'എന്നും എപ്പോഴും പാര്‍ട്ടിയാണ് വലുത്' എന്ന് പോസ്റ്റിട്ട് മൂന്നു ദിവസത്തിനുള്ളില്‍ ബിജെപിയില്‍; മറുകണ്ടം ചാടിയത് യുഡിഎഫ് സ്ഥാനാര്‍ഥിക്ക് വോട്ട് അഭ്യര്‍ഥിച്ചുള്ള കുറിപ്പുകള്‍ ഇട്ടതിന് പിന്നാലെ; യൂത്ത് കോണ്‍ഗ്രസ് നേതാവ് അഖില്‍ ഓമനക്കുട്ടന്റെ ചാട്ടം അപ്രതീക്ഷിതമായി
യൂത്ത് കോണ്‍ഗ്രസ് നേതാവ് ബിജെപിയില്‍
പത്തനംതിട്ട: യൂത്ത് കോണ്‍ഗ്രസ് സംസ്ഥാന സെക്രട്ടറി ആയിരുന്ന അഖില്‍ ഓമനക്കുട്ടന്‍ ബിജെപിയില്‍ ചേര്‍ന്നു. തദ്ദേശ തിരഞ്ഞെടുപ്പിന് തൊട്ടുമുമ്പാണ് പാര്‍ട്ടി മാറ്റം. 'എന്നും എപ്പോഴും പാര്‍ട്ടിയാണ് വലുത്' എന്ന ടാഗ്ലൈനോടെ ഫെയ്സ്ബുക്കില്‍ പോസ്റ്റിട്ട് മൂന്ന് ദിവസത്തിനകം ആണ് അദ്ദേഹം മറുകണ്ടം ചാടിയത്.
ബിജെപിയില്‍ ചേരുന്നതിന് ഒന്‍പത് മണിക്കൂര്‍ മുന്‍പ് വരെ അദ്ദേഹം കോണ്‍ഗ്രസ് അനുകൂല പോസ്റ്റുകളും യുഡിഎഫ് സ്ഥാനാര്‍ത്ഥിക്ക് വോട്ടഭ്യര്‍ത്ഥിച്ചുള്ള പോസ്റ്റുകളും ഫെയ്സ്ബുക്കില്‍ പങ്കുവെച്ചിരുന്നു.
കുന്നന്താനം ഗ്രാമപഞ്ചായത്ത് യുഡിഎഫ് സ്ഥാനാര്‍ഥിക്കായി വോട്ടഭ്യര്‍ഥിച്ചുള്ള പോസ്റ്റാണ് അവസാനമായി അഖില്‍ പങ്കുവച്ചത്. ഞായറാഴ്ചയാണ് 'എന്നും എപ്പോഴും പാര്‍ട്ടിയാണ് വലുത്' എന്ന ടാഗ് ലൈനോടെ അഖില്‍ ഫെയ്സ്ബുക്കില്‍ പോസ്റ്റിട്ടത്. കുന്നന്താനം ഗ്രാമപഞ്ചായത്ത് മൂന്നാം വാര്‍ഡിലെ യുഡിഎഫ് സ്ഥാനാര്‍ഥി അനു എ എമ്മിനൊപ്പമുള്ള ഭവന സന്ദര്‍ശനത്തിന്റെ ചിത്രത്തോടൊപ്പമായിരുന്നു പോസ്റ്റ്.
ബിജെപി പത്തനംതിട്ട ജില്ലാ പ്രസിഡന്റ് അദ്ദേഹത്തെ പാര്‍ട്ടിയിലേക്ക് സ്വീകരിച്ചു. കുന്നന്താനം സ്വദേശിയായ അഖില്‍ 2012 മുതല്‍ പത്ത് വര്‍ഷം യൂത്ത് കോണ്‍ഗ്രസ് പത്തനംതിട്ട ജില്ലാ സെക്രട്ടറിയായിരുന്നു.