അതിമോഹമാണ് പുടിന്, അതിമോഹം! യുക്രെയ്ന്‍ യുദ്ധം തീര്‍ന്നാവും റഷ്യയുടെ അധിനിവേശക്കൊതി തീരില്ല; യൂറോപ്പില്‍ മറ്റൊരു യുദ്ധത്തിന് പുടിന്‍ കോപ്പുകൂട്ടുമെന്ന് സൂചന; റഷ്യയുടെ വന്‍ഭീഷണി നേരിടാന്‍ ദേശീയ സൈനിക സേവനം പുന: സ്ഥാപിക്കാന്‍ ഒരുങ്ങി ഫ്രാന്‍സ്; പ്രകോപനം നേരിടാന്‍ മറ്റുയൂറോപ്യന്‍ രാജ്യങ്ങളും സൈനിക ശക്തി വര്‍ദ്ധിപ്പിക്കുന്നു

പാരീസ്: റഷ്യ ഉയര്‍ത്തുന്ന വന്‍ഭീഷണിയും യൂറോപ്പില്‍ പുതിയ സംഘര്‍ഷത്തിനുള്ള സാധ്യതയും കണക്കിലെടുത്ത് ദേശീയ സൈനിക സേവനം (National Military Service) പുനഃസ്ഥാപിക്കാന്‍ ഫ്രാന്‍സ് ഒരുങ്ങുന്നു. സൈനിക സേവനം നിര്‍ബന്ധിതമായിരിക്കില്ലെന്നാണ് സൂചന. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ ഇക്കാര്യം ഔദ്യോഗികമായി പ്രഖ്യാപിക്കുമെന്ന് ഡെയ്്‌ലി മെയില്‍ റിപ്പോര്‍ട്ട് ചെയ്യുന്നു.

മൂന്ന് പതിറ്റാണ്ടുകള്‍ക്ക് മുമ്പ് നിര്‍ത്തലാക്കിയ നിര്‍ബന്ധിത സൈനിക സേവനത്തിന് പകരമായാണ് പുതിയ പദ്ധതി കൊണ്ടുവരുന്നത്. ആല്‍പ്സിലെ കാലാള്‍പ്പട ബ്രിഗേഡ് സന്ദര്‍ശിക്കുന്നതിനിടെ മാക്രോണ്‍ പുതിയ പദ്ധതിയുടെ വിശദാംശങ്ങള്‍ പ്രഖ്യാപിക്കും.

റഷ്യയുടെ യുക്രെയ്ന്‍ അധിനിവേശം മൂന്നര വര്‍ഷം പിന്നിടുമ്പോഴാണ് ഈ നിര്‍ണ്ണായക നീക്കം. റഷ്യയുടെ അധിനിവേശ ശ്രമം യുക്രെയ്ന്‍ അതിര്‍ത്തിയില്‍ മാത്രം ഒതുങ്ങില്ലെന്ന് മാക്രോണ്‍ അടക്കമുള്ള ഫ്രഞ്ച് ഉദ്യോഗസ്ഥര്‍ മുന്നറിയിപ്പ് നല്‍കിയിരുന്നു.

'ഫ്രാന്‍സ് മക്കളെ നഷ്ടപ്പെടാന്‍ തയ്യാറായിരിക്കണം': വിവാദം

കഴിഞ്ഞയാഴ്ച ഫ്രാന്‍സിലെ ഉന്നത ജനറല്‍ ആയ ഫാബിയന്‍ മാന്‍ഡോണ്‍ നടത്തിയ പ്രസ്താവന ആഭ്യന്തരമായി വലിയ കോലാഹലങ്ങള്‍ സൃഷ്ടിച്ചിരുന്നു. 'ഫ്രാന്‍സ് 'മക്കളെ നഷ്ടപ്പെടാന്‍ തയ്യാറാകണം'' എന്നും, 'റഷ്യ 2030-ഓടെ നമ്മുടെ രാജ്യങ്ങളുമായി ഒരു ഏറ്റുമുട്ടലിന് തയ്യാറെടുക്കുകയാണ്' എന്നും അദ്ദേഹം മുന്നറിയിപ്പ് നല്‍കിയിരുന്നു. 'ഞങ്ങള്‍ യുവാക്കളെ യുക്രെയ്‌നിലേക്ക് അയയ്ക്കാന്‍ പോകുന്നു' എന്ന ധാരണ മാറ്റണമെന്ന് മാക്രോണ്‍ കഴിഞ്ഞ ദിവസം പറഞ്ഞിരുന്നു.

50,000 പേരെ ലക്ഷ്യമിട്ട് പുതിയ പദ്ധതി

സൈന്യത്തില്‍ ആളുകള്‍ സ്വമേധയാ ദേശീയ സേവനത്തിനായി ചേരുന്ന തരത്തിലായിരിക്കും പദ്ധതി. ആദ്യ വര്‍ഷം 2,000 മുതല്‍ 3,000 വരെ പേര്‍ക്ക് പരിശീലനം നല്‍കാനാണ് പദ്ധതി. ഇത് ക്രമേണ വര്‍ഷംതോറും 50,000 പേരെ സൈനിക സേവനത്തില്‍ ചേര്‍ക്കുന്ന രീതിയിലേക്ക് ഉയര്‍ത്താനാണ് ലക്ഷ്യമിടുന്നത്. ഇത് പുരുഷന്മാര്‍ക്കും സ്ത്രീകള്‍ക്കും 10 മാസം വരെയുള്ള സേവനമായിരിക്കാനാണ് സാധ്യത.

നിലവിലെ സാമ്പത്തിക ബുദ്ധിമുട്ടുകള്‍ പരിഗണിച്ച്, ഈ പദ്ധതി 'കാലക്രമേണ ഘട്ടം ഘട്ടമായി' നടപ്പാക്കാനാണ് ഫ്രാന്‍സിന്റെ തീരുമാനം.

യൂറോപ്പിലെ സൈനിക നീക്കങ്ങള്‍

റഷ്യന്‍ പ്രകോപനം തുടരുന്ന സാഹചര്യത്തില്‍ യൂറോപ്പിലെ മറ്റ് രാജ്യങ്ങളും സൈന്യത്തെ ശക്തിപ്പെടുത്താനുള്ള നടപടികള്‍ ആലോചിക്കുന്നുണ്ട്: ജര്‍മ്മനി, 18 വയസ്സുള്ള എല്ലാ പുരുഷന്മാരും നിര്‍ബന്ധിത ഫിറ്റ്‌നസ് ടെസ്റ്റുകള്‍ക്ക് വിധേയരാകണമെന്ന നിര്‍ദ്ദേശം പരിഗണിക്കുകയാണ്. ഇറ്റലിയാകട്ടെ, 2005-ല്‍ നിര്‍ത്തലാക്കിയ നിര്‍ബന്ധിത സൈനിക സേവനം ആറ് മാസത്തേക്ക് തിരികെ കൊണ്ടുവരാന്‍ പുതിയ ബില്‍ നിര്‍ദ്ദേശിച്ചിട്ടുണ്ട്.

ബാള്‍ട്ടിക് രാജ്യങ്ങളായ ലാത്വിയ, ലിത്വാനിയ തുടങ്ങിയ രാജ്യങ്ങള്‍ നിര്‍ബന്ധിത സൈനിക സേവനം അടുത്തിടെ പുനഃസ്ഥാപിച്ചു. നിലവില്‍ ഏകദേശം 2,00,000 സജീവ സൈനികരും 47,000 കരുതല്‍ സേനാംഗങ്ങളുമാണ് ഫ്രഞ്ച് സായുധ സേനയിലുള്ളത്. 2030-ഓടെ ഇത് യഥാക്രമം 2,10,000, 80,000 എന്നിങ്ങനെ ഉയര്‍ത്താനാണ് ഫ്രാന്‍സ് ലക്ഷ്യമിടുന്നത്.