തീവ്രമായ യൂണിയന് പ്രവര്ത്തനങ്ങള് വ്യവസായങ്ങളെ ഇവിടുന്ന് ഓടിച്ചുവിട്ടു; ഇപ്പോള്, പൗരന്മാരെ സ്വന്തം വീടുകളില് തടവുകാരാക്കി; ഭാരത് ബന്ദിന് പകരം കേരള ബന്ദായി മാറി; പഴഞ്ചന് 'കായികബല' രീതികളില് കടിച്ചുതൂങ്ങുന്നത് നാടിനെ പിന്നോട്ടടിക്കും; വിമര്ശനവുമായി ശശി തരൂര് എംപി
വിമര്ശനവുമായി ശശി തരൂര് എംപി
തിരുവനന്തപുരം: കേന്ദ്രനയങ്ങള്ക്കെതിരെ സംയുക്ത ട്രേഡ് യൂണിയനുകള് ആഹ്വാനം ചെയ്ത 24 മണിക്കൂര് ദേശീയ പണിമുടക്ക് കേരളത്തില് 'ഭാരത് ബന്ദി'നു പകരം 'കേരള ബന്ദായി' മാറിയെന്ന് കോണ്ഗ്രസ് നേതാവും തിരുവനന്തപുരം എംപിയുമായ ശശി തരൂര്. സംഘടിത ന്യൂനപക്ഷം അസംഘടിതരായ ഭൂരിപക്ഷത്തെ തടവിലാക്കുന്ന സാഹചര്യമാണ് സംസ്ഥാനത്ത് നിലവിലുള്ളതെന്നും, ഇത് കേരളത്തെ വ്യവസായ സൗഹൃദമല്ലാതാക്കുമെന്നും അദ്ദേഹം വിമര്ശിച്ചു.
ഇന്ത്യയുടെ മറ്റ് ഭാഗങ്ങള് ഇത്തരം നിര്ബന്ധിത തടസ്സപ്പെടുത്തലുകളില് നിന്ന് മുന്നോട്ട് പോയപ്പോള്, കേരളം ഇപ്പോഴും ബന്ദിയാക്കപ്പെട്ടിരിക്കുകയാണെന്ന് തരൂര് തന്റെ ഫേസ്ബുക്ക് കുറിപ്പില് വ്യക്തമാക്കി. ഫാക്ടറികള്ക്കുള്ളില് നിന്ന് തെരുവുകളിലേക്കും വീടുകളിലേക്കും വ്യാപിച്ച തീവ്ര യൂണിയന് പ്രവര്ത്തനം മൂലം കേരളത്തിന്റെ സല്പ്പേരിന് ഇതിനകം മങ്ങലേറ്റുവെന്നും അദ്ദേഹം ചൂണ്ടിക്കാട്ടി.
ലോകവും ഇന്ത്യയുടെ മറ്റ് ഭാഗങ്ങളും തള്ളിക്കളഞ്ഞ കാലഹരണപ്പെട്ട സമരരീതികള് പിന്തുടര്ന്നാല് ആധുനികവും നിക്ഷേപകസൗഹൃദവുമായ ലക്ഷ്യസ്ഥാനമായി കേരളത്തിന് മാറാന് കഴിയില്ലെന്ന് തരൂര് പറഞ്ഞു. പ്രതിഷേധിക്കാനുള്ള അവകാശത്തെ താന് പിന്തുണയ്ക്കുന്നുവെങ്കിലും മറ്റൊരാളുടെ സ്വതന്ത്ര സഞ്ചാരത്തെ തടസ്സപ്പെടുത്താനുള്ള അവകാശത്തെ പിന്തുണയ്ക്കുന്നില്ലെന്നും അദ്ദേഹം ഓര്മ്മിപ്പിച്ചു. ഒരു ഇന്ത്യക്കാരനും ഭരണഘടനാപരമായി അത്തരം അവകാശമില്ലെന്നും തരൂര് കൂട്ടിച്ചേര്ത്തു.
സംസ്ഥാനത്തെ തീവ്രമായ യൂണിയന് പ്രവര്ത്തനങ്ങള് വ്യവസായങ്ങളെ ഇവിടുന്ന് ഓടിച്ചുവിട്ടുവെന്ന് തരൂര് കുറ്റപ്പെടുത്തി. പൗരന്മാരെ സ്വന്തം വീടുകളില് തടവുകാരാക്കുകയും കടയുടമകളെ ഷട്ടറുകള് താഴ്ത്താന് നിര്ബന്ധിക്കുകയും ചെയ്യുന്ന ഇത്തരം പഴഞ്ചന് 'കായികബല' രീതികളില് കടിച്ചുതൂങ്ങുന്നതിലൂടെ, യുവാക്കള്ക്കും സംരംഭകര്ക്കും സംസ്ഥാനം ഒട്ടും അനുയോജ്യമല്ലെന്ന് നാം ഉറപ്പുവരുത്തുകയാണെന്നും അദ്ദേഹം മുന്നറിയിപ്പ് നല്കി. ഈ 'സ്വയം നശിപ്പിക്കുന്ന ശീലം' ഉപേക്ഷിച്ച് ക്രിയാത്മകമായ വിയോജിപ്പുകള്ക്ക് വഴിമാറാന് സമയമായെന്നും ശശി തരൂര് ആഹ്വാനം ചെയ്തു.
ശശി തരൂരിന്റെ ഫെയ്സ്ബുക്ക് കുറിപ്പിന്റെ പൂര്ണരൂപം
ഇന്നത്തെ 'ഭാരത് ബന്ദ്' യഥാര്ത്ഥത്തില് മറ്റൊരു 'കേരള ബന്ദ്' മാത്രമായി ഒതുങ്ങി എന്നത് ഖേദകരമായ ഒരു വൈരുദ്ധ്യമാണ്. ഇന്ത്യയുടെ മറ്റു ഭാഗങ്ങള് ഇത്തരം നിര്ബന്ധിത തടസ്സപ്പെടുത്തലുകള്ക്ക് അപ്പുറത്തേക്ക് വളര്ന്നപ്പോള്, അസംഘടിതരായ ഭൂരിപക്ഷത്തിന് മേല് സംഘടിത ന്യൂനപക്ഷം നടത്തുന്ന ഈ അതിക്രമത്തിന് മുന്നില് കേരളം മാത്രം ഇപ്പോഴും ബന്ദിയാക്കപ്പെട്ടിരിക്കുകയാണ്.
രാഷ്ട്രീയത്തില് പ്രവേശിച്ചത് മുതല് എന്റെ നിലപാട് വ്യക്തമാണ്: പ്രതിഷേധിക്കാനുള്ള അവകാശത്തെ ഞാന് പിന്തുണയ്ക്കുന്നു, എന്നാല് തടസ്സപ്പെടുത്താനുള്ള അവകാശത്തെയല്ല. മറ്റൊരാളുടെ സ്വതന്ത്രമായ സഞ്ചാരത്തെ തടയാന് ഒരു ഇന്ത്യക്കാരനും ഭരണഘടനാപരമായ അവകാശമില്ല.
നമ്മുടെ തീവ്രമായ യൂണിയന് പ്രവര്ത്തനങ്ങള് മൂലം വ്യവസായങ്ങളെ നാം ഇവിടുന്ന് ഓടിച്ചുവിട്ടു; ഇപ്പോള്, പൗരന്മാരെ സ്വന്തം വീടുകളില് തടവുകാരാക്കുകയും കടയുടമകളെ ഷട്ടറുകള് താഴ്ത്താന് നിര്ബന്ധിക്കുകയും ചെയ്യുന്ന ഇത്തരം പഴഞ്ചന് 'കായികബല' രീതികളില് കടിച്ചുതൂങ്ങുന്നതിലൂടെ, യുവാക്കള്ക്കും സംരംഭകര്ക്കും നമ്മുടെ സംസ്ഥാനം ഒട്ടും അനുയോജ്യമല്ലെന്ന് നാം ഉറപ്പുവരുത്തുകയാണ്.
സ്വയം നശിപ്പിക്കുന്ന ഈ ശീലം ഉപേക്ഷിക്കാന് സമയമായിരിക്കുന്നു. ക്രിയാത്മകമായ വിയോജിപ്പുകള് കൊണ്ട് നമുക്ക് ഇതിനെ മാറ്റിസ്ഥാപിക്കാവുന്നതേയുള്ളൂ. എന്റെ സ്വന്തം പാര്ട്ടി ഉള്പ്പെട്ടിരിക്കുമ്പോള് പോലും, പണിമുടക്കാനുള്ള അവകാശത്തില് മറ്റുള്ളവരെക്കൊണ്ട് നിര്ബന്ധിതമായി പണിമുടക്കിക്കാനുള്ള അവകാശം ഉള്പ്പെടുന്നില്ലെന്ന് ഞാന് കാലങ്ങളായി വാദിക്കുന്നതാണ്. ദൈനംദിന ജീവിതവും വ്യാപാരവും ഗതാഗതവും തടസ്സപ്പെടുത്തി ഒരു സംസ്ഥാനത്തെ സ്തംഭിപ്പിക്കുന്നത് സാധാരണക്കാരന്റെ സ്വാതന്ത്ര്യത്തിന് മേലുള്ള കടന്നുകയറ്റമാണ്.
ഫാക്ടറികള്ക്കുള്ളില് നിന്ന് നമ്മുടെ തെരുവുകളിലേക്കും വീടുകളിലേക്കും വ്യാപിച്ച തീവ്ര യൂണിയന് പ്രവര്ത്തനം മൂലം കേരളത്തിന്റെ സല്പ്പേരിന് ഇതിനകം തന്നെ മങ്ങലേറ്റു കഴിഞ്ഞു. ലോകവും ഇന്ത്യയുടെ മറ്റു ഭാഗങ്ങളും തള്ളിക്കളഞ്ഞ കാലഹരണപ്പെട്ട സമരരീതികള് പിന്തുടര്ന്നുകൊണ്ട്, ആധുനികവും നിക്ഷേപക സൗഹൃദവുമായ ഒരു ലക്ഷ്യസ്ഥാനമായി മാറാന് നമുക്ക് കഴിയില്ല.
വിയോജിക്കാനുള്ള അവകാശത്തെ നമുക്ക് മാനിക്കാം, എന്നാല് അതോടൊപ്പം നമ്മളോട് വിയോജിപ്പ് പ്രകടിപ്പിക്കാനുള്ള മറ്റുള്ളവരുടെ അവകാശത്തെയും, ജോലി ചെയ്യാനും സഞ്ചരിക്കാനുമുള്ള സ്വാതന്ത്ര്യത്തെയും നമുക്ക് ശക്തമായി സംരക്ഷിക്കാം. പ്രതിഷേധം എന്നത് ഒരു ധാര്മ്മിക പ്രഖ്യാപനമായിരിക്കണം, അല്ലാതെ കായികമായ ഒരു ഉപരോധമാകരുത്.