ട്രംപിന്റെ ആഴക്കടല്‍ ഖനന ഉത്തരവ്; പരിഹരിക്കാനാവാത്ത പ്രത്യാഘാതങ്ങളുണ്ടാക്കുമെന്ന് പരിസ്ഥിതി ശാസ്ത്രജ്ഞര്‍; ട്രംപിന്റെ നീക്കം കൊബാള്‍ട്ട്, മാംഗനീസ് തുടങ്ങിയ നിരവധി നിര്‍ണായക ധാതുക്കള്‍ നിയന്ത്രിക്കാന്‍ ചൈന തുനിയുന്നുവെന്ന് ചൂണ്ടിക്കാട്ടി
ട്രംപിന്റെ ആഴക്കടല്‍ ഖനന ഉത്തരവ്
വാഷിംങ്ടണ്‍: ധാതുക്കള്‍ക്കായുള്ള ആഴക്കടല്‍ ഖനനം വേഗത്തിലാക്കാന്‍ ഡൊണാള്‍ഡ് ട്രംപ് ഒപ്പിട്ട എക്‌സിക്യൂട്ടിവ് ഉത്തരവിനെ അപലപിച്ച് പരിസ്ഥിതി സംഘടനകള്‍. ഇത് സമുദ്ര ആവാസവ്യവസ്ഥയെ പരിഹരിക്കാനാവാത്തവിധം ദോഷകരമായി ബാധിക്കുമെന്നാണ് പരിസ്ഥിതി സംഘടനകള്‍ ചൂണ്ടിക്കാട്ടുന്നത്. യു.എസിലെയും അന്താരാഷ്ട്ര ജലാശയങ്ങളിലെയും സമുദ്രത്തിന്റെ അടിത്തട്ട് ഖനനം ചെയ്യുന്നതിനുള്ള കമ്പനികള്‍ക്ക് പെര്‍മിറ്റുകള്‍ വേഗത്തില്‍ നല്‍കാന്‍ കഴിഞ്ഞ ദിവസം ഉത്തരവിലൂടെ ട്രംപ് നാഷനല്‍ ഓഷ്യാനിക് ആന്‍ഡ് അറ്റ്‌മോസ്‌ഫെറിക് അഡ്മിനിസ്‌ട്രേഷനോട് നിര്‍ദേശിച്ചു.
സൈനിക ആവശ്യങ്ങള്‍ക്ക് ഉള്‍പ്പെടെ ഹൈടെക് നിര്‍മാണത്തില്‍ ഉപയോഗിക്കുന്ന നിക്കല്‍, കൊബാള്‍ട്ട്, മാംഗനീസ് തുടങ്ങിയ നിരവധി നിര്‍ണായക ധാതുക്കള്‍ നിയന്ത്രിക്കാന്‍ ചൈന തുനിയുന്നുവെന്ന് ചൂണ്ടിക്കാട്ടിയാണ് ഈ നീക്കം. ദേശീയ അധികാരപരിധിക്കുള്ളിലും പുറത്തും സമുദ്രാടിത്തട്ടിലെ ധാതു പര്യവേക്ഷണത്തിലും വികസനത്തിലും യു.എസിനെ ആഗോള നേതാവായി സ്ഥാപിക്കുമെന്നാണ് ട്രംപിന്റെ വാദം.
കാനഡ ആസ്ഥാനമായുള്ള മെറ്റല്‍സ് കമ്പനി അന്താരാഷ്ട്ര ജലാശയങ്ങളില്‍ ഖനനം ചെയ്യുന്നതിന് ഒരു യു.എസ് അനുബന്ധ സ്ഥാപനം വഴി അനുമതി തേടുമെന്ന് പറഞ്ഞതിന് പിന്നാലെയാണ് പുതിയ ഉത്തരവ്. യു.എസിലെ നിര്‍ണായക ധാതു വിതരണ ശൃംഖലകളെ ശക്തിപ്പെടുത്തുന്നതിനായി വിലയേറിയ ധാതുക്കള്‍ അടങ്ങിയ നോഡ്യൂളുകള്‍ ഖനനം ചെയ്യുന്നതിന് ഈ വര്‍ഷം പെര്‍മിറ്റുകള്‍ക്ക് അപേക്ഷിക്കാന്‍ പദ്ധതിയിട്ടിട്ടുണ്ടെന്ന് കമ്പനി വെള്ളിയാഴ്ച അവരുടെ വെബ്സൈറ്റില്‍ ഒരു പ്രസ്താവന ഇറക്കിയിരുന്നു.
'എല്ലായ്‌പ്പോഴും എന്നപോലെ സ്‌പോണ്‍സര്‍ ചെയ്യുന്ന രാജ്യങ്ങളുടെയും പങ്കാളികളുടെയും നിക്ഷേപകരുടെയും താല്‍പ്പര്യങ്ങള്‍ക്കനുസൃതമായി പ്രവര്‍ത്തിക്കാന്‍ ഞങ്ങള്‍ പ്രതിജ്ഞാബദ്ധരാണ്' -കമ്പനിയുടെ ചെയര്‍മാനും ചീഫ് എക്‌സിക്യൂട്ടീവുമായ ജെറാര്‍ഡ് ബാരണ്‍ പറഞ്ഞു.
എന്നാല്‍ ഇത് മത്സ്യബന്ധനത്തെ ദോഷകരമായി ബാധിക്കുമെന്നും കല്‍ക്കരി, വാതകം, മറ്റ് ഫോസില്‍ ഇന്ധനങ്ങള്‍ എന്നിവ കത്തിക്കുന്നത് മൂലമുണ്ടാകുന്ന ആഗോളതാപനത്തിന്റെ പ്രധാന ഘടകമായ കാര്‍ബണ്‍ ഡൈ ഓക്‌സൈഡ് ആഗിരണം ചെയ്യാനും സംഭരിക്കാനുമുള്ള സമുദ്രങ്ങളുടെ കഴിവിനെ പോലും ബാധിക്കുമെന്നും പരിസ്ഥിതി പ്രവര്‍ത്തകര്‍ ആശങ്കപ്പെടുന്നു.
30ലധികം രാജ്യങ്ങളും മത്സ്യബന്ധന വ്യാപാര ഗ്രൂപ്പുകളും പരിസ്ഥിതി പ്രവര്‍ത്തകരും ചില ഓട്ടോ, ടെക് കമ്പനികളും കടല്‍ത്തീര ഖനനത്തിന് മൊറട്ടോറിയം ഏര്‍പ്പെടുത്തണമെന്ന് ആവശ്യപ്പെട്ടിട്ടുണ്ട്. 'ആഴക്കടല്‍ ഖനനം നമ്മുടെ സമുദ്രത്തിനും അതിനെ ആശ്രയിക്കുന്ന നമുക്കെല്ലാവര്‍ക്കും വളരെ അപകടകരമായ ശ്രമമാണെന്ന് ശാസ്ത്രജ്ഞര്‍ സമ്മതിക്കുന്നുവെന്ന് ഓഷ്യന്‍ കണ്‍സര്‍വന്‍സിയിലെ വിദേശകാര്യ വൈസ് പ്രസിഡന്റ് ജെഫ് വാട്ടേഴ്സ് പറഞ്ഞു. 'ആഴക്കടല്‍ ഖനനം മൂലമുണ്ടാകുന്ന ദോഷങ്ങള്‍ സമുദ്രത്തിന്റെ അടിത്തട്ടില്‍ മാത്രമായി പരിമിതപ്പെടുന്നില്ല. അത് മുഴുവന്‍ ജല നിരയെയും മുകളില്‍ നിന്ന് താഴേക്ക്, എല്ലാവരെയും അതിനെ ആശ്രയിക്കുന്ന എല്ലാറ്റിനെയും ബാധിക്കും'- അദ്ദേഹം മുന്നറിയിപ്പ് നല്‍കി.