ഏഷ്യല്‍ ചാമ്പ്യന്‍സ് ട്രോഫി ഹോക്കി സെമി: ദക്ഷിണകൊറിയയെ തകര്‍ത്ത് ഇന്ത്യ ഫൈനലില്‍; ജയം, ഒന്നിനെതിരെ നാല് ഗോളുകള്‍ക്ക്
ദക്ഷിണകൊറിയയെ തകര്‍ത്ത് ഇന്ത്യ ഫൈനലില്‍
Update: 2024-09-16 18:04 GMT
ഹുലുന്‍ബുയര്‍: ഏഷ്യല്‍ ചാമ്പ്യന്‍സ് ട്രോഫി ഹോക്കി സെമിയില്‍ ദക്ഷിണകൊറിയയെ തകര്‍ത്ത് ഇന്ത്യ ഫൈനലില്‍. തിങ്കളാഴ്ച നടന്ന മത്സരത്തില്‍ ഒന്നിനെതിരേ നാല് ഗോളുകള്‍ക്കായിരുന്നു ഇന്ത്യയുടെ ജയം.
ഇന്ത്യയ്ക്കായി ക്യാപ്റ്റന്‍ ഹര്‍മന്‍പ്രീത് സിങ് ഇരട്ട ഗോളുകളുമായി തിളങ്ങി. 19, 45 മിനിറ്റുകളിലായിരുന്നു ക്യാപ്റ്റന്റെ ഗോളുകള്‍. 13-ാം മിനിറ്റില്‍ ഉത്തം സിങ്ങും 32-ാം മിനിറ്റില്‍ ജര്‍മന്‍പ്രീത് സിങ്ങും ഇന്ത്യയ്ക്കായി വലകുലുക്കി. 33-ാം മിനിറ്റില്‍ യാങ് ജി ഹുനാണ് കൊറിയയുടെ ആശ്വാസ ഗോള്‍ നേടിയത്.
ടൂര്‍ണമെന്റില്‍ തോല്‍വിയറിയാതെ മുന്നേറുന്ന ഇന്ത്യ ചൊവ്വാഴ്ച നടക്കുന്ന ഫൈനലില്‍ ആതിഥേയരായ ചൈനയെ നേരിടും. സെമിയില്‍ പാകിസ്താനെ ഷൂട്ടൗട്ടില്‍ കീഴടക്കിയാണ് ചൈന ഫൈനലില്‍ കടന്നത്. ടൂര്‍ണമെന്റിന്റെ അഞ്ചാം തവണയാണ് ഇന്ത്യ ഫൈനലിലെത്തുന്നത്.