കുട്ടികള്‍ക്ക് പൊക്കം കുറവായതിനാല്‍ കടിയേല്‍ക്കുന്നത് അരയ്ക്ക് മുകളില്‍; ഇത് വൈറസ് പെട്ടെന്ന് തലച്ചോറിലെത്താന്‍ കാരണമാകുന്നു; കടിയുടെ ആഴം കൂടുന്നതും ഞരമ്പില്‍ നേരിട്ട് കടിക്കുന്നതും വൈറസ് പെട്ടെന്ന് തലച്ചോറിലെത്താന്‍ കാരണം; കുത്തിവെപ്പ് എടുത്തിട്ടും പേവിഷബാധ; ചികിത്സയില്‍ കഴിയുന്നവരില്‍ വലിയ പങ്കും കുട്ടികള്‍; ആശങ്ക കൂട്ടി ഈ നിരീക്ഷണങ്ങള്‍
കൊല്ലം: പ്രതിരോധകുത്തിവെപ്പ് എടുത്തിട്ടും പേവിഷബാധയേറ്റ് ചികിത്സയില്‍ കഴിയുന്നവരില്‍ വലിയ പങ്കും കുട്ടികളാണെന്ന് ആരോഗ്യ വകുപ്പിന്റെ റിപ്പോര്‍ട്ട്. കുട്ടികളുടെ ഉയരം കുറവായതിനാല്‍ നായയുടെ കടിയേല്‍ക്കുന്നത് പലപ്പോഴും അരയ്ക്ക് മുകളിലേക്കാണ്. അതുകൊണ്ട് തന്നെ വൈറസ് പെട്ടെന്ന് നേരിട്ട് തലച്ചോറിലേക്ക് എത്താനുള്ള സാധ്യത വളരെ വലുതാണെന്ന് ആരോഗ്യ വിദഗ്ധര്‍ വ്യക്തമാക്കുന്നു.
റാബ്‌ഡോവിറിഡേ കുടുംബത്തിലെ ആര്‍എന്‍എ വൈറസായ റാബിസ് വൈറസ്, ബുള്ളറ്റിനൊപ്പം സമാനമായ ആകൃതിയുള്ളതും അതിവേഗം നാഡീമണ്ഡലത്തിലേക്ക് സഞ്ചരിക്കുന്നതുമായ ഘടനയാണ്. വൈറസ് വ്യാപനത്തില്‍ പ്രധാന പങ്ക് വഹിക്കുന്ന ഘടകങ്ങളിലൊന്നാണ് കടിയുടെ ആഴം. നാഡികളെ നേരിട്ട് ബാധിക്കുന്ന തരത്തില്‍ നായ കടിച്ചാല്‍, വൈറസ് വളരെ വേഗത്തില്‍ തലച്ചോറിലേക്ക് എത്തുമെന്നും അവര്‍ ചൂണ്ടിക്കാട്ടുന്നു.
പേവിഷം പടരുന്നത് സാധാരണ പനിയുടെ ലക്ഷണങ്ങള്‍ക്കൊപ്പം തുടങ്ങുന്നതാണ്. ശരീരചൂട്, തലവേദന, ക്ഷീണം, ഛര്‍ദ്ദി തുടങ്ങിയവ. എന്നാല്‍, കടിയേറ്റ സ്ഥലത്തെ തരിപ്പ്, വേദന, ചൊറിച്ചില്‍ എന്നിവയെ അവഗണിക്കരുത്. ഇത് വൈറസ് നാഡീമണ്ഡലത്തെ ബാധിച്ചെന്ന ലക്ഷണമായിരിക്കാം. രോഗം മൂര്‍ച്ചിച്ചാല്‍ ഇത് മസ്തിഷ്‌കജ്വരത്തിലേക്കും (എന്‍സിഫലൈറ്റിസ്) വഴി തുറക്കാനിടയാകും. റാബിസ് ബാധയുണ്ടായ 60 മുതല്‍ 80 ശതമാന, വരെ ആളുകളിലും ഈ ലക്ഷണമുണ്ടാകാം.
നായയുടെ കടിയേറ്റാല്‍ ഉടന്‍ തന്നെ സോപ്പും വെള്ളവും ഉപയോഗിച്ച് കുറഞ്ഞത് 15 മിനിറ്റ് മുറിവ് കഴുകണം. ഇതിലൂടെ വൈറസ് ശരീരത്തിലേക്ക് കടക്കുന്നത് കുറച്ചേക്കാം. മാത്രമല്ല, മൃഗങ്ങളുടെ കടി, നക്കല്‍, പോറല്‍ എന്നിവയെ വലിയ ശ്രദ്ധയോടെയാണ് സമീപിക്കേണ്ടത്.
വളര്‍ത്തുമൃഗങ്ങള്‍ക്ക് നിശ്ചിത സമയത്ത് പ്രതിരോധ കുത്തിവെപ്പ് നല്‍കേണ്ടതിന്റെ ആവശ്യകതയും ആരോഗ്യ വകുപ്പ് വീണ്ടും ഊന്നിപ്പറയുന്നു. മൃഗങ്ങളുമായി ഇടപെടുന്നവരും, തെരുവുനായകള്‍ പോലുള്ള അപകട സാധ്യതയുള്ള മൃഗങ്ങളെ സമീപിക്കുന്നവര്‍ മുന്‍കൂട്ടി വാക്സിന്‍ എടുക്കേണ്ടതാണെന്നും അധികൃതര്‍ മുന്നറിയിപ്പ് നല്‍കുന്നു.