'എല്ലാവരെയും കൊന്നുകളയുക'; കരീബിയന്‍ കടലിലെ വെനസ്വേലന്‍ ബോട്ടുകള്‍ക്കു നേരെ യു.എസ് പ്രതിരോധ സെക്രട്ടറിയുടെ കൊലവിളി പുറത്ത്; വെനസ്വേലയെ ലക്ഷ്യമിട്ട് പ്രസിഡന്റ് ഡോണള്‍ഡ് ട്രംപ് യുദ്ധത്തിനും ഭരണ അട്ടിമറിക്കും തുടക്കം കുറിച്ചെന്നും റിപ്പോര്‍ട്ടുകള്‍
കരീബിയന്‍ കടലിലെ വെനസ്വേലന്‍ ബോട്ടുകള്‍ക്കു നേരെ യു.എസ് പ്രതിരോധ സെക്രട്ടറിയുടെ കൊലവിളി പുറത്ത്
വാഷിങ്ടണ്‍: മയക്കുമരുന്ന് കടത്തുകാര്‍ക്കെതിരായ നടപടി ശക്തമാക്കി അമേരിക്ക. കരീബിയന്‍ കടലില്‍ യു.എസ് സൈന്യം നടത്തിയ ഏകപക്ഷീയമായ ആക്രമണത്തെക്കുറിച്ചുള്ള വെളിപ്പെടുത്തലുകളുമായി വാഷിങ്ടണ്‍ പോസ്റ്റ്. 'എല്ലാവരെയും കൊന്നുകളയാന്‍' യു.എസ് പ്രതിരോധ സെക്രട്ടറി പീറ്റര്‍ ഹെഗ്സെത്ത് ആക്രമണത്തിന് വാക്കാലുള്ള ഉത്തരവ് നല്‍കിയെന്നാണ് റിപ്പോര്‍ട്ട്. ഓപറേഷനെക്കുറിച്ച് നേരിട്ട് അറിവുള്ള സ്രോതസ്സുകളെ ഉദ്ധരിച്ചാണിത്.
സെപ്റ്റംബര്‍ 2 നാണ് നിരവധി പേരുടെ മരണത്തിനിടയാക്കിയ ആക്രമണങ്ങള്‍ നടന്നത്. അതിനുശേഷവും നാവികസേനയുടെ യുദ്ധക്കപ്പലുകളും ഒരു സ്റ്റെല്‍ത്ത് വിമാനവും വിമാനവാഹിനിക്കപ്പലും കരീബിയന്‍ കടലില്‍ സാന്നിധ്യം തുടരുന്നതിനിടയിലാണ് ഈ സംഭവം പുറത്തുവന്നത്. ബോട്ടുകള്‍ക്കു നേരെയുള്ള ആക്രമണത്തിലൂടെ കരീബിയന്‍ രാജ്യമായ വെനസ്വേലയെ ലക്ഷ്യമിട്ട് പ്രസിഡന്റ് ഡോണള്‍ഡ് ട്രംപ് യുദ്ധത്തിനും ഭരണ അട്ടിമറിക്കും തുടക്കം കുറിച്ചിരിക്കുകയാണെന്നും റിപ്പോര്‍ട്ടുണ്ട്.
ഹെഗ്സെത്തിന്റെ ഉത്തരവ് പാലിക്കുന്നതിനായി, ആക്രമണത്തിന് മേല്‍നോട്ടം വഹിച്ചിരുന്ന സ്പെഷല്‍ ഓപറേഷന്‍സ് കമാന്‍ഡര്‍ 11 പേരെ വഹിച്ചുകൊണ്ട് പോയ ബോട്ടില്‍ ആക്രമണം നടത്താന്‍ ഉത്തരവിട്ടതായും റിപ്പോര്‍ട്ടില്‍ പരാമര്‍ശിക്കുന്നു. തല്‍ഫലമായി അതിലുണ്ടായിരുന്നു മുഴുവന്‍ പേരും കൊല്ലപ്പെട്ടു. അതിനുശേഷവും യു.എസ് മറ്റ് നിരവധി ബോട്ടുകള്‍ ആക്രമിച്ചുവെന്നും മാധ്യമ റിപ്പോര്‍ട്ട് വെളിപ്പെടുത്തി.
എന്നാല്‍, റിപ്പോര്‍ട്ടിനെ വിമര്‍ശിച്ചുകൊണ്ട് ഹെഗ്സെത്ത് തന്റെ ഔദ്യോഗിക സമൂഹ മാധ്യമ അക്കൗണ്ടിലൂടെ രംഗത്തുവന്നു. 'പതിവുപോലെ മാതൃരാജ്യത്തെ സംരക്ഷിക്കാന്‍ പോരാടുന്ന നമ്മുടെ യോദ്ധാക്കളെ അപകീര്‍ത്തിപ്പെടുത്തുന്നതിനായി കൂടുതല്‍ കെട്ടിച്ചമച്ചതും പ്രകോപനപരവും അവഹേളിക്കുന്നതുമായ റിപ്പോര്‍ട്ടിങ് നടത്തുന്നുവെന്ന്' ഹെഗ്സെത്ത് പറഞ്ഞു.
ഈ ഫലപ്രദമായ ആക്രമണങ്ങളുടെ പ്രഖ്യാപിത ലക്ഷ്യം മാരകമായ മയക്കുമരുന്ന് തടയുക, അമേരിക്കന്‍ ജനതയെ വിഷലിപ്തമാക്കുന്ന നാര്‍ക്കോ-ഭീകരരെ കൊല്ലുക എന്നിവയാണ്. ഞങ്ങള്‍ കൊല്ലുന്ന ഓരോ മയക്കുമരുന്ന് കടത്തുകാരനും ഒരു തീവ്രവാദ സംഘടനയുമായി ബന്ധപ്പെട്ടിരിക്കുന്നു. ബൈഡന്‍ തീവ്രവാദികളെ പ്രോത്സാഹിപ്പിച്ചു. ട്രംപ് ഭരണകൂടം അതിര്‍ത്തി അടച്ചുപൂട്ടി നാര്‍ക്കോ ഭീകരര്‍ക്കെതിരെ ആക്രമണം നടത്തി. ഞങ്ങള്‍ അവരെ നശിപ്പിക്കുകയാണെ'ന്നും ഹെഗ്സെത്ത് തുടര്‍ന്നു.
പ്രസിഡന്റ് ഡോണള്‍ഡ് ട്രംപ് മയക്കുമരുന്നിനെതിരെ യുദ്ധം പ്രഖ്യാപിച്ചതിനാല്‍ ഇതുവരെ 80ലധികം പേര്‍ കൊല്ലപ്പെട്ടുവെന്ന് റോയിട്ടേഴ്‌സ് വാര്‍ത്താ ഏജന്‍സി പറയുന്നു. ബോംബിങ്ങുകള്‍ക്ക് ശേഷം, വെനിസ്വേലയുടെ വിദൂര വടക്കുകിഴക്കന്‍ സംസ്ഥാനമായ സുക്രേയില്‍ പ്രാദേശിക അധികാരികള്‍ നിരീക്ഷണം ശക്തമാക്കിയിട്ടുണ്ട്. വെനസ്വേലന്‍ പ്രസിഡന്റ് നിക്കോളാസ് മദൂറോ നയിക്കുന്ന ഗ്രൂപ്പുകള്‍ ഉള്‍പ്പെടെയുള്ള മയക്കുമരുന്ന് കാര്‍ട്ടലുകളുടെ പ്രവര്‍ത്തനത്തെ ഈ ആക്രമണങ്ങളിലൂടെ തകര്‍ത്തതായാണ് ട്രംപ് ഭരണകൂടത്തി?ന്റെ അവകാശ വാദം. എന്നാല്‍, മദൂറോ ഈ ആരോപണങ്ങള്‍ ശക്തമായി നിഷേധിച്ചിട്ടുണ്ട്.
കരീബിയന്‍ ബോട്ട് ആക്രമണത്തിലെ യു.എസ് സൈന്യത്തിന്റെ നടപടികള്‍ക്കെതിരില്‍ വലിയ വിമര്‍ശനം ഇതിനകം ഉയര്‍ന്നിട്ടുണ്ട്. അവയെ നിയമവിരുദ്ധവും യുദ്ധക്കുറ്റവുമെന്ന് മുദ്രകുത്തുന്നു. ഹെഗ്സെത്ത് നല്‍കിയ ഉത്തരവുകള്‍ നിയമവിരുദ്ധമാണെന്നും അവയെ കൊലപാതകത്തിന് തുല്യമാണെന്നും നിരവധി അഭിപ്രായങ്ങള്‍ ഉയര്‍ന്നു. വെനിസ്വേലന്‍ നേതാവിനെ സ്ഥാനഭ്രഷ്ടനാക്കുന്നത് ലക്ഷ്യമിട്ടണ് അതെന്ന് രണ്ട് ഉദ്യോഗസ്ഥര്‍ പറഞ്ഞതായി റോയിട്ടേഴ്‌സ് വാര്‍ത്താ ഏജന്‍സി പുറത്തുവിട്ടു.