മുസ്ലിം ബ്രദര്‍ഹുഡിനെതിരെ നീക്കം കടുപ്പിച്ചു ഡൊണാള്‍ഡ് ട്രംപ്; ചില സംഘടനകളെ ഭീകരസംഘടകളാക്കി പ്രഖ്യാപിച്ചേക്കും; പരിശോധിക്കാന്‍ ഉദ്യോഗസ്ഥര്‍ക്ക് നിര്‍ദ്ദേശം നല്‍കി; സംഘടനയ്‌ക്കെതിരെ സാമ്പത്തിക, യാത്രാ ഉപരോധങ്ങള്‍ വന്നേക്കും
മുസ്ലിം ബ്രദര്‍ഹുഡിനെതിരെ നീക്കം കടുപ്പിച്ചു ഡൊണാള്‍ഡ് ട്രംപ്
വാഷിങ്ടണ്‍: മുസ്ലിം ബ്രദര്‍ഹുഡിന്റെ ചില പ്രമുഖ ഘടകങ്ങളെ ഭീകര സംഘടനകളായി പ്രഖ്യാപിക്കാന്‍ നീക്കം. യുഎസ് പ്രസിഡന്റ് ഡൊണാള്‍ഡ് ട്രംപ് ഉദ്യോഗസ്ഥര്‍ക്ക് നിര്‍ദ്ദേശം നല്‍കി. സംഘടനയ്‌ക്കെതിരെ സാമ്പത്തിക, യാത്രാ ഉപരോധങ്ങളണ് ലക്ഷ്യം.ഈജിപ്ത്, ലബനന്‍, ജോര്‍ദാന്‍ എന്നിവിടങ്ങളിലെ ശാഖകളെ വിദേശ ഭീകര സംഘടനകളായും ആഗോള ഭീകരരായും പട്ടികപ്പെടുത്തണമോ എന്ന് അന്വേഷിച്ച് റിപ്പോര്‍ട്ട് സമര്‍പ്പിക്കാനാണ് ഉന്നത ഉദ്യോഗസ്ഥരോട് ട്രംപ് ആവശ്യപ്പെട്ടത്.
സംഘടനയ്ക്ക് ഹമാസുമായുള്ള ബന്ധത്തെക്കുറിച്ചുള്ള ആരോപണങ്ങളും യുഎസ് പൗരന്മാര്‍ക്കും യുഎസ് താല്‍പ്പര്യങ്ങള്‍ക്കും ഹാനികരമായ ശ്രമങ്ങളുമാണെന്ന് ഉത്തരവില്‍ ചൂണ്ടിക്കാട്ടുന്നു. മുസ്ലിം ബ്രദര്‍ഹുഡിന് ജോര്‍ദാനിലും ഈജിപ്തിലും നിരോധനമുണ്ട്.
യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ, ട്രഷറി സെക്രട്ടറി സ്‌കോട്ട് ബെസ്സന്റ് എന്നിവര്‍ അറ്റോര്‍ണി ജനറല്‍ പാം ബോണ്ടി, നാഷണല്‍ ഇന്റലിജന്‍സ് ഡയറക്ടര്‍ തുള്‍സി ഗബ്ബാര്‍ഡ് എന്നിവരുമായി കൂടിയാലോചിച്ച് 30 ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് എക്സിക്യൂട്ടീവ് ഉത്തരവില്‍ നിര്‍ദ്ദേശിക്കുന്നു.
ഉപരോധം ആവശ്യമാണെന്ന് കണ്ടെത്തിയാല്‍, അത് നടപ്പാക്കാന്‍ യുഎസ് ഉദ്യോഗസ്ഥര്‍ക്ക് 45 ദിവസത്തെ സമയം നല്‍കും. ട്രംപിന് എപ്പോള്‍ വേണമെങ്കിലും ഉത്തരവിടാവുന്ന ഈ പ്രഖ്യാപനം, സംഘടനയ്ക്ക് പിന്തുണ നല്‍കുന്നത് നിയമവിരുദ്ധമാക്കും. ഇത് സാമ്പത്തിക ഉപരോധങ്ങള്‍ക്കും അംഗങ്ങള്‍ക്ക് യുഎസില്‍ പ്രവേശിക്കുന്നതിന് വിലക്കേര്‍പ്പെടുത്തുന്നതിനും കാരണമാകും.
കഴിഞ്ഞയാഴ്ച, ടെക്സസ് ഗവര്‍ണര്‍ മുസ്ലിം ബ്രദര്‍ഹുഡിനെ വിദേശ ഭീകര സംഘടനയായും അതിര്‍ത്തി കടന്നുള്ള ക്രിമിനല്‍ സംഘടനയായും പ്രഖ്യാപിച്ചിരുന്നു. ഇതിന് പിന്നാലെയാണ് ട്രംപും ഇത്തരമൊരു നീക്കത്തിന് ഒരുങ്ങുന്നത്.
ഏകദേശം 100 വര്‍ഷം മുന്‍പ് ഈജിപ്തിലാണ് ബ്രദര്‍ഹുഡ് സ്ഥാപിതമായത്. ലോകമെമ്പാടും ഇതിന് പ്രാദേശിക ശാഖകളുണ്ട്. ഓരോ ഘടകത്തിനും പ്രത്യയശാസ്ത്രത്തില്‍ വ്യത്യാസങ്ങളുണ്ട്, ഇസ്ലാമിക നിയമം അനുസരിച്ച് ഭരിക്കുന്ന ഒരു രാഷ്ട്രം സ്ഥാപിക്കുക എന്നതാണ് അതിന്റെ ലക്ഷ്യങ്ങളിലൊന്ന്.