ആശാ പ്രവർത്തകർ കേരളത്തിന്‍റെ നട്ടെല്ലാണ്; അവരുടെ പോരാട്ടം ഞങ്ങളുടേത് കൂടി; നിസ്വാർത്ഥ സേവനത്തെ ബഹുമാനിക്കണം; പിന്തുണയുമായി പ്രിയങ്ക ഗാന്ധി
ഡൽഹി: ആശ വര്‍ക്കര്‍മാര്‍ക്ക് പിന്തുണയുമായി വയനാട് എംപി പ്രിയങ്ക ഗാന്ധി രംഗത്ത്. ആശാ പ്രവർത്തകർ കേരളത്തിന്‍റെ ആരോഗ്യമേഖലയുടെ നട്ടെല്ലാണെന്ന് അവർ വ്യക്തമാക്കി . അവർ ഉയർത്തിപ്പിടിച്ച സംവിധാനം അവരെ ഉപേക്ഷിച്ചുവെന്നും അവർ പറഞ്ഞു. ആശാ പ്രവർത്തകരുടെ പോരാട്ടം ഞങ്ങളുടെത് കൂടിയാണ്. ആശ വർക്കർമാരുടെ നിസ്വാർത്ഥ സേവനത്തെ ബഹുമാനിച്ചുകൊണ്ട് അവർക്ക് ഐക്യദാർഢ്യം പ്രഖ്യാപിക്കുന്നുവെന്നും പ്രിയങ്ക ഗാന്ധി എക്സിലൂടെ വ്യക്തമാക്കി.
അതേസമയം, വേതനം വർധിപ്പിക്കണമെന്ന് ആവശ്യവുമായി സെക്രട്ടറിയേറ്റിന് മുന്നിൽ സമരം ചെയ്യുന്ന ആശവർക്കർമാരുമായി സർക്കാർ നാളെ വീണ്ടും ചർച്ച നടത്തും. സമരക്കാർക്കൊപ്പം തൊഴിലാളി സംഘടനകളായ സിഐടിയു-ഐഎൻടിയുസി നേതാക്കളെയും ചർച്ചക്ക് വിളിക്കുകയും ചെയ്തിട്ടുണ്ട്.
ഇത് മൂന്നാം തവണയാണ് സംസ്ഥാന സര്‍ക്കാര്‍ ആശാവര്‍ക്കര്‍മാരുമായി ചര്‍ച്ച നടത്തുന്നത്. ഓണറേറിയം കൂട്ടുന്നത് അടക്കമുള്ള ആവശ്യങ്ങളിൽ അനുകൂല തീരുമാനമെടുത്ത് ഉത്തരവിറക്കാതെ സമരത്തിൽ നിന്ന് പിന്മാറില്ല എന്നാണ് ആശാമാരുടെ നിലപാട്.