'ശാസ്ത്രം മാത്രമാണ് ശരിയെങ്കില്‍ എട്ടു ദിവസത്തെ ദൗത്യത്തിന് പോയവര്‍ ഒന്‍പതാം ദിവസം തിരികെ വരണ്ടേ; ശാസ്ത്രം വളര്‍ന്ന് എത്ര ഐ.വി.എഫ് ചെയ്താലും ഈശ്വര നിശ്ചയമുള്ള കുഞ്ഞുങ്ങള്‍ മാത്രമേ ഇവിടെ ജനിക്കുകയുള്ളൂ'; ഫേസ്ബുക്ക് പോസ്റ്റുമായി നടി ലക്ഷ്മി പ്രിയ
'ശാസ്ത്രം മാത്രമാണ് ശരിയെങ്കില്‍ എട്ടു ദിവസത്തെ ദൗത്യത്തിന് പോയവര്‍ ഒന്‍പതാം ദിവസം തിരികെ വരണ്ടേ
കൊച്ചി: ഒമ്പതുമാസം നീണ്ട ചരിത്രദൗത്യത്തിനൊടുവില്‍ ബഹിരാകാശത്ത് നിന്നും തിരിച്ചെത്തിയ സുനിത വില്യംസിനും ബുച്ച് വില്‍മോറിനും വേറിട്ട ആശംസ കുറിപ്പുമായി നടി ലക്ഷ്മി പ്രിയ. അതേസമയം ദൈവ വിശ്വാസത്തെ ശരിവെക്കുന്ന വിധത്തിലുള്ള പോസ്റ്റില്‍ വലിയ ചര്‍ച്ചകളാണ് നടക്കുന്നത്.
ശാസ്ത്രം മാത്രമായിരുന്നു ശരിയെങ്കില്‍ എട്ടു ദിവസത്തെ ദൗത്യത്തിന് പോയവര്‍ ഒന്‍പതാം ദിവസം തിരികെ എത്തുമായിരുന്നെന്നും ഒന്‍പതു മാസം എടുക്കില്ലായിരുന്നുവെന്നുമാണ് ലക്ഷ്മി പ്രിയ പോസ്റ്റില്‍ പറയുന്നത്.
ഏത് ശാസ്ത്രത്തിനും അതീന്ദ്രമായ ഒരു ശക്തി വൈഭവമുണ്ടെന്നും ആ ശക്തിയ്ക്ക് മുന്‍പിലാണ് സുനിത വില്യംസും ബൂച്ചും ഒക്കെ വണങ്ങുന്നതെന്നും ആ ശക്തിയുടെ കൃപയാല്‍ കോടിക്കണക്കിന് മനുഷ്യരുടെ പ്രാര്‍ത്ഥനയിലാണ് അവര്‍ ഭൂമിയിലെത്തിയതെന്നും ലക്ഷ്മി പ്രിയ പോസ്റ്റില്‍ പറയുന്നു.
ശാസ്ത്രം എത്ര വളര്‍ന്നു വലുതായി എത്ര ഐ.വി.എഫ് ചെയ്താലും ഈശ്വര നിശ്ചയമുള്ള കുഞ്ഞുങ്ങള്‍ മാത്രമേ ഇവിടെ ജനിക്കുകയുള്ളൂവെന്നും അവര്‍ അവകാശപ്പെട്ടു. അതേസമയം ലക്ഷ്മി പ്രിയയുടെ കമന്റ് ബോക്‌സില്‍ പലവിധത്തിലുള്ള അഭിപ്രായങ്ങളാണ ്‌നടക്കുന്നത്. ലക്ഷ്മിയുടെ അഭിപ്രായത്തെ പിന്തുണച്ചും എതിര്‍ത്തും നിരവധി പേര്‍ രംഗത്തുണ്ട്.
നടി ലക്ഷ്മി പ്രിയയുടെ ഫേസ്ബുക്ക് പോസ്റ്റ്:
'സയന്‍സ് അഥവാ ശാസ്ത്രം മാത്രമായിരുന്നു ശരി എങ്കില്‍ എട്ടു ദിവസത്തെ ദൗത്യത്തിന് പോയവര്‍ ഒന്‍പതാം ദിവസം തിരികെ എത്തിയേനെ.! അല്ലാതെ ഒന്‍പതു മാസം എടുക്കില്ലായിരുന്നു.! അപ്പൊ ഏത് ശാസ്ത്രത്തിനും അതീന്ദ്രമായ ഒരു ശക്തി വൈഭവമുണ്ട്. ആ ശക്തിയ്ക്ക് മുന്‍പില്‍ ആണ് സുനിത വില്യംസും ബൂച്ചും ഒക്കെ വണങ്ങുന്നത്.. ആ ശക്തിയുടെ കൃപയാല്‍ ഇത്ര യധികം കോടി മനുഷ്യരുടെ പ്രാര്‍ത്ഥനയാല്‍ അവര്‍ ഭൂമിയിലെത്തി.
മുന്‍ ബഹിരാകാശ യാത്രിക കല്‍പ്പനാ ചൗളയ്ക്ക് സംഭവിച്ചത് ഓര്‍ക്കുക. എല്ലാ പേടകങ്ങളും ലക്ഷ്യത്തില്‍ എത്താറില്ല!. അതീവ സുരക്ഷയോടെ എന്ന് പറഞ്ഞ് നിര്‍മ്മിച്ച ടൈറ്റാനികിന് എന്താണ് സംഭവിച്ചത്?
ശാസ്ത്രം എത്ര വളര്‍ന്നു വലുതായി എത്ര ഐ.വി.എഫ് ചെയ്താലും ജനിക്കാന്‍ ഈശ്വര നിശ്ചയമുള്ള കുഞ്ഞുങ്ങള്‍ മാത്രമേ ഇവിടെ ജനിക്കുകയുള്ളൂ!.ഏത് രോഗത്തിലും എത്ര ശാസ്ത്രം എന്തു കണ്ടുപിടിച്ചാലും രോഗി ശാസ്ത്രത്തെ അമ്പരപ്പിച്ചു കൊണ്ട് ചികിത്സ ഫലിയ്ക്കാതെ വിട പറയും.
എത്ര ഉയരത്തില്‍ എത്തുമ്പോഴും അതിനും ഉയരെ നോക്കി എന്നെയും നയിക്കുന്ന എനിക്കും മുകളില്‍ ഒരു ശക്തിയുണ്ട് എന്ന് തിരിച്ചറിയുമ്പോഴാണ് നാം എളിമയുള്ളവരാകുന്നതും പ്രകൃതി കൂടുതല്‍ കൃപ നമ്മോടു ചൊരിയുന്നതും. ഉന്നതിയിലും ശാസ്ത്രത്തിലും വിരാജിക്കുമ്പോഴും അചഞ്ചലമായ ഈശ്വര ഭക്തിയും വിശ്വാസവും മുറുകെ പിടിച്ച സുനിത വില്യംസിനും ബൂച്ചിനും ആശംസകള്‍. ഇതാണ് നാം നമ്മുടെ മക്കള്‍ക്ക് പറഞ്ഞു കൊടുക്കേണ്ടത്.'