എന്.ഡി.എ മുന്നണിയില് നിന്നും കിട്ടിയത് അവഗണന മാത്രം; ആദിവാസികളുടെ പ്രശ്നങ്ങള് കേള്ക്കാനും ഇടപെടാനും യു.ഡി.എഫിനെപ്പോലുള്ള മുന്നണികള്ക്കേ സാധിക്കൂ; ജെ.ആര്.പിയെ മുന്നണിയില് എടുത്തതില് പായസം വെച്ച് ആഘോഷിക്കുകയാണ് എല്ലായിടത്തുമെന്ന് സി കെ ജാനു
എന്.ഡി.എ മുന്നണിയില് നിന്നും കിട്ടിയത് അവഗണന മാത്രം: സി കെ ജാനു
വയനാട്: നീണ്ട ചര്ച്ചകള്ക്കൊടുവില് സി.കെ. ജാനുവിന്റെ നേതൃത്വത്തിലുള്ള ജനാധിപത്യ രാഷ്ട്രീയ പാര്ട്ടി (ജെ.ആര്.പി) യു.ഡി.എഫിന്റെ ഭാഗമാകുകയാണ്. യു.ഡി.എഫ് അസോസിയേറ്റ് അംഗമായി ജെ.ആര്.പിയെ പ്രഖ്യാപിച്ചതിന് പിന്നാലെ, മുന്നണി മാറ്റത്തെ ആവേശത്തോടെയാണ് അണികള് സ്വീകരിച്ചതെന്ന് സി.കെ. ജാനു പ്രതികരിച്ചു.
എന്.ഡി.എയില് അവഗണന; യു.ഡി.എഫില് പ്രതീക്ഷ
എന്.ഡി.എ മുന്നണിയില് നിന്നും തങ്ങള്ക്ക് അവഗണന മാത്രമാണ് ലഭിച്ചതെന്ന് സി.കെ. ജാനു തുറന്നടിച്ചു. ആദിവാസികളുടെ പ്രശ്നങ്ങള് കേള്ക്കാനും ഇടപെടാനും യു.ഡി.എഫിനെപ്പോലുള്ള മുന്നണികള്ക്കേ സാധിക്കൂ എന്ന് അവര് വ്യക്തമാക്കി.
'യുഡിഎഫില് ചേരണമെന്നായിരുന്നു പാര്ട്ടിയിലെ പൊതുവികാരം. തീരുമാനം സ്വാഗതാര്ഹം. എല്ലാവരെയും ഒപ്പം നിര്ത്തുന്ന പാര്ട്ടിയാണ് യുഡിഎഫ്. പാര്ട്ടിയെ മുന്നണിയില് എടുത്തതില് പായസം വെച്ച് ആഘോഷിക്കുകയാണ് എല്ലായിടത്തും'. യുഡിഎഫ് പോലുള്ള സര്ക്കാരുകളാണ് ആദിവാസികള്ക്ക് വേണ്ടി ഇടപെടുന്നതെന്നും പാര്ട്ടിയിലുള്ളവരെല്ലാം സന്തോഷത്തിലാണെന്നും അവര് പ്രതികരിച്ചു.
സീറ്റ് ചര്ച്ചകള് പിന്നീട്
മുന്നണി പ്രവേശനത്തെക്കുറിച്ച് ഗൗരവകരമായ ചര്ച്ചകള് നടന്നെങ്കിലും നിയമസഭാ തിരഞ്ഞെടുപ്പിലെ സീറ്റ് വിഭജനത്തെക്കുറിച്ച് നിലവില് ധാരണയായിട്ടില്ല. ആദ്യം പാര്ട്ടിക്ക് ഉള്ളില് ചര്ച്ച ചെയ്ത ശേഷം സീറ്റുകളെക്കുറിച്ചുള്ള കാര്യങ്ങള് യു.ഡി.എഫുമായി സംസാരിക്കുമെന്ന് അവര് പറഞ്ഞു. മുന്നണിയുടെ ഭാഗമാകുമ്പോള് സ്വാഭാവികമായും ഇത്തരം പരിഗണനകള് ഉണ്ടാകുമെന്നാണ് പാര്ട്ടിയുടെ പ്രതീക്ഷ.
വിപുലമാകുന്ന യു.ഡി.എഫ് സഖ്യം
തദ്ദേശ തിരഞ്ഞെടുപ്പിന് ശേഷം നടന്ന ആദ്യ യു.ഡി.എഫ് യോഗത്തിലാണ് സുപ്രധാന തീരുമാനങ്ങള് ഉണ്ടായത്. സി.കെ. ജാനുവിന് പുറമെ പി.വി. അന്വര് (ഡി.എം.കെ), വിഷ്ണുപുരം ചന്ദ്രശേഖരന് എന്നിവരുടെ പാര്ട്ടികളെയും യു.ഡി.എഫ് അസോസിയേറ്റ് അംഗങ്ങളായി പരിഗണിച്ചിട്ടുണ്ട്.
നിയമസഭാ തിരഞ്ഞെടുപ്പിന് മുന്നോടിയായി പുതിയ ഘടകകക്ഷികളുമായി വിശദമായ ചര്ച്ചകള് നടത്തുമെന്നും, അവരുടെ പിന്തുണ ഏത് രീതിയില് പ്രയോജനപ്പെടുത്താമെന്ന് തീരുമാനിക്കുമെന്നും പ്രതിപക്ഷ നേതാവ് വി.ഡി. സതീശന് അറിയിച്ചു. ഇടതുപക്ഷ സഹയാത്രികരായിരുന്ന പലരും വരും ദിവസങ്ങളില് യു.ഡി.എഫിനൊപ്പം ചേരുമെന്നും അദ്ദേഹം കൂട്ടിച്ചേര്ത്തു.