയുടെ മറുപടി.
'യുവതി' ആക്രമിക്കപ്പെടുമ്പോള് താന് കാറില് ഉണ്ടായിരുന്നില്ലെന്ന് അദ്ദേഹം കോടതിയില് പറഞ്ഞു. എന്നാല് ആക്രമിക്കാനുള്ള ഗൂഢാലോചനയെക്കുറിച്ച് തനിക്ക് അറിവുണ്ടായിരുന്നെന്നും സമ്മതിച്ചു. ദിലീപുമായി താന് ബന്ധപ്പെട്ടിരുന്നുവെന്നും, നടന്റെ ഭാര്യക്കും സുഹൃത്തുക്കള്ക്കും വേണ്ടി താന് പലപ്പോഴും ജോലി ചെയ്തിട്ടുണ്ടെന്നും അദ്ദേഹം സമ്മതിച്ചു.
എന്തുകൊണ്ടാണ് ഇത്ര പ്രകടമായി കള്ളം പറഞ്ഞതെന്ന് ചോദിച്ചപ്പോള്, ''കോടതിയില് അങ്ങനെ മാത്രമേ സംസാരിക്കാന് കഴിയൂ,'' എന്ന് അദ്ദേഹം നിസ്സംഗതയോടെ പറഞ്ഞു. ചിരിച്ചുകൊണ്ട് അദ്ദേഹം ഒരിക്കല് പറഞ്ഞു, ''ഒരാളെ തട്ടിക്കൊണ്ടുപോകുന്നത് വലിയ കാര്യമല്ല. തെരുവില് നിന്ന് ഒരു കോഴിയെ പിടിക്കുന്നതു പോലെ എളുപ്പമാണത്. വലിയ റിസ്കൊന്നുമില്ല,''
ആദ്യമായി ഫോണിലൂടെ സുനിയോട് സംസാരിച്ചപ്പോള്
'ഞാന് കേട്ടല്ലോ, നിങ്ങള് 'ആ ആളെ' കണ്ടെന്ന്,' സുനി പറഞ്ഞു, അദ്ദേഹം വ്യക്തമായും ദിലീപിനെയാണ് ഉദ്ദേശിച്ചത്. 'അദ്ദേഹം എന്നെക്കുറിച്ച് എന്താണ് പറഞ്ഞത്?'
സുനി സംസാരിച്ചത് 2024 ഫെബ്രുവരിയില് നിധി സുരേഷ്, ദിലീപുമായി നടത്തിയ കൂടിക്കാഴ്ചയെക്കുറിച്ചാണ്. നടനുമായുള്ള തന്റെ സംഭാഷണം പൊതുവായ ഒന്നായിരുന്നുവെന്നും, സ്ത്രീകളെ താന് വളരെയധികം ബഹുമാനിക്കുന്നു എന്ന് അദ്ദേഹം ഊന്നിപ്പറഞ്ഞുവെന്നും നിധി സുനിയോട് പറഞ്ഞു. ഇത് കേട്ട് സുനി ചിരിച്ചു. 'യഥാര്ത്ഥത്തില്, എനിക്ക് മനസ്സിലാക്കാത്തത്, ഞാന് സ്ത്രീകളെ ബഹുമാനിക്കുന്നില്ലെന്ന് ആളുകള് പറയുന്നത് എന്തുകൊണ്ടാണെന്നാണ്. ഞാനും സ്ത്രീകളെ ബഹുമാനിക്കുന്നുണ്ട്. അല്ലേ?'
നിധിയുടെ വാക്കുകള് ഇങ്ങനെ:
ഒരാഴ്ചയ്ക്ക് ശേഷം താന് സുനിയെ കാണാനായി കൊച്ചിയിലേക്ക് പറന്നു. സഹപ്രവര്ത്തക മരിയയ്ക്കൊപ്പമാണ് പോയത്. ഒരിക്കലും ഒറ്റയ്ക്ക് പോയില്ല.
മിക്കപ്പോഴും സുനി ഒരേ വേഷത്തിലായിരുന്നു. നീല ജീന്സ്, വെള്ള ഷര്ട്ട്, ഒരു വെള്ളിമാല, വെള്ള ക്രോക്സ്. ഒരു തവണ മാത്രം നീല നിറത്തിലുള്ള സ്വെറ്റര് ധരിച്ചിരുന്നു. കൊച്ചിയില് അന്ന് കഠിനമായ ചൂടായിരുന്നു, ഈ വേഷം എങ്ങനെ ചൂടത്ത് ധരിക്കുന്നു എന്ന് ചോദിച്ചു. 'ഞാന് നിങ്ങളെപ്പോലെയല്ല. ഞാന് എപ്പോഴും എസിയിലാണ് ഇരിക്കുന്നത്,' സുനി വിശദീകരിച്ചു.
സുനിയുടെ കണ്ണുകള് അസ്വസ്ഥമായിരുന്നു. ഉത്കണ്ഠാഭരിതനാണെന്ന് ഒന്നിലധികം തവണ അവകാശപ്പെട്ടപ്പോഴും അദ്ദേഹത്തിന്റെ ശബ്ദം ശാന്തവും ഒരേപോലെ താഴ്ന്നതുമായിരുന്നു.
'എന്നെ ശാന്തനാക്കാന് നിങ്ങള് സഹായിക്കാമോ?' അദ്ദേഹം പലപ്പോഴും ചോദിച്ചു. ആദ്യ കൂടിക്കാഴ്ച കൊച്ചിയിലെ ആളൊഴിഞ്ഞ ഒരു റെസ്റ്റോറന്റിലായിരുന്നു.
19 വയസ്സു മുതല് സുനി പലതവണ ജയിലിന് അകത്തും പുറത്തും ആയിട്ടുണ്ട്. മയക്കുമരുന്ന്, മോഷണം, കവര്ച്ച, കള്ളപ്പണം വെളുപ്പിക്കല്, തട്ടിക്കൊണ്ടുപോകല്, ഒടുവില് ഇപ്പോള് ബലാത്സംഗം, സുനി പറഞ്ഞു. ഒരു പതിറ്റാണ്ടിലേറെയായി, ഒന്നുകില് ജയിലിനുള്ളിലോ, ഒളിച്ചോടിയോ, അല്ലെങ്കില് ജയില്വാസത്തിനിടയില് ജീവിതം നയിക്കാന് ശ്രമിക്കുകയോ ചെയ്യുന്നു.
'ഇതാണ് ഞാന് ഇപ്പോള്. എനിക്കിനി ഒരു ക്രിമിനല് അല്ലാതെ മറ്റൊരാളാകാന് അറിയില്ല,' സുനി നിധിയോട് പറഞ്ഞു. 'വിധി വരുന്നതിനുമുമ്പ് ഞാന് മറ്റൊരു കുറ്റം ചെയ്യുന്നില്ലെന്ന് ഉറപ്പാക്കണം. എന്റെ ജാമ്യം റദ്ദാക്കാന് ഞാന് ആഗ്രഹിക്കുന്നില്ല.'
ഒഴിഞ്ഞുമാറുന്ന ഒരു രീതി സുനിക്കുണ്ടായിരുന്നു എന്തെങ്കിലും വെളിപ്പെടുത്താന് താല്പ്പര്യമില്ലാത്തപ്പോള് ശ്രദ്ധ മാറ്റുകയും അവ്യക്തമായി സംസാരിക്കുകയും ചെയ്തു. ആദ്യ സംഭാഷണങ്ങളില്, ഓരോ തവണയും ഒരേ ചോദ്യം ചോദിച്ചു. 'അപ്പോള്, സുനി, അന്ന് രാത്രി ശരിക്കും എന്താണ് സംഭവിച്ചത്? നിങ്ങള് അത് ചെയ്തോ?'
'അതെ, ഞാന് ചെയ്തു,' അദ്ദേഹം ഒരു തവണ പറഞ്ഞു. 'ഞാന് നിങ്ങളോട് അതിനെക്കുറിച്ച് പറയാം... പക്ഷേ ആദ്യം എനിക്ക് കോടതിയോട് പറയണം.'
നിങ്ങള് എന്തിനാണ് ഈ കുറ്റം ചെയ്തതെന്ന് ചോദിച്ചു.
'നോക്കൂ, എനിക്കൊരു പ്രശ്നമുണ്ട്. എനിക്ക് അമിതമായ സഹായിക്കാനുള്ള സ്വഭാവമുണ്ട്. ആരെങ്കിലും എന്നോട് എന്തെങ്കിലും ചെയ്യാന് ആവശ്യപ്പെട്ടാല്, എനിക്ക് 'ഇല്ല' എന്ന് പറയാന് കഴിയില്ല,' അദ്ദേഹം മറുപടി പറഞ്ഞു.
പശ്ചാത്താപമില്ലാത്ത ഒരു ക്രിമിനലിന്റെ മനസ്സാണ് പള്സര് സുനിയുടേതെന്ന് നിധി സുരേഷിന്റെ റിപ്പോര്ട്ടില് പറയുന്നു.