കൊച്ചി കോര്‍പ്പറേഷന്‍: കോണ്‍ഗ്രസ് ആദ്യഘട്ട സ്ഥാനാര്‍ത്ഥി പട്ടിക പുറത്തിറക്കി; യുവത്വത്തിനും പരിചയസമ്പത്തിനും ഒരുപോലെ പ്രാധാന്യം; ദീപ്തി മേരി വര്‍ഗീസ് സ്റ്റേഡിയം വാര്‍ഡില്‍ മത്സരിക്കും; ആദ്യഘട്ടത്തില്‍ പ്രഖ്യാപിച്ചത് 40 വാര്‍ഡുകളിലേക്കുള്ള സ്ഥാനാര്‍ഥികളെ
കൊച്ചി കോര്‍പ്പറേഷനിലേക്കുള്ള കോണ്‍ഗ്രസിന്റെ ആദ്യഘട്ട സ്ഥാനാര്‍ത്ഥി പട്ടിക പ്രഖ്യാപിച്ചു
കൊച്ചി: കൊച്ചി കോര്‍പ്പറേഷനിലേക്കുള്ള കോണ്‍ഗ്രസിന്റെ ആദ്യഘട്ട സ്ഥാനാര്‍ത്ഥി പട്ടിക പ്രഖ്യാപിച്ചു. 40 വാര്‍ഡുകളിലേക്കുള്ള സ്ഥാനാര്‍ത്ഥികളെയാണ് കോണ്‍ഗ്രസ് നേതൃത്വം പ്രഖ്യാപിച്ചത്. സ്റ്റേഡിയം വാര്‍ഡില്‍ ദീപ്തി മേരി വര്‍ഗീസ് മത്സരിക്കും. ജനറല്‍ സീറ്റുകളിലും വനിതകളെ പരിഗണിക്കുമെന്നും, സംവരണ സീറ്റുകള്‍ക്ക് പുറത്തും വനിതകള്‍ക്ക് സ്ഥാനാര്‍ത്ഥിത്വത്തില്‍ കൂടുതല്‍ പ്രാധാന്യം നല്‍കുമെന്നും സ്ഥാനാര്‍ത്ഥി പട്ടിക പ്രഖ്യാപന വേളയില്‍ കോണ്‍ഗ്രസ് നേതാക്കള്‍ അറിയിച്ചു.
എറണാകുളം ഡിസിസി പ്രസിഡന്റ് മുഹമ്മദ് ഷിയാസ്, മുന്‍ മേയര്‍ ടോണി ചമ്മിണി, യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്റേഷന്‍, ടി.ജെ. വിനോദ് എംഎല്‍എ, ദീപ്തി മേരി വര്‍ഗീസ്, അബ്ദുള്‍ മുത്തലിബ് എന്നിവര്‍ സംയുക്തമായാണ് സ്ഥാനാര്‍ത്ഥി പട്ടിക പുറത്തുവിട്ടത്. യുവത്വവും പരിചയസമ്പന്നരുമായ നേതാക്കളെ ഒരുപോലെ പരിഗണിച്ചാണ് പട്ടിക തയ്യാറാക്കിയിട്ടുള്ളത്. 'സര്‍പ്രൈസ് സ്ഥാനാര്‍ത്ഥികള്‍ ഉണ്ടാകുമോ?' എന്ന ചോദ്യത്തിന്, 'നമുക്ക് നോക്കാം' എന്ന് മുഹമ്മദ് ഷിയാസ് മറുപടി നല്‍കി.
ഫോര്‍ട്ട് കൊച്ചി ഒന്നാം ഡിവിഷനില്‍ മുന്‍ കൗണ്‍സിലര്‍ ഷൈനി മാത്യു വീണ്ടും ജനവിധി തേടും. മൂന്നാം ഡിവിഷന്‍ ഈരവേലിയില്‍ റഹീന റഫീഖ്, നാലാം ഡിവിഷന്‍ കരിപ്പാലത്ത് മുന്‍ കൗണ്‍സിലര്‍ കെ.എം. മനാഫ്, എട്ടാം ഡിവിഷന്‍ കരുവേലിപ്പടിയില്‍ കവിത ഹരികുമാര്‍, ഒമ്പതാം ഡിവിഷന്‍ ഐലന്‍ഡ് നോര്‍ത്തില്‍ മുന്‍ പ്രതിപക്ഷ നേതാവ് അഡ്വ. ആന്റണി കുരീത്തറ എന്നിവര്‍ മത്സരരംഗത്തുണ്ടാകും.
ഇതു കൂടാതെ, 11-ാം ഡിവിഷന്‍ എറണാകുളം സൗത്തില്‍ മുന്‍ കൗണ്‍സിലര്‍ കെ.വി.പി. കൃഷ്ണകുമാര്‍, ഗാന്ധിനഗര്‍ 12-ാം ഡിവിഷനില്‍ നിര്‍മ്മല ടീച്ചര്‍, എറണാകുളം സെന്‍ട്രല്‍ 14-ാം ഡിവിഷനില്‍ മുന്‍ കൗണ്‍സിലര്‍ മനു ജേക്കബ്, 15-ാം ഡിവിഷന്‍ എറണാകുളം നോര്‍ത്തില്‍ ടൈസണ്‍ മാത്യു, 16-ാം ഡിവിഷന്‍ കലൂര്‍ സൗത്തില്‍ മുന്‍ കൗണ്‍സിലര്‍ എം.ജി. അരിസ്റ്റോട്ടില്‍, 19-ാം ഡിവിഷന്‍ അയ്യപ്പന്‍കാവിലെ ദീപക് ജോയി, 20-ാം ഡിവിഷന്‍ പൊറ്റക്കുഴിയില്‍ അഡ്വ. സെറീന ജോര്‍ജ് എന്നിവരും കോണ്‍ഗ്രസ് ടിക്കറ്റില്‍ മത്സരിക്കുമെന്ന് നേതാക്കള്‍ അറിയിച്ചു.