ലഹരിക്കേസിൽ പോലീസ് പിന്തുടർന്നു; കണ്ണ് വെട്ടിക്കാനായി യുവാവ് നേരെ ചാടിയിറങ്ങിയത് ചിമ്മിനിയിലേക്ക്; കുടുങ്ങി; ആശുപത്രിയിലെത്തിച്ച് അറസ്റ്റ് ചെയ്തു; സംഭവം അമേരിക്കയിൽ

മസാച്ചുസെറ്റ്സ്: ലഹരിക്കേസുമായി ബന്ധപ്പെട്ട് പോലീസിൽ നിന്നും കണ്ണ് വെട്ടിച്ച് രക്ഷപ്പെടാനുള്ള പരക്കം പാച്ചിലിൽ ചിമ്മിനിയിൽ യുവാവ് കുടുങ്ങി. അമേരിക്കയിലെ മസാച്ചുസെറ്റ്സിലെ ഫാൾ റിവറിലാണ് സംഭവം നടന്നത്.

പോലീസ് ഉദ്യോഗസ്ഥന്റെ ബോഡിക്യാമിൽ നിന്നുള്ള ക്യാമറയിലാണ് സംഭവങ്ങൾ പുറത്ത് വന്നത്. ലഹരി വിൽപനയ്ക്ക് പിടിക്കപ്പെട്ട യുവാവിനെ പോലീസുകാർ പിന്തുടരുന്നതും യുവാവ് രക്ഷയ്ക്കായി കെട്ടിടങ്ങളുടെ മുകളിലേക്ക് കയറുന്നതും വീഡിയോയിൽ വ്യക്തമാണ്.

വീടുകളുടെ മച്ചിന് മുകളിലും പൊലീസ് പിന്തുടരുന്നതായി മനസിലായ യുവാവ് ഒളിച്ചിരിക്കാനായി തിടുക്കത്തിൽ തിരഞ്ഞെടുത്തത് ഒരു ചിമ്മിനിക്കുള്ളിലായിരുന്നു. ഒളിക്കാൻ ഒത്തു പൊലീസിന്റെ കൺമുന്നിൽ നിന്ന് പെട്ടന്ന് മാറാനും പറ്റി.

പക്ഷെ ചിമ്മിനിക്ക് അകത്ത് നിന്ന് പുറത്തേക്കോ അകത്തേക്കോ ഇറങ്ങാൻ പറ്റാതെ വന്നതോടെ യുവാവ് തന്നെ പോലീസുകാരെ സഹായത്തിന് വിളിക്കുകയായിരുന്നു. സംഭവത്തിൽ പോലീസ് ഉദ്യോഗസ്ഥർ ഉടനടി ഇടപെട്ടതാണ് യുവാവിന് രക്ഷയായത്. അവശനിലയിലായ യുവാവിനെ ഒടുവിൽ ആശുപത്രിലെത്തിച്ച ശേഷം അറസ്റ്റ് ചെയ്യുകയായിരുന്നു.