കൊച്ചിയിൽ ബസും ലോറിയും തമ്മിൽ കൂട്ടിയിടിച്ച്‌ വൻ അപകടം; യാത്രക്കാരിക്ക് ദാരുണാന്ത്യം; നിരവധിപേർക്ക് പരിക്ക്; അപകടകാരണം അമിതവേഗതയെന്ന് നാട്ടുകാർ; പ്രദേശത്ത് ഗതാഗത കുരുക്ക്

കൊച്ചി: സ്വകാര്യ ബസും ടോറസ് ലോറിയും തമ്മിൽ കൂട്ടിയിടിച്ച് വൻ അപകടം. കൊച്ചി കാക്കനാട് സീപോർട്ട് റോഡിന് സമീപമാണ് അപകടം നടന്നത്. അപകടത്തിൽ ഒരു ബസ് യാത്രക്കാരി മരിച്ചു. രാവിലെ സമയം ആയതിനാൽ സ്കൂൾ വിദ്യാർത്ഥികളടക്കം നിരവധി യാത്രക്കാർക്കാണ് പരിക്കേറ്റത്. പുക്കാട്ടുപടിയിൽ നിന്നും എറണാകുളത്തേക്ക് പോകുകയായിരുന്ന ബസാണ് അപകടത്തിൽപ്പെട്ടത്.

സീപോർട്ട് റോഡിലെ വള്ളത്തോൾ ജങ്ഷനിൽ എത്തി ഇടപ്പള്ളി ഭാഗത്തേക്ക് തിരിയുന്നതിനിടയിലാണ് അപകടം. എതിർഭാഗത്ത് നിന്ന് എത്തിയ ടോറസ് ലോറി ഇടിക്കുകയായിരുന്നു.

ബസിലേക്ക് ഇടിച്ച ടോറസിന് പുറകിൽ മറ്റൊരു ടോറസ് ലോറിയും വന്ന് ഇടിക്കുകയായിരിന്നു. ബസ് ഡ്രൈവറുടെ അശ്രദ്ധമായ ഡ്രൈവിങ്ങും അമിതവേഗതയും കാരണമാണ് അപകടം ഉണ്ടായതെന്ന് യാത്രക്കാർ പറയുന്നു. പരിക്കേറ്റവരെ അടുത്തുള്ള സ്വകാര്യ ആശുപത്രികളിൽ പ്രവേശിപ്പിച്ചിട്ടുണ്ട്. അപകട സ്ഥലത്ത് പോലീസെത്തി മേൽനടപടികൾ സ്വീകരിച്ചു.