സീനിയര്‍ താരങ്ങളെക്കൊണ്ട് എനിക്ക് മതിയായി; ആറ് മാസമായി അവരുടെ ഇഷ്ടത്തിന് കളിക്കാന്‍ സമ്മതിച്ചു; ഇനിയത് നടക്കില്ല; ഞാന്‍ പറയുന്ന രീതിയില്‍ കളിക്കാന്‍ താല്‍പര്യമില്ലാത്തവര്‍ക്ക് ടീമില്‍ നിന്ന് പുറത്ത് പോകാം; മുന്നറിയിപ്പുമായി ഗൗതം ഗംഭീര്‍
സിഡ്നി: സീനിയര്‍ താരങ്ങള്‍ക്ക് മുന്നറിയിപ്പ് നല്‍കി ഇന്ത്യന്‍ കോച്ച് ഗൗതം ഗംഭീര്‍. കഴിഞ്ഞ ടെസ്റ്റിലെ തോല്‍വിക്ക് പിന്നാലെ ഡ്രസിംഗ് റൂമില്‍ നടന്ന ചര്‍ച്ചയിലാണ് സീനിയര്‍ താരങ്ങള്‍ക്ക് മുന്നറിയിപ്പ് നല്‍കിയത്. ഇനി വരാനിരിക്കുന്ന ടെസ്റ്റില്‍ സാഹചര്യം അനുസരിച്ച് കളിക്കാന്‍ കഴിയാത്തവര്‍ ടീമില്‍ ഉണ്ടായിരിക്കില്ലെന്ന് ഗംഭീര്‍ തറപ്പിച്ച് പറഞ്ഞു.
സീനിയര്‍ താരങ്ങളെക്കൊണ്ട് തനിക്ക് മതിയായെന്നുള്ള രീതിയിലാണ് ഗംഭീര്‍ പറഞ്ഞതെന്നാണ് ഇന്ത്യം ടീം വൃത്തങ്ങളെ ഉദ്ധരിച്ച് ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്യുന്നത്. ആരുടെയും പേരെടുത്ത് പറഞ്ഞില്ലെങ്കിലും സാഹചര്യം മനസിലാക്കി കളിക്കാനോ ഗെയിം പ്ലാനിന് അനുസരിച്ച് കളിക്കാനോ പലരും തയാറാവുന്നില്ലെന്നും സ്വാഭിവക കളിയെന്ന പേരില്‍ സ്വന്തം ഇഷ്ടപ്രകാരമാണ് പലരും കളിക്കുന്നതെന്നും ഗംഭീര്‍ കുറ്റപ്പെടുത്തി.
കഴിഞ്ഞ ആറ് മാസം കളിക്കാരുടെ ഇഷ്ടമനുസരിച്ച് കളിക്കാന്‍ അവസരം നല്‍കി. ഇനിയത് പറ്റില്ലെന്നും താന്‍ പറയുന്ന രീതിയില്‍ കളിക്കാന്‍ താല്‍പര്യമില്ലാത്തവര്‍ക്ക് ടീമില്‍ നിന്ന് പുറത്ത് പോകാമെന്നും ഗംഭീര്‍ പറഞ്ഞെന്ന് റിപ്പോര്‍ട്ടില്‍ പറയുന്നു. താന്‍ തീരുമാനിക്കുന്നതിന് വിരുദ്ധമായാണ് പല താരങ്ങളും ഗ്രൗണ്ടില്‍ കളിക്കുന്നത്. ഇനിയത് വെച്ചുപൊറുപ്പിക്കില്ലെന്നും ഗെയിം പ്ലാനിനും സാഹചര്യത്തിനും അനുസരിച്ച് കളിക്കാത്തവരെ പുറത്താക്കാന്‍ മടിക്കില്ലെന്നും ഗംഭീര്‍ ശക്തമായ വാക്കുകളില്‍ മുന്നറിയിപ്പ് നല്‍കിയെന്നും റിപ്പോര്‍ട്ടില്‍ പറയുന്നു.
മെല്‍ബണ്‍ ടെസ്റ്റില്‍ ആദ്യ ഇന്നിംഗ്‌സില്‍ നിരുത്തവാദപരമായ ഷോട്ട് കളിച്ചാണ് റിഷഭ് പന്ത് പുറത്തായത്. പിന്നാലെ ടീമന്റെ കൂട്ടത്തകര്‍ച്ചയും തുടങ്ങി. രണ്ടാം ഇന്നിംഗ്‌സിലും സമനില സാധ്യതയുള്ളപ്പോള്‍ അനാവശ്യ ഷോട്ട് കളിച്ച് റിഷഭ് പന്ത് പുറത്തായി. ഇതോടെ ഇന്ത്യ വീണ്ടും തകര്‍ന്നടിയുകയും 184 റണ്‍സിന്റെ കനത്ത തോല്‍വി വഴങ്ങുകയും ചെയ്തു.
ക്യാപ്റ്റന്‍ രോഹിത് ശര്‍മയുടെയും തുടര്‍ച്ചയായി ഓഫ് സ്റ്റംപിന് പുറത്തുപോകുന്ന പന്തില്‍ ബാറ്റുവെച്ച് പുറത്താകുന്ന വിരാട് കോലിയുടെയും പ്രകടനത്തിലും ഗൗതം ഗംഭീര്‍ തൃപ്തനല്ലെന്നാണ് റിപ്പോര്‍ട്ട്. തെറ്റ് തിരുത്താന്‍ തയാറാത്തവരെ ടീമില്‍ വേണ്ടെന്ന നിലപാട് ഗംഭീര്‍ സ്വീകരിച്ചാല്‍ അത് ഡ്രസ്സിംഗ് റൂമിനകത്ത് വലിയ പൊട്ടിത്തെറിയുണ്ടാക്കുമെന്നാണ് സൂചനകള്‍.