കുട്ടനാട് എം എല്‍ എ തോമസ് കെ തോമസ് എന്‍ സി പി സംസ്ഥാന അദ്ധ്യക്ഷന്‍; എ കെ ശശീന്ദ്രനും പച്ചക്കൊടി കാട്ടിയതോടെ തീരുമാനം ശരദ് പവാറിന്റെ സാന്നിധ്യത്തില്‍; ഔദ്യോഗിക പ്രഖ്യാപനം പിന്നീട്; തോമസ് കെ തോമസും ശശീന്ദ്രന്‍ വിഭാഗത്തിനൊപ്പം ചേര്‍ന്നതോടെ പൂര്‍ണമായി ഒറ്റപ്പെട്ടത് പി സി ചാക്കോ
കുട്ടനാട് എം എല്‍ എ തോമസ് കെ തോമസ് എന്‍ സി പി സംസ്ഥാന അദ്ധ്യക്ഷന്‍
മുംബൈ : കുട്ടനാട് എംഎല്‍എ തോമസ് കെ. തോമസിനെ എന്‍സിപി സംസ്ഥാന അധ്യക്ഷനായി തിരഞ്ഞെടുത്തു. മുംബൈയില്‍ പി.സി.ചാക്കോയും, എ.കെ.ശശീന്ദ്രനും, തോമസ് കെ.തോമസും ശരദ് പവാറുമായി നടത്തിയ ചര്‍ച്ചയിലാണ് ഇതുസംബന്ധിച്ച തീരുമാനം.
തോമസിന്റെ തിരഞ്ഞെടുപ്പ് സംസ്ഥാന നേതൃത്വം വഴിയാകട്ടെയെന്ന് ശരദ് പവാര്‍ അഭിപ്രായപ്പെട്ടു. ജില്ലാ പ്രസിഡന്റുമാരുടെ പിന്തുണ ഉറപ്പായ ശേഷമാകും പ്രഖ്യാപനം. കേന്ദ്രനിരീക്ഷകനായി ജിതേന്ദ്ര ആവാഡ് 25ന് കേരളത്തിലെത്തും. കേന്ദ്ര നിരീക്ഷകന്‍ സംസ്ഥാനത്തെത്തിയ ശേഷം ജില്ലാ പ്രസിഡന്റുമാരുമായും സംസ്ഥാന നേതാക്കളുമായും ചര്‍ച്ച നടത്തും. ഇതിനുശേഷമാകും ഔദ്യോഗിക പ്രഖ്യാപനം.
പാര്‍ട്ടി തീരുമാനിച്ചിട്ടും മുഖ്യമന്ത്രി, തോമസ് കെ.തോമസിനെ മന്ത്രിയാക്കാത്തത് തനിക്ക് വലിയ പ്രയാസമുണ്ടാക്കിയെന്നും മന്ത്രിസ്ഥാനം സംബന്ധിച്ച് പാര്‍ട്ടിയില്‍ ഉരുണ്ടുകൂടിയ പ്രശ്‌നങ്ങള്‍ പിളര്‍പ്പിലേക്ക് നയിക്കുമെന്ന ഘട്ടമുണ്ടായതുകൊണ്ടാണ് താന്‍ അധ്യക്ഷ സ്ഥാനം ഒഴിഞ്ഞതെന്നും പി.സി. ചാക്കോ ശരദ് പവാറിനോട് പറഞ്ഞു. പി.സി.ചാക്കോ ദേശീയ വര്‍ക്കിങ് പ്രസിഡന്റായി തുടരും. കഴിഞ്ഞ ബുധനാഴ്ചയാണ് അദ്ദേഹം സംസ്ഥാന അദ്ധ്യക്ഷ സ്ഥാനം രാജിവെച്ചത്.
സംസ്ഥാന കൗണ്‍സില്‍ യോഗം വിളിപ്പിച്ച് ചാക്കോയെ പ്രസിഡന്റുസ്ഥാനത്തു നിന്ന് നീക്കാനുള്ള പ്രമേയം കൊണ്ടുവരാനുള്ള ശ്രമത്തിലായിരുന്നു ശശീന്ദ്രന്‍ വിഭാഗം. അതിനായി അവര്‍ ഒപ്പുശേഖരണം നടത്തിക്കൊണ്ടിരിക്കുന്ന ഘട്ടത്തിലാണ് ചാക്കോ അപ്രതീക്ഷിതമായി രാജി സമര്‍പ്പിച്ചത്.
മന്ത്രിസ്ഥാനത്തുനിന്ന് ശശീന്ദ്രനെ മാറ്റി പകരം തോമസ് കെ. തോമസിനെ വെക്കാനുള്ള ചാക്കോയുടെ നീക്കങ്ങളാണ് അദ്ദേഹത്തിനുതന്നെ തിരിച്ചടിയായത്. മന്ത്രിമാറ്റത്തിനെതിരേ മുഖ്യമന്ത്രി പിണറായി വിജയന്‍ ശക്തമായ നിലപാടെടുത്തതോടെ ചാക്കോയ്ക്ക് പാര്‍ട്ടിയില്‍ പിടിച്ചുനില്‍ക്കാന്‍ പറ്റാതായി. ഒടുവില്‍ നിലനില്‍പ്പിനായി തോമസ് കെ. തോമസും ശശീന്ദ്രന്‍ വിഭാഗത്തിനൊപ്പം ചേര്‍ന്നതോടെ കോണ്‍ഗ്രസില്‍ നിന്നെത്തിയ ചാക്കോ പാര്‍ട്ടിയില്‍ പൂര്‍ണമായി ഒറ്റപ്പെട്ടു. അന്തരിച്ച മുന്‍ കുട്ടനാട് എംഎല്‍എ തോമസ് ചാണ്ടിയുടെ സഹോദരനാണ് തോമസ് കെ.തോമസ്.