ഹമാസുമായി ബന്ധമുണ്ടെന്ന് ആരോപണം; ഗവേഷകനെ രാജ്യത്ത് നിന്ന് പുറത്താക്കാനുള്ള നീക്കം തടഞ്ഞ് കോടതി; കോടതിയുടെ തീരുമാനം ഉണ്ടാകുന്നത് വരെ ഇന്ത്യന്‍ പൗരനെ അമേരിക്കയില്‍ തുടരാനും അനുമതി
വാഷിങ്ടണ്‍: ഹമാസുമായി ബന്ധമുണ്ടെന്നാരോപിച്ച് അമേരിക്കയിലെ ജോര്‍ജ് ടൗണ്‍ യൂണിവേഴ്‌സിറ്റിയിലെ ഗവേഷകനെ രാജ്യത്ത് നിന്ന് പുറത്താക്കാനുള്ള നീക്കം തടഞ്ഞ് കോടതി. ഇന്ത്യന്‍ പൗരനായ ഡോ. ബദര്‍ ഖാന്‍ സൂരിയെ നേരത്തെ പൊലീസ് അറസ്റ്റ് ചെയ്തിരുന്നു. ബദര്‍ ഖാനെ ഉടന്‍ രാജ്യത്ത് നിന്ന് പുറത്താക്കരുതെന്ന് വെര്‍ജീനിയയിലെ ഈസ്റ്റേണ്‍ ഡിസ്ട്രിക്ട് കോടതി ജഡ്ജി പാട്രീഷ്യ ടോളിവര്‍ ഉത്തരവിട്ടു. കോടതിയുടെ തീരുമാനം ഉണ്ടാകുന്നത് വരെ അദ്ദേഹത്തെ അമേരിക്കയില്‍ തന്നെ തുടരാന്‍ അനുമതി നല്‍കിയിരിക്കുകയാണ്.
അമേരിക്കന്‍ സിവില്‍ ലിബര്‍ട്ടീസ് യൂണിയന്‍ ബദര്‍ ഖാന്റെ അറസ്റ്റിനെതിരെ ശക്തമായി പ്രതികരിച്ചു. പലസ്തീന്‍ ജനതയ്ക്കു പിന്തുണ അറിയിച്ചതിന്റെ പേരില്‍ ഒരു ഗവേഷകനെ തടങ്കലിലാക്കുന്നത് സ്വതന്ത്ര ചിന്തകളെ അടിച്ചമര്‍ത്താനുള്ള ശ്രമത്തിന്റെ ഭാഗമാണെന്ന് യൂണിയന്‍ ആരോപിച്ചു. 'ഒരു വ്യക്തിയെ അവന്റെ രാഷ്ട്രീയ നിലപാടുകളുടെ പേരില്‍ വലിച്ചിഴച്ച് തടങ്കലില്‍ പാര്‍പ്പിക്കുന്നത് ടെക്‌നോളജിക്കല്‍ നിരീക്ഷണത്തിന്റെയും ആധിപത്യ ശക്തികളുടെ ഇരുണ്ട മുന്നറിയിപ്പാണെന്നും' അവര്‍ വ്യക്തമാക്കി.
ജോര്‍ജ് ടൗണ്‍ യൂണിവേഴ്‌സിറ്റിയില്‍ അല്‍വലീദ് ബിന്‍ തലാല്‍ സെന്റര്‍ ഫോര്‍ മുസ്ലിം-ക്രിസ്ത്യന്‍ അണ്ടര്‍സ്റ്റാന്‍ഡിംഗില്‍ ഗവേഷകനായി ജോലി ചെയ്തു വരികയായിരുന്നു. ന്യൂഡല്‍ഹിയിലെ ജാമിയ മിലിയ ഇസ്ലാമിയയില്‍ നിന്ന് പീസ് ആന്‍ഡ് കോണ്‍ഫ്‌ലിക്റ്റ് സ്റ്റഡീസില്‍ പിഎച്ച്ഡി നേടിയ ബദര്‍ ഖാന്‍, ഇറാഖിലും അഫ്ഗാനിസ്ഥാനും സമാധാനം പുനഃസ്ഥാപിക്കലുമായി ബന്ധപ്പെട്ട ഗവേഷണങ്ങള്‍ നടത്തുകയായിരുന്നു.
'ബദര്‍ ഖാന്‍ ഏതെങ്കിലും നിയമവിരുദ്ധ പ്രവര്‍ത്തനങ്ങളില്‍ ഏര്‍പ്പെട്ടിട്ടുണ്ടെന്നതിനായി ഇതുവരെ തെളിവൊന്നും നല്‍കപ്പെട്ടിട്ടില്ല' എന്ന് ജോര്‍ജ് ടൗണ്‍ യൂണിവേഴ്‌സിറ്റി പ്രസ്താവനയില്‍ പറഞ്ഞു. 'ഒരു ഗവേഷകനെ അവിശ്വാസത്തോടെ തടങ്കലിലാക്കുന്നത് അക്കാദമിക് സ്വാതന്ത്ര്യത്തിനും മാനവാവകാശങ്ങള്‍ക്കും എതിരായ നടപടിയാണ്' എന്നും യൂണിവേഴ്‌സിറ്റി കൂട്ടിച്ചേര്‍ത്തു. കോടതിയുടെ തീരുമാനം താല്‍ക്കാലികമായതിനാല്‍, അമേരിക്കന്‍ ആഭ്യന്തര സുരക്ഷാ വകുപ്പും സ്റ്റേറ്റ് ഡിപ്പാര്‍ട്ട്‌മെന്റും കേസില്‍ കൂടുതല്‍ നടപടികള്‍ സ്വീകരിക്കുമോ എന്ന് ആകാംക്ഷയോടെയാണ് നിരീക്ഷകര്‍ നോക്കിക്കൊണ്ടിരിക്കുന്നത്.