ചാലക്കുടിയില് അഡ്വ ചാര്ളി പോള്; കൊടുങ്ങല്ലൂരില് ഉമ്മന്ചാണ്ടിയുടെ മരുമകനായിരുന്ന വര്ഗീസ് ജോര്ജ്; പിറവത്ത് തിരുവാണീയൂരിലെ ഹീറോ ജിബി അബ്രാഹം; റാന്നിയില് തോമസ് കെ. സാമുവല്; ട്വന്റി 20 മൂന്നാംഘട്ട സ്ഥാനാര്ത്ഥി പ്രഖ്യാപനത്തില് നിറയുന്നതും സമവാക്യങ്ങള് അനുകൂലമാക്കല്; കരുതലോടെ തീരുമാനം എടുത്ത് സാബു എം ജേക്കബ്
കൊച്ചി : ദേശീയ ജനാധിപത്യ സഖ്യത്തിലെ (എന്.ഡി.എ) പ്രമുഖ ഘടക കക്ഷിയായ ട്വന്റി20 പാര്ട്ടി മൂന്നാംഘട്ട സ്ഥാനാര്ത്ഥി പട്ടിക പുറത്തുവിട്ടു. ഇക്കുറി തൃശൂര് ജില്ലയിലെ ചാലക്കുടി, കൊടുങ്ങല്ലൂര്, എറണാകുളം ജില്ലയിലെ പിറവം, പത്തനംതിട്ട ജില്ലയിലെ റാന്നി എന്നീ നിയോജക മണ്ഡലങ്ങളിലെ സ്ഥാനാര്ത്ഥി പട്ടികയാണ് പാര്ട്ടി പ്രസിഡന്റ് സാബു എം.ജേക്കബ് പുറത്തുവിട്ടത്.
ഹൈക്കോടതി അഭിഭാഷകനും ട്വന്റി20 പാര്ട്ടി സംസ്ഥാന എക്സിക്യൂട്ടീവ് ബോര്ഡ് അംഗം അഡ്വ.ചാര്ളി പോളാണ് ചാലക്കുടി നിയോജക മണ്ഡലത്തിലെ സ്ഥാനാര്ത്ഥി. കഴിഞ്ഞ പാര്ലമെന്റ് തിരഞ്ഞെടുപ്പില് ചാലക്കുടി പാര്ലമെന്റ് മണ്ഡലത്തിലെ ട്വന്റി20യുടെ സ്ഥാനാര്ത്ഥിയായി മികച്ച മത്സരം കാഴ്ച്ചവച്ച സ്ഥാനാര്ത്ഥിയായിരുന്നു. രണ്ടാം തവണയാണ് പാര്ട്ടിക്ക് വേണ്ടി മത്സര രംഗത്തിറങ്ങുന്നത്. സിറോ മലബാര് സഭയുടെ പി.ആര്.ഒ സമിതി അംഗം, കാത്തലിക്ക് കൗണ്സില് ഓഫ് ഇന്ത്യ അംഗം തുടങ്ങി വിവിധ മേഖലകളില് പ്രര്ത്തിച്ചിട്ടുള്ള ചാര്ളി പോള് മണ്ഡലത്തില് സുപരിചിതനാണ്.
മുന് മുഖ്യമന്ത്രി ഉമ്മന് ചാണ്ടിയുടെ മരുമകനായിരുന്ന ഡോ.വര്ഗീസ് ജോര്ജാണ് കൊടുങ്ങല്ലൂര് നിയോജക മണ്ഡലം ട്വന്റി20 സ്ഥാനാര്ത്ഥി. പി.എച്ച്.ഡി ബിരുദധാരിയും, എഞ്ചിനിയറിംഗ് മേഖലയിലും, മാനേജ്മെന്റ് മേഖലയിലും സ്വദേശത്തും, വിദേശത്തും വര്ഷങ്ങളുടെ പ്രവര്ത്തി പരിചയമുള്ള ഡോ. വര്ഗീസ് ജോര്ജ് ട്വന്റി20 പാര്ട്ടിയുടെ കൊടുങ്ങല്ലൂര് നിയോജക മണ്ഡലം പ്രസിഡന്റ് കൂടിയാണ്. ദീര്ഘകാലം പ്രവാസിയും ട്വന്റി20 പാര്ട്ടിയുടെ കുന്നത്തുനാട് മണ്ഡലം കോര്ഡിനേറ്ററും സംരംഭകനുമായ ജിബി അബ്രാഹമാണ് പാര്ട്ടിയുടെ ശക്തികേന്ദ്രമായ പിറവം നിയോജക മണ്ഡലത്തിലെ സ്ഥാനര്ത്ഥി. ഇക്കഴിഞ്ഞ പഞ്ചായത്ത് തിരഞ്ഞെടുപ്പില് തിരുവാണിയൂര് പഞ്ചായത്ത് സിപിഎമ്മില് നിന്നും ട്വന്റി20 പിടിച്ചെടുത്തതിന്റെ വിജയ ശില്പികൂടിയാണ് ജിബി അബ്രാഹം.
ട്വന്റി20 പാര്ട്ടി രൂപീകരണം മുതല് പാര്ട്ടിയുടെ നേതൃസ്ഥാനത്തുള്ള ജിബിയുടെ സ്ഥാനാര്ത്ഥിത്വം സിപിഎം കോണ്ഗ്രസ് മുന്നണികള്ക്ക് കടുത്ത വെല്ലുവിളി ഉയര്ത്തും. സാമൂഹിക സാംസ്കാരിക മേഖലയിലെ നിറസാന്നിദ്ധ്യമായ തോമസ് കെ.സാമുവല് (ബ്ലസന്) ആണ് റാന്നി നിയോജക മണ്ഡലം സ്ഥാനാര്ത്ഥി. വിദ്യാര്ത്ഥി പ്രസ്ഥാനങ്ങളിലൂടെ രാഷ്ടീയത്തിലെത്തിയ തോമസ് കെ. സാമുവലിന്റെ കന്നി അങ്കമാണിത്.
ഇതോടെ എട്ട് നിയോജക മണ്ഡലങ്ങളിലെ സ്ഥാനാര്ത്ഥി പട്ടികയാണ് പാര്ട്ടി പുറത്തുവിട്ടിരിക്കുന്നത്. വൈകിട്ടോടെ കൂടുതല് സ്ഥാനാര്ത്ഥികളുടെ പ്രഖ്യാപനവും പാര്ട്ടി പ്രസിഡന്റ് സാബു എം. ജേക്കബ് നടത്തും.