ടെന്നിസ് മത്സരം കളിക്കുന്നതിനിടെ മോശമായി പെരുമാറി; അനുവാദമില്ലാതെ ഫോട്ടോയെടുത്തു; ഫീൽഡിൽ നിന്ന് കരഞ്ഞ് 'എമ്മാ റഡുകാനു'; പരാതിയിൽ നടപടി; ശല്യക്കാരനായ ടൂറിസ്റ്റ് അറസ്റ്റിൽ
ദുബായ്: ദുബായിലെ മത്സരത്തിനിടെ ബ്രിട്ടീഷ് ടെന്നീസ് സൂപ്പർ താരം എമ്മാ റഡുകാനുവിന്‍റെ ഫോട്ടോ അനുമതിയില്ലാതെ പകര്‍ത്തി ശല്യം ചെയ്തയാളെ പോലീസ് അറസ്റ്റ് ചെയ്തു. എമ്മാ റഡുകാനുവിന്‍റെ പരാതിയെ തുടര്‍ന്നാണ് നടപടി എടുത്തത്. ദുബായ് ഡ്യൂട്ടി ഫ്രീ ടെന്നിസ് ചാമ്പ്യന്‍ഷിപ്പിനിടെയാണ് താരത്തിന് ദുരനുഭവം ഉണ്ടായത്.
അനുവാദമില്ലാതെ ചിത്രം പകര്‍ത്തിയതിന് സന്ദര്‍ശക വിസയിൽ എത്തിയ ടൂറിസ്റ്റാണ് പിടിയിലായത്. മത്സരം നടക്കുന്നതിനിടെ എമ്മക്ക് കുറിപ്പ് കൈമാറിയ ശേഷം ഇയാൾ ഫോട്ടോ പകർത്തി താരത്തെ ശല്യം ചെയ്യുന്ന വിധത്തിൽ പെരുമാറുകയായിരുന്നു.
ഇതിന് പിന്നാലെ കരച്ചിലടക്കാനാകാതെ എമ്മ അമ്പയറുടെ ഇരിപ്പിടത്തിന് പിറകിൽ പോയി കണ്ണീർ തുടച്ച് മടങ്ങിവരുന്ന ചിത്രം സോഷ്യൽ മീഡിയയിൽ പ്രചരിച്ചിരുന്നു. ഇയാൾക്കെതിരായ പരാതി എമ്മ പിന്നീട് പിൻവലിച്ചു. എന്നാൽ താരത്തെ ഇനി സമീപിക്കില്ലെന്ന് പൊലീസ് ഇയാളിൽ നിന്ന് സത്യവാങ് മൂലം എഴുതിവാങ്ങിയിട്ടുണ്ട്. മറ്റ് മത്സരങ്ങൾ കാണാൻ എത്തുന്നതിന് ഇയാൾക്ക് വിലക്കും ഏർപ്പെടുത്തുകയും ചെയ്തു.