ഗാല്‍വാന്‍ താഴ്വരയിലെ ഏറ്റുമുട്ടലിനെ തുടര്‍ന്ന് വഷളായ ബന്ധം; ഏഴ് വര്‍ഷത്തിന് ശേഷം വീണ്ടും ലോകം ഷീയെ ഭായിയാക്കാന്‍ നരേന്ദ്ര മോദി; ആടിപ്പാടി ആഘോഷമാക്കാന്‍ ടിക് ടോക്കിന്റെ നിരോധനം നീങ്ങുന്നുവെന്ന് അഭ്യൂഹം; ഗുഡ്ഗാവിലെ ഓഫീസിലേക്ക് ജോലിക്കാരെ ക്ഷണിച്ചതായും റിപ്പോര്‍ട്ടുകള്‍; ടിക്ക് ടോക്ക് മടങ്ങിവരുമോ?
ഡൽഹി: ചൈനീസ് സോഷ്യൽ മീഡിയ പ്ലാറ്റ്‌ഫോമായ ടിക് ടോക് ഇന്ത്യയിലേക്ക് തിരിച്ചെത്തുമെന്ന അഭ്യൂഹങ്ങൾക്കിടെ, ഗുഡ്‌ഗാവ് ഓഫീസിലേക്ക് ജീവനക്കാരെ ക്ഷണിച്ച് ടിക് ടോക്. ലിങ്ക്‌ഡ്‌ഇൻ പോലുള്ള പ്രൊഫഷണൽ പ്ലാറ്റ്‌ഫോമുകളിലാണ് ടിക് ടോക് രണ്ട് പുതിയ തസ്തികകളിലേക്ക് അപേക്ഷകൾ ക്ഷണിച്ചിരിക്കുന്നത്. കണ്ടൻ്റ് മോഡറേറ്റർ (ബംഗാളി), വെൽബീയിംഗ് പാർട്‌ണർഷിപ്പ് ആൻഡ് ഓപ്പറേഷൻസ് ലീഡ് എന്നീ തസ്തികകളിലേക്കാണ് അപേക്ഷകൾ തേടുന്നത്. ദേശീയ മാധ്യമമായ ഹിന്ദുസ്ഥാൻ ടൈംസാണ് ഇക്കാര്യം റിപ്പോർട്ട് ചെയ്തത്.
എന്നാൽ, ടിക് ടോക്കിൻ്റെ ഇന്ത്യയിലെ നിരോധനം നീക്കുന്നതിനെക്കുറിച്ച് ഔദ്യോഗിക സ്ഥിരീകരണം ലഭ്യമല്ല. കഴിഞ്ഞയാഴ്ച ചില ഉപയോക്താക്കൾക്ക് ടിക് ടോക് വെബ്സൈറ്റ് ലഭ്യമായത് ഈ അഭ്യൂഹങ്ങൾക്ക് കൂടുതൽ കരുത്ത് പകർന്നിരുന്നു. എന്നാൽ, ഈ വാർത്തകൾ കേന്ദ്രസർക്കാർ വൃത്തങ്ങൾ തള്ളിക്കളഞ്ഞിട്ടുണ്ട്. ടിക് ടോക്കിൻ്റെ നിരോധനം നീക്കാൻ ഉത്തരവൊന്നും പുറത്തിറക്കിയിട്ടില്ലെന്നും, അത്തരം വാർത്തകൾ തെറ്റാണെന്നും സർക്കാർ വൃത്തങ്ങൾ അറിയിച്ചതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു. വെബ്സൈറ്റ് ലഭ്യമായിരുന്നെങ്കിലും, ലോഗിൻ ചെയ്യാനോ ഉള്ളടക്കങ്ങൾ അപ്‌ലോഡ് ചെയ്യാനോ വീഡിയോകൾ കാണാനോ ഉപയോക്താക്കൾക്ക് സാധിച്ചിരുന്നില്ല. വിവിധ ആപ്പ് സ്റ്റോറുകളിലും ടിക് ടോക് ലഭ്യമല്ലായിരുന്നു.
അതേസമയം, 2020-ൽ ഗാൽവാനിൽ നടന്ന ഇന്ത്യ-ചൈന അതിർത്തി സംഘർഷത്തെത്തുടർന്നാണ് ടിക് ടോക് ഉൾപ്പെടെ 59 ചൈനീസ് ആപ്ലിക്കേഷനുകൾക്ക് ഇന്ത്യയിൽ നിരോധനം ഏർപ്പെടുത്തിയത്. ഈ നിരോധനം ഏകദേശം അഞ്ച് വർഷത്തോളമായി നിലവിലുണ്ട്.
അടുത്തിടെയായി ഇന്ത്യയും ചൈനയും തമ്മിലുള്ള ബന്ധത്തിൽ ചില ചലനങ്ങൾ പ്രകടമാണ്. രണ്ടാഴ്ച മുൻപ് ചൈനീസ് വിദേശകാര്യ മന്ത്രി ഇന്ത്യ സന്ദർശിച്ചിരുന്നു. അമേരിക്കയുടെ ഉയർന്ന തീരുവ നയത്തെത്തുടർന്ന് ഇരുരാജ്യങ്ങളും തമ്മിൽ കൂടുതൽ അടുക്കുന്നതായും സൂചനകളുണ്ട്.
അതിർത്തിയിൽ സമാധാനം നിലനിർത്തുക, അതിർത്തി വ്യാപാരം പുനരാരംഭിക്കുക, നിക്ഷേപം പ്രോത്സാഹിപ്പിക്കുക, നേരിട്ടുള്ള വിമാന സർവീസുകൾ പുനരാരംഭിക്കുക തുടങ്ങിയ വിഷയങ്ങളിൽ ഇരുരാജ്യങ്ങളും സഹകരണത്തിനുള്ള വഴികൾ തേടുന്നുണ്ട്. ഇത്തരം രാഷ്ട്രീയ, നയതന്ത്ര മാറ്റങ്ങൾ ടിക് ടോക് പോലുള്ള ചൈനീസ് ആപ്ലിക്കേഷനുകളുടെ ഭാവിയിൽ ഇന്ത്യയിൽ അനുകൂലമായ മാറ്റങ്ങൾ വരുമോ എന്നതും ആകാംഷയോടെയാണ് ഉറ്റുനോക്കുന്നത്.
ടിക് ടോക്കിൻ്റെ ജീവനക്കാരെ ക്ഷണിച്ച് കൊണ്ടുള്ള നടപടികൾ ഇന്ത്യയിൽ വീണ്ടും പ്രവർത്തനമാരംഭിക്കാനുള്ള സൂചനകളായിരിക്കാം നൽകുന്നത്. എന്നാൽ, ഔദ്യോഗിക സ്ഥിരീകരണം വരുന്നത് വരെ കാത്തിരിക്കുക എന്നതാണ് പ്രധാനം.
പ്രധാനമന്ത്രി നരേന്ദ്ര മോദി ഇന്ന് ചൈനയിലെ ടിയാൻജിൻ നഗരം സന്ദർശിക്കും. ഓഗസ്റ്റ് 31, സെപ്തംബർ 1 തീയതികളിൽ നടക്കുന്ന ഷാങ്ഹായ് സഹകരണ സംഘടന (SCO) ഉച്ചകോടിയിൽ ലോക നേതാക്കളുമായി അദ്ദേഹം കൂടിക്കാഴ്ച നടത്തും. 2020ലെ അതിർത്തി സംഘർഷങ്ങൾക്ക് ശേഷം പ്രധാനമന്ത്രി മോദിയുടെ ആദ്യ ചൈനീസ് സന്ദർശനമാണിത്.
ചൈനീസ് പ്രസിഡന്റ് ഷി ജിൻപിംഗ്, റഷ്യൻ പ്രസിഡന്റ് വ്‌ളാഡിമിർ പുട്ടിൻ എന്നിവരുൾപ്പെടെ 20ൽ അധികം ലോക നേതാക്കൾ ഉച്ചകോടിയിൽ പങ്കെടുക്കും. മിഡിൽ ഈസ്റ്റ്, ദക്ഷിണേഷ്യ, തെക്കുകിഴക്കൻ ഏഷ്യ എന്നിവിടങ്ങളിൽ നിന്നുള്ള നേതാക്കളെയും ചൈന ക്ഷണിച്ചിട്ടുണ്ട്.
അടുത്തയാഴ്ച നടക്കുന്ന SCO ഉച്ചകോടി, അമേരിക്കൻ നേതൃത്വത്തിലുള്ള അന്താരാഷ്ട്ര വ്യവസ്ഥയെ ചോദ്യം ചെയ്യാനുള്ള ഒരു വേദിയായി ഷി ജിൻപിംഗ് ഉപയോഗിക്കുമെന്ന് പ്രതീക്ഷിക്കുന്നു. ചൈന, ഇറാൻ, റഷ്യ, ഇന്ത്യ തുടങ്ങിയ രാജ്യങ്ങളെ നേരിടാൻ യുഎസ് നടത്തിയ ശ്രമങ്ങൾ ലക്ഷ്യം കണ്ടില്ലെന്ന് 'ദി ചൈന-ഗ്ലോബൽ സൗത്ത് പ്രോജക്ട്' എഡിറ്റർ-ഇൻ-ചീഫ് എറിക് ഒലാണ്ടർ പറഞ്ഞു.
2001ൽ സ്ഥാപിതമായതിന് ശേഷം നടക്കുന്ന ഏറ്റവും വലിയ SCO ഉച്ചകോടിയായിരിക്കും ഇത്. പ്രധാന ശക്തികൾ ചേർന്ന് പുതിയ തരം അന്താരാഷ്ട്ര ബന്ധങ്ങൾ കെട്ടിപ്പടുക്കുകയാണെന്ന് ചൈനീസ് വിദേശകാര്യ മന്ത്രാലയം ഉദ്യോഗസ്ഥർ വ്യക്തമാക്കി. കഴിഞ്ഞ വർഷം റഷ്യയിലെ കസാനിൽ നടന്ന ബ്രിക്‌സ് ഉച്ചകോടിയിൽ മോദിയും ഷി ജിൻപിംഗും പുട്ടിനും ഒരേ വേദി പങ്കിട്ടിരുന്നു. ഇതിനിടെ, ചൈനയുമായും ഇന്ത്യയുമായും ത്രികക്ഷി ചർച്ചകൾ ഉടൻ നടക്കുമെന്ന് റഷ്യ പ്രതീക്ഷിക്കുന്നതായി ഇന്ത്യയിലെ റഷ്യൻ എംബസി ഉദ്യോഗസ്ഥർ അറിയിച്ചിരുന്നു.
പ്രധാനമന്ത്രി നരേന്ദ്ര മോദി ഓഗസ്റ്റ് 31-ന് ഷാങ്ഹായ് കോർപ്പറേഷൻ ഓർഗനൈസേഷൻ (SCO) ഉച്ചകോടിയിൽ പങ്കെടുക്കാനായി ചൈനയിലേക്ക് പോയത്. ഏഴ് വർഷത്തിനു ശേഷമാണ് പ്രധാനമന്ത്രിയുടെ ആദ്യ ചൈനീസ് സന്ദർശനം. ഈ ഉച്ചകോടി ഇരുരാജ്യങ്ങൾക്കിടയിൽ സൗഹാർദ്ദപരമായ അന്തരീക്ഷം വളർത്തുന്നതിനും ചർച്ചകൾ മുന്നോട്ട് കൊണ്ടുപോകുന്നതിനും ഒരു പ്രധാന വേദിയാകും.
പ്രധാനമന്ത്രിയുടെ സന്ദർശനത്തിന്റെ അജണ്ടകൾ ചർച്ചകളുടെ പുരോഗതിക്കനുസരിച്ച് നിശ്ചയിക്കുമെന്നും റിപ്പോർട്ടുകളുണ്ട്. ഈ ഉച്ചകോടി, അമേരിക്കൻ നേതൃത്വത്തിലുള്ള അന്താരാഷ്ട്ര വ്യവസ്ഥയ്ക്ക് ബദലായി പുതിയ ലോകക്രമം കെട്ടിപ്പടുക്കുന്നതിൽ ചൈനയുടെ താല്പര്യങ്ങൾ വ്യക്തമാക്കുന്നതായും വിലയിരുത്തപ്പെടുന്നു.
അന്ന് നടന്ന ഇന്ത്യ- ചൈന അതിർത്തി സംഘർഷ സമയത്ത് ദേശീയ സുരക്ഷാ ഭീഷണിയും ഡാറ്റാ ദുരുപയോഗവും ആരോപിച്ച് 47 ചൈനീസ് ആപ്പുകൾ കൂടി ഇന്ത്യയിൽ നിരോധിച്ചിരിന്നു. കഴിഞ്ഞ മാസം 59 ആപ്പുകൾക്ക് ഏർപ്പെടുത്തിയ വിലക്കിന് പിന്നാലെയാണ് പുതിയ നടപടി. നിരോധിക്കപ്പെട്ട പഴയ ആപ്പുകളുടെ പുനരാവിഷ്കാരങ്ങളോ ഭാഗങ്ങളോ ആയി പ്രവർത്തിക്കുന്നവയാണ് പുതിയ പട്ടികയിൽ ഉൾപ്പെട്ടിട്ടുള്ളതെന്ന് ഔദ്യോഗിക വൃത്തങ്ങൾ സൂചിപ്പിച്ചു.
ഏതെല്ലാം ആപ്പുകളാണ് നിരോധിക്കപ്പെട്ടതെന്ന വിശദാംശങ്ങൾ ഉടൻ പുറത്തുവിടും. ചില പ്രമുഖ ഗെയിമിംഗ് ആപ്പുകളും പുതിയ പട്ടികയിൽ ഉൾപ്പെട്ടതായാണ് സൂചന. ഇവ ചൈനീസ് ഏജൻസികളുമായി ഉപഭോക്താക്കളുടെ ഡാറ്റ പങ്കുവെക്കുന്നതായി ആരോപണമുണ്ട്.ഇതോടെ, ലഡാക്കിലെ അതിർത്തി സംഘർഷങ്ങൾക്ക് ശേഷം ഇന്ത്യ നിരോധിച്ച ചൈനീസ് ആപ്പുകളുടെ ആകെ എണ്ണം 106 ആയി. ടിക് ടോക്, യുസി ബ്രൗസർ തുടങ്ങിയ ജനപ്രിയ ആപ്പുകൾ നേരത്തെ നിരോധിച്ചിരുന്നു.
250 ഓളം മറ്റ് ചൈനീസ് ആപ്പുകൾ രാജ്യത്ത് നിരീക്ഷണത്തിലാണെന്നും കേന്ദ്ര സർക്കാർ വൃത്തങ്ങൾ അറിയിച്ചു. ലോകത്ത് ഏറ്റവുമധികം പ്രചാരമുള്ള ഗെയിമിംഗ് ആപ്ലിക്കേഷനുകളിലൊന്നായ പബ്ജി പോലുള്ളവയും ഈ നിരീക്ഷണ പട്ടികയിൽ ഉൾപ്പെടുന്നു. സ്വകാര്യത, ദേശീയ സുരക്ഷാ ലംഘനം തുടങ്ങിയ വിഷയങ്ങളുമായി ബന്ധപ്പെട്ടാണ് ഈ നിരീക്ഷണം. ഇതോടെ, ഏഴ് വർഷത്തിന് ശേഷം വീണ്ടും ചൈന ഇന്ത്യയുമായി കൂട്ടുകൂടുമ്പോൾ ആ നിരോധിച്ച ആപ്പുകളും തിരിച്ചുവരുമോ എന്ന് ഉറ്റുനോക്കുകയാണ് ജനങ്ങൾ.