നാല് ഗോളുകളുമായി തിളങ്ങി ജുഗരാജ് സിങ്; കാനഡയെ തകര്‍ത്ത് സുല്‍ത്താന്‍ അസ്ലന്‍ ഷാ കപ്പ് ഹോക്കിയില്‍ ഇന്ത്യ ഫൈനലില്‍; ഇന്ത്യയുടെ ജയം 14-3 ന്
സുല്‍ത്താന്‍ അസ്ലന്‍ ഷാ കപ്പ് ഹോക്കിയില്‍ ഇന്ത്യ ഫൈനലില്‍
ന്യൂഡല്‍ഹി: കാനഡയെ തകര്‍ത്ത് സുല്‍ത്താന്‍ അസ്ലന്‍ ഷാ കപ്പ് ഹോക്കിയില്‍ ഫൈനല്‍ ടിക്കറ്റെടുത്ത് ഇന്ത്യ. റൗണ്ട് റോബിന്‍ മത്സരത്തില്‍ കാനഡയെ 14-3 എന്ന സ്‌കോറിനാണ് ഇന്ത്യ തോല്‍പ്പിചത്. ജയത്തോടെ പോയിന്റ് ടേബിളില്‍ ആദ്യ രണ്ട് സ്ഥാനമൊന്ന് ഇന്ത്യ ഉറപ്പിച്ചു.
ഇതോടെയാണ് ഇന്ത്യ കലാശപ്പോരിന് യോഗ്യത നേടിയത്.ഇന്ത്യയുടെ പ്രതിരോധതാരം ജുഗരാജ് സിങ് നാലുഗോളുകളുമായി തിളങ്ങി. മൂന്ന് ഗോളുകള്‍ പെനാല്‍റ്റി കോര്‍ണറില്‍ നിന്നും ഒരു ഗോള്‍ പെനാല്‍റ്റിയിലൂടെയുമാണ് ജുഗരാജ് സ്വന്തമാക്കിയത്. അഭിഷേക്, അമിത് രോഹിദാസ്, രജിന്ദര്‍ സിങ് എന്നിവര്‍ രണ്ട് ഗോളുകള്‍ വീതം നേടി. സെല്‍വം കാര്‍ത്തി, നിളാകാന്ത ശര്‍മ, സഞ്ജയ്, ദില്‍പ്രീത് സിങ് എന്നിവര്‍ ഓരോ തവണയും ലക്ഷ്യം കണ്ടു.
ജയത്തോടെ റൗണ്ടിലെ മറ്റു മത്സരഫലങ്ങള്‍ അപ്രസക്തമായി. ഫൈനലില്‍ ബെല്‍ജിയമാണ് എതിരാളികള്‍.ഞായറാഴ്ചയാണ് ബെല്‍ജിയവുമായുള്ള .ഇന്ത്യയുടെ ഫൈനല്‍.പക്ഷെ റൗണ്ട് റോബിന്‍ ഘട്ടത്തില്‍ ഇന്ത്യ നേരിട്ട ഏക തോല്‍വി ബെല്‍ജിയത്തോടായിരുന്നു.