ഇതാണ് 'ഉടവാൾ' ശത്രുവിനെ കാച്ചിക്കളയാൻ ഇതുമതി! ലോകത്ത് ഇനി എന്തൊക്കെ നടന്നാലും അത് ഒന്നും പ്യോങ്യാങ്ങിനെ ബാധിക്കില്ല എന്ന അവസ്ഥയാണ്; വളരെ സന്തോഷത്തോടെ ചിരിച്ച മുഖവുമായി ബെലാറസ് പ്രസിഡന്റിന്റെ കൂടെ എത്തിയ ഉത്തരകൊറിയൻ ഭരണാധികാരി; കിമ്മിന് സമ്മാനമായി നൽകിയ കളിക്കോപ്പുകൾ കണ്ട് ഞെട്ടൽ; ഇത് അത്യപൂർവ്വ കൂടിക്കാഴ്ച
പ്യോങ്യാങ്: പാശ്ചാത്യ രാജ്യങ്ങളുടെ കടുത്ത ഉപരോധങ്ങൾക്കിടെ, ഉത്തരകൊറിയയും ബെലാറസും സൗഹൃദ ഉടമ്പടിയിൽ ഒപ്പുവെച്ചു. ഉത്തരകൊറിയൻ തലസ്ഥാനമായ പ്യോങ്യാങ്ങിൽ നടന്ന കൂടിക്കാഴ്ചയിൽ ബെലാറസ് പ്രസിഡന്റ് അലക്സാണ്ടർ ലുകാഷെങ്കോയും ഉത്തരകൊറിയൻ നേതാവ് കിം ജോങ് ഉന്നും തമ്മിലാണ് ഈ സുപ്രധാന കരാർ ഒപ്പുവെച്ചത്. യുക്രെയ്നിലെ റഷ്യൻ അധിനിവേശത്തെ ശക്തമായി പിന്തുണയ്ക്കുന്ന ഇരുരാജ്യങ്ങളും പാശ്ചാത്യ സമ്മർദ്ദങ്ങളെ ഒരുമിച്ച് പ്രതിരോധിക്കാനും വിവിധ മേഖലകളിൽ സഹകരിക്കാനും ധാരണയിലെത്തി.
ഉടമ്പടി ഒപ്പുവെക്കുന്ന ചടങ്ങിനിടെ ഇരു നേതാക്കളും സമ്മാനങ്ങൾ കൈമാറി. ഏറ്റവും പുതിയ സാങ്കേതിക വിദ്യകളുള്ള ഒരു അത്യാധുനിക റൈഫിളാണ് ലുകാഷെങ്കോ കിമ്മിന് സമ്മാനിച്ചത്. "ശത്രുക്കൾ വന്നാൽ ഉപയോഗിക്കാം" എന്ന് തമാശയോടെയാണ് ലുകാഷെങ്കോ റൈഫിൾ കൈമാറിയതെന്ന് റിപ്പോർട്ടുകൾ പറയുന്നു. ഇതിന് പകരമായി കിം ജോങ് ഉൻ രത്നങ്ങൾ പതിപ്പിച്ച ഒരു ഉടവാളും, ലുകാഷെങ്കോയുടെ ചിത്രം കൊത്തിയ മനോഹരമായ പൂപ്പാത്രവും, സ്വർണ്ണംകൊണ്ടുണ്ടാക്കിയ ഉപഹാരങ്ങളും ആയുധങ്ങളും ബെലാറസ് പ്രസിഡന്റിന് തിരികെ നൽകി.
ആണവായുധ പദ്ധതിയുടെ പേരിലും യുക്രെയ്ൻ യുദ്ധത്തിൽ റഷ്യയെ പിന്തുണച്ചതിന്റെ പേരിലും പാശ്ചാത്യ രാജ്യങ്ങൾ ഉത്തരകൊറിയയ്ക്കും ബെലാറസിനും എതിരെ കടുത്ത ഉപരോധങ്ങൾ ഏർപ്പെടുത്തിയിട്ടുണ്ട്. ഈ സാഹചര്യത്തിലാണ് ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനുള്ള നീക്കം.
അധികാരശക്തികൾ അന്താരാഷ്ട്ര നിയമങ്ങൾ ലംഘിക്കുന്ന ഇക്കാലത്ത് പരമാധികാരം സംരക്ഷിക്കുന്നതിനും പൗരന്മാരുടെ ക്ഷേമത്തിനും രാജ്യങ്ങൾ പരസ്പരം സഹകരിക്കേണ്ടതുണ്ടെന്ന് കൂടിക്കാഴ്ചയ്ക്കിടെ ലുകാഷെങ്കോ ചൂണ്ടിക്കാട്ടി. കഠിനാധ്വാനികളും അച്ചടക്കമുള്ളവരുമായ ജനതയ്ക്കൊപ്പം ഉത്തരകൊറിയയെ കാത്തിരിക്കുന്നത് മഹത്തായ ഭാവിയാണെന്നും അദ്ദേഹം കൂട്ടിച്ചേർത്തു.
പുതിയ ഉടമ്പടി ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ഏറെ മെച്ചപ്പെടുത്താൻ സഹായിക്കുമെന്ന് കിം ജോങ് ഉൻ മറുപടി പറഞ്ഞു. കൃഷി, വിവരസാങ്കേതികവിദ്യ, പൊതുജനാരോഗ്യം എന്നിവയുൾപ്പെടെ വിവിധ മേഖലകളിൽ സഹകരിക്കാൻ ഇരു നേതാക്കളും സമ്മതിച്ചതായി ഉത്തരകൊറിയൻ ഔദ്യോഗിക വാർത്താ ഏജൻസിയായ കെ.സി.എൻ.എ. റിപ്പോർട്ട് ചെയ്തു. പാശ്ചാത്യരാജ്യങ്ങളുടെ സമ്മർദ്ദങ്ങളെ ഒരുമിച്ച് നേരിടാനുള്ള നീക്കമായി ഈ സൗഹൃദ ഉടമ്പടി അന്താരാഷ്ട്ര തലത്തിൽ വിലയിരുത്തപ്പെടുന്നു.