നിയന്ത്രണം വിട്ട ബൈക്ക് കാറിൽ ഇടിച്ച് അപകടം; യുവാവിന് ദാരുണാന്ത്യം; ഒരാൾക്ക് ഗുരുതര പരിക്ക്; സംഭവം ആലപ്പുഴയിൽ

ആലപ്പുഴ: ചെങ്ങന്നൂരില്‍ നിയന്ത്രണം വിട്ട ബൈക്ക് കാറിൽ ഇടിച്ച് യുവാവിന് ദാരുണാന്ത്യം. വ്യാഴാഴ്ച അര്‍ധരാത്രി പന്ത്രണ്ടരയോടെയായിരുന്നു അപകടം. കണ്ണൂർ സ്വദേശി വിഷ്ണുവാണ് മരിച്ചത്. ഒപ്പമുണ്ടായിരുന്ന സുഹൃത്തിന് ഗുരുതര പരിക്കേറ്റു. ചെങ്ങന്നൂര്‍ ടൗണില്‍ മഹേശ്വരി ടെക്സ്റ്റയില്‍സിനു മുന്‍വശത്താണ് അപകടമുണ്ടായത്. വിഷ്ണുവും സുഹൃത്തും സഞ്ചരിച്ചിരുന്ന ബൈക്ക് നിയന്ത്രണംവിട്ട് എതിർ ദിശയിൽ വന്ന കാറിലേക്ക് ഇടിച്ചു കയറുകയായിരുന്നു.

ബൈക്കിലിടിച്ച കാര്‍ എതിരെ വന്ന മറ്റൊരു കാറിലും ബൈക്കിലും ഇടിച്ചെങ്കിലും ആളപായം ഉണ്ടായില്ല. നാലു വാഹനങ്ങളും തകര്‍ന്ന നിലയിലാണ്. വിഷ്ണുവിനൊപ്പം സഞ്ചരിച്ച അമ്പലപ്പുഴ സ്വദേശിയായ സുഹൃത്ത് ഗുരുതരമായി പരിക്കേറ്റ് ചികിത്സയിലാണ്. ക്രിസ്മസ് ആഘോഷിക്കാനായി ചെങ്ങന്നൂരിലെ സുഹൃത്തിന്റെ വീട്ടിലെത്തിയതായിരുന്നു ഇരുവരും.