രമേഷ് പിഷാരടി കൊടുത്തത് 'സീന്' മാറ്റുന്ന മറുപടി; ഐസക് ഒടുവില് മുട്ടുമടക്കി! 'കോമാളി' പ്രയോഗത്തില് ഖേദപ്രകടനം നടത്തി തടിയൂരല്; വിവാദ പരാമര്ശം തെരഞ്ഞെടുപ്പു ഗോദയില് തിരിച്ചടിയാകുമെന്ന ഭയത്തില് തോമസ് ഐസക്കിന്റെ ക്ഷമാപണം; പാലക്കാട്ടെ യുഡിഎഫ് സ്ഥാനാര്ഥിയെ ചൊറിഞ്ഞ ഐസക്കിന് കിട്ടിയത് എട്ടിന്റെ പണി!
രമേഷ് പിഷാരടി കൊടുത്തത് 'സീന്' മാറ്റുന്ന മറുപടി; ഐസക് ഒടുവില് മുട്ടുമടക്കി!
പാലക്കാട്: രമേഷ് പിഷാരടിക്കെതിരായ കോമാളി പരാമര്ശത്തില് ഖേദം പ്രകടിപ്പിച്ച് തോമസ് ഐസക്. തെരഞ്ഞെടുപ്പു രംഗത്ത് തിരിച്ചടിയാകുമെന്ന് ഭയന്നാണ് വിവാദ പരാമര്ശത്തില് നിന്നും ഐസക്ക് പിന്മാറിയത്. അദ്ദേഹത്തിന്റെ അഭിനയമികവില് എതിര്അഭിപ്രായമില്ലെന്നും മനോവിഷമം ഉണ്ടാക്കിയതില് ഖേദമുണ്ടെന്നും തോമസ് ഐസക് പറഞ്ഞു. പലസ്തീന് വിഷയത്തിലെ പരാമര്ശത്തെയാണ് വിമര്ശിച്ചതെന്നും ഐസക് വ്യക്തമാക്കി.
നേരത്തേ, കോമാളി വേഷംകെട്ടി നടക്കുന്നെന്ന തോമസ് ഐസക്കിന്റെ പരിഹാസത്തിന് രമേഷ് പിഷാരടി മറുപടി നല്കിയിരുന്നു. സംസ്കാരം സമരം ചെയ്താല് കിട്ടുന്ന കാര്യമല്ല. നാടകത്തില് കൂടി രാഷ്ട്രീയം പ്രചരിപ്പിച്ചവരാണവര്. എന്തുകൊണ്ടാണ് ഇപ്പോള് അസഹിഷ്ണുതയെന്നും പിഷാരടി .മുതിര്ന്ന നേതാവിനോട് ഒപ്പത്തിനൊപ്പം പറയാനില്ലെന്നും പിഷാരടി പറഞ്ഞു.
കോമാളി വേഷം കെട്ടി നടക്കുന്ന നടന്മാരെ നിര്ത്താതെ ജനകീയ പിന്തുണയുള്ള ആരെയെങ്കിലും നിര്ത്തണമായിരുന്നു' എന്നായിരുന്നു തോമസ് ഐസക്കിന്റെ വിമര്ശനം. ജനങ്ങള്ക്ക് അംഗീകാരമുള്ള സ്ഥാനാര്ഥികളൊക്കെ ഉണ്ട്. ഇങ്ങനെയൊക്കെ കോമാളി വേഷം കെട്ടി നടക്കുന്ന നടന്മാരെയൊക്കെ പിടിച്ച് മല്സരിപ്പിച്ചിട്ട് അയ്യോ ഞങ്ങള്ക്ക് വോട്ട് കിട്ടുന്നില്ല, ഞങ്ങളുടെ വോട്ട് ദേ എല്ഡിഎഫ് ഭിന്നിപ്പിക്കാന് പോകുന്നു എന്ന് പറഞ്ഞു നടന്നിട്ട് വല്ല കാര്യവും ഉണ്ടോ' എന്നായിരുന്നു തോമസ് ഐസക്കിന്റെ ആക്ഷേപം.
സംസ്കാരം എന്നത് സമരം ചെയ്താല് കിട്ടുന്ന ഒന്നല്ലെന്നും അത് വ്യക്തിപരമായ പെരുമാറ്റത്തിലൂടെയാണ് പ്രകടമാകേണ്ടതെന്നുമാണ് പിഷാരടി പറഞ്ഞത്. മറുപക്ഷത്താണെങ്കിലും എതിരാളികളെ ആദരിക്കുകയും ബഹുമാനിക്കുകയും ചെയ്യുന്ന രാഷ്ട്രീയ ശൈലിയാണ് തന്റേതെന്ന് പിഷാരടി പറഞ്ഞു. നിരവധി കലാപ്രസ്ഥാനങ്ങളെയും സാംസ്കാരിക വേദികളെയും നയിച്ചവരാണ് കലാകാരന്മാരെ ഇത്തരത്തില് താഴ്ത്തിക്കെട്ടുന്നത് എന്നത് ദൗര്ഭാഗ്യകരമാണ്. രാഷ്ട്രീയ വിയോജിപ്പുകള് നയപരമായ കാര്യങ്ങളിലാകാം, എന്നാല് അത് വ്യക്തിഹത്യയിലേക്ക് കടക്കുന്നത് ജനാധിപത്യത്തിന് ഭൂഷണമല്ലെന്ന് അദ്ദേഹം വിമര്ശിച്ചു.
പാലക്കാട് മണ്ഡലത്തിലെ ജനങ്ങള് തന്റെ സ്ഥാനാര്ത്ഥിത്വം ഹൃദയപൂര്വ്വം ഏറ്റെടുത്തുകഴിഞ്ഞുവെന്ന് പിഷാരടി ആത്മവിശ്വാസം പ്രകടിപ്പിച്ചു. ഒരു സിനിമയുടെ വിജയം നിശ്ചയിക്കുന്നത് 'മൗത്ത് പബ്ലിസിറ്റി' ആണെന്ന് പറയാറുണ്ട്. പാലക്കാട് തെരുവുകളില് ഇപ്പോള് അതാണ് കാണുന്നത്. ജനങ്ങള്ക്കിടയില് തന്റെ സ്ഥാനാര്ത്ഥിത്വത്തെക്കുറിച്ച് വലിയ പോസിറ്റീവ് തരംഗമുണ്ടെന്നും ഇത് വോട്ടായി മാറുമെന്നും അദ്ദേഹം പറഞ്ഞു.
തനിക്കെതിരെ ഉയര്ന്ന എല്ലാ കുപ്രചാരണങ്ങളെയും ജനം കൃത്യമായി നിരീക്ഷിക്കുന്നുണ്ടെന്ന് പിഷാരടി പറഞ്ഞു. എന്.ഡി.എ. സ്ഥാനാര്ത്ഥി അഖില് മാരാര് നടത്തിയ പരാമര്ശങ്ങള്ക്കും മറുപടി നല്കാനില്ലെന്ന് അദ്ദേഹം വ്യക്തമാക്കി. അഖില് മാരാര് ഇന്ന് പറയുന്നത് നാളെ മാറ്റാന് സാധ്യതയുണ്ടെന്നും മൂന്ന് വര്ഷം കഴിഞ്ഞാല് അദ്ദേഹം ഇപ്പോള് പറയുന്ന കാര്യങ്ങളില് നിലനില്ക്കില്ലെന്നും പിഷാരടി പരിഹസിച്ചു. അത്തരമൊരാളെ കുറിച്ച് സംസാരിച്ച് സമയം കളയാനില്ലെന്നാണ് അദ്ദേഹത്തിന്റെ പക്ഷം.
പാലക്കാട് നഗരസഭയിലും മണ്ഡലത്തിലും യു.ഡി.എഫ്. നടപ്പിലാക്കിയ വികസന പ്രവര്ത്തനങ്ങളുടെ തുടര്ച്ചയ്ക്കായി ജനങ്ങള് വോട്ട് ചെയ്യുമെന്ന് പിഷാരടി ഉറപ്പിച്ചു പറഞ്ഞു. ഓരോ വോട്ടര്ക്കും തന്നെ നേരിട്ട് അറിയാമെന്നും കലാകാരന് എന്ന നിലയിലുള്ള തന്റെ പ്രതിച്ഛായ രാഷ്ട്രീയത്തിലും കരുത്താകുമെന്നും അദ്ദേഹം വിശ്വസിക്കുന്നു. പ്രചാരണത്തിന്റെ അവസാന ഘട്ടത്തിലേക്ക് കടക്കുമ്പോള് മണ്ഡലം പൂര്ണ്ണമായും യു.ഡി.എഫിന് അനുകൂലമാണെന്നാണ് അദ്ദേഹത്തിന്റെ വിലയിരുത്തല്.
രാഷ്ട്രീയ എതിരാളികള് ഉന്നയിക്കുന്ന ആരോപണങ്ങള് തന്റെ വികസന കാഴ്ചപ്പാടുകളെ ബാധിക്കില്ല. പാലക്കാടിന്റെ അടിസ്ഥാന സൗകര്യ വികസനത്തിനും യുവാക്കളുടെ തൊഴിലവസരങ്ങള്ക്കും മുന്ഗണന നല്കുന്ന പദ്ധതികളാണ് തന്റെ മനസ്സിലുള്ളത്. അനാവശ്യ വിവാദങ്ങള് ഉണ്ടാക്കി ജനശ്രദ്ധ തിരിക്കാനാണ് ഇടതുപക്ഷവും ബി.ജെ.പി.യും ശ്രമിക്കുന്നതെന്നും പിഷാരടി ആരോപിച്ചു.
പാലക്കാട്ടെ വോട്ടര്മാരുടെ വിവേകത്തില് തനിക്ക് പൂര്ണ്ണ വിശ്വാസമുണ്ടെന്ന് അദ്ദേഹം പറഞ്ഞു. പ്രസംഗങ്ങളില് മാത്രം വികസനം പറയുന്നവരെയല്ല, പ്രവര്ത്തിയില് വികസനം കാണിച്ചവരെയാണ് ജനങ്ങള് പിന്തുണയ്ക്കുക. തന്നെ വ്യക്തിപരമായി അധിക്ഷേപിക്കുന്നവര്ക്ക് വോട്ടിലൂടെ ജനങ്ങള് മറുപടി നല്കുമെന്നും പിഷാരടി മാധ്യമങ്ങളോട് പറഞ്ഞു.
മണ്ഡലത്തിലെ ഓരോ പഞ്ചായത്തിലും വോട്ടര്മാരുമായി നേരിട്ട് സംവദിക്കുന്ന തിരക്കിലാണ് പിഷാരടി ഇപ്പോള്. കുടുംബയോഗങ്ങളിലും പൊതുപരിപാടികളിലും ലഭിക്കുന്ന ആവേശകരമായ സ്വീകരണം വിജയത്തിന്റെ സൂചനയാണെന്ന് അദ്ദേഹം കരുതുന്നു. യു.ഡി.എഫ്. പ്രവര്ത്തകരുടെ ഐക്യവും ആവേശവും മണ്ഡലത്തില് പ്രകടമാണെന്നും അദ്ദേഹം വ്യക്തമാക്കി.