വസ്ത്രങ്ങൾക്ക് വൻ വിലക്കിഴിവെന്ന് വാഗ്ദാനം; വാട്സാപ്പിലും ഫേസ്ബുക്കിലും വരുന്ന ആ 'സൂഡിയോ ഓഫർ' ലിങ്ക് വ്യാജം; പിന്നിൽ അക്കൗണ്ട് കാലിയാക്കുന്ന വൻ 'ഫിഷിംഗ്' തട്ടിപ്പ്; കുടുങ്ങാതിരിക്കാൻ കൊച്ചി സിറ്റി പോലീസ് പറയുന്നത് കേൾക്കൂ
കൊച്ചി: വസ്ത്ര വ്യാപാര സ്ഥാപനമായ സൂഡിയോയുടെ പേരിൽ സാമൂഹിക മാധ്യമങ്ങളിലൂടെ വ്യാപകമായി പ്രചരിക്കുന്ന വ്യാജ ഓഫർ ലിങ്കുകൾക്കെതിരെ ജാഗ്രതാ നിർദ്ദേശവുമായി കൊച്ചി സിറ്റി പോലീസ്. വസ്ത്രങ്ങൾക്ക് വൻ വിലക്കിഴിവ് വാഗ്ദാനം ചെയ്തും സൗജന്യ സമ്മാനങ്ങൾ നൽകാമെന്ന് പ്രലോഭിപ്പിച്ചും നടത്തുന്ന സൈബർ തട്ടിപ്പുകളിൽനിന്ന് പൊതുജനങ്ങൾ അതീവ ജാഗ്രത പാലിക്കണമെന്ന് പോലീസ് മുന്നറിയിപ്പ് നൽകി.
കമ്പനിയുടെ ഔദ്യോഗിക വെബ്സൈറ്റിന്റെ വ്യാജ പതിപ്പുകൾ നിർമ്മിച്ചോ, വിശ്വസനീയമായ ഉറവിടമെന്ന് തെറ്റിദ്ധരിപ്പിച്ചോ ഉപയോക്താക്കളുമായി ആശയവിനിമയം നടത്തി പണവും വ്യക്തിഗത വിവരങ്ങളും ചോർത്തുന്ന 'ഫിഷിംഗ്' എന്ന സൈബർ തട്ടിപ്പ് രീതിയാണിത്. ഇത്തരം വ്യാജ ലിങ്കുകൾ തുറക്കുന്നതും അവയിൽ വ്യക്തിപരമായ വിവരങ്ങൾ നൽകുന്നതും ഗുരുതരമായ പ്രത്യാഘാതങ്ങൾക്ക് വഴിവെക്കുമെന്ന് പോലീസ് വിശദീകരിക്കുന്നു.
വ്യാജ ലിങ്കുകളിൽ പ്രവേശിച്ചാൽ ഡിജിറ്റൽ ഉപകരണങ്ങളിൽ വൈറസുകളോ മാൽവെയറുകളോ ഇൻസ്റ്റാൾ ചെയ്യപ്പെടാനുള്ള സാധ്യതയുണ്ട്. വിവരങ്ങൾ നൽകിയാൽ ഉടൻ തട്ടിപ്പുകാർ ഒറ്റത്തവണ പാസ്വേഡ് (OTP) പങ്കുവെക്കാൻ ആവശ്യപ്പെടുന്നത് മറ്റൊരു അപകട സൂചനയാണ്. കമ്പനിയുടെ പേരിൽ അക്ഷരത്തെറ്റുകൾ ഉണ്ടാകുകയോ, പരസ്പരബന്ധമില്ലാത്ത അക്ഷരങ്ങളോ സംഖ്യകളോ അടങ്ങിയ ലിങ്കുകൾ കാണുകയോ ചെയ്താൽ അത് വ്യാജമാണെന്ന് തിരിച്ചറിയണം.
ഏതൊരു ഓഫറിനുമുള്ള ലിങ്കിൽ പ്രവേശിക്കുന്നതിന് മുമ്പ് കമ്പനികളുടെ ഔദ്യോഗിക വെബ്സൈറ്റുകളും സാമൂഹിക മാധ്യമ അക്കൗണ്ടുകളും പരിശോധിച്ച് ഉറപ്പുവരുത്തണമെന്ന് പോലീസ് നിർദ്ദേശിച്ചു. അവിചാരിതമായി ഇത്തരം ലിങ്കിൽ പ്രവേശിക്കുകയാണെങ്കിൽ, ഫോണിൽ മാൽവെയറുകൾ ഇൻസ്റ്റാൾ ചെയ്തിട്ടില്ലെന്നും ബാങ്കിൽനിന്ന് പണം പിൻവലിക്കാൻ ശ്രമങ്ങൾ നടന്നിട്ടില്ലെന്നും ഉറപ്പാക്കണം. സാമ്പത്തിക തട്ടിപ്പിന് ഇരയായാൽ ഉടൻ 1930 എന്ന നമ്പറിൽ ബന്ധപ്പെട്ട് പരാതി രജിസ്റ്റർ ചെയ്യാനും പോലീസ് നിർദ്ദേശിച്ചു.